දින දාගත්ත විදියටම වැඩේ කෙරුවා…
අබා චිත්රපටය හරහා සිනමාවට අවතීර්ණ වූ දුලානි අනුරාධා ඉතාම කෙටි කාලයක් ඇතුළත හැම දෙනාගේම ආදරය දිනා ගත්ත සිනමා තාරකාවක් බවට පත් වුණා. ඒ කාලය පුරාවට ඇය රඟපෑ චිත්රපට රැසක් අතිශයින්ම ජනප්රියත්වයට පත් වුණා. මේ අතරේ හැමෝගෙම ආදරය දිනාගත්ත දුලානි විවාහ දිවියට එළැඹුණු බව අපට දැන ගන්න ලැබුණා. අලුත් ජීවිතයට ඇයට සුබ පතන්න වගේම ඒ ගැන තොරතුරු දැන ගන්න අපි ඇයට කතා කළා.
දුලානි හදිසියේම විවාහ වුණු බව දැන ගන්න ලැබුණා. ඒ ගැන දැන ගන්න ඔබේ රසිකයෝ කැමැති වේවි?
විවාහය කියන්නේ හැමෝගෙම ජීවිතයේ වැදගත් අවස්ථාවක්. බලාපොරොත්තු ගොඩක් තියාගෙන අපි විවාහ ජීවිතයට ඇතුළත් වුණා. ඉතාම හොඳින් ඒ කටයුතු සිද්ධ වුණා. ඒ ගැන හරිම සතුටුයි.
මේක ආදර විවාහයක්ද, යෝජිත විවාහයක්ද කියන එක ගැනත් කියමු?
මේක ඇත්තටම යෝජනාවක්. අපි කාලයක් යාළුවෝ වගේ හිටියා. ඒ හින්දා මේක යාළුවෝ අතරින් ආව යෝජනාවක් කිව්වොත් හරි.
රටේ අයහපත් වාතාවරණයක් තියෙන මේ වගේ වෙලාවක දුලානි විවාහ වුණේ ඇයි කියන එකත් බොහෝ අයට ප්රශ්නයක් වෙලා තියෙනවා. ඇත්තටම ඇයි හදිස්සියේම විවාහ වුණේ?
මේ යෝජනාවත් හිදිස්සියේම ආව එකක්. ඒ හින්දා අපි විවාහයට දින යොදා ගත්තා. අපි දෙන්නම විවාහ විය යුතු කාලයේ ඉන්න හින්දා මේක තවත් කල් දාන්නත් බැහැ කියලා අපි තීරණය කළා. විවාහ උත්සවය සිදු කරන්න හිටියේ නම් මේ විදියට නෙවෙයි. ඒත් රටේ පවතින තත්ත්වය උඩ පුළුවන් තරමින් ඒක සිද්ධ කළා.
විවාහ මංගල්යය හිතුව විදියට කරන්න බැරි වුණු එක ගැන කනගාටුවක් නැද්ද?
කනගාටුවක් දැනෙන්නේ නැහැ. ඒත් අපි හිතුව විදියට අපේ යාළු මිත්රයෝ හැමෝටම එන්න කියලා ඒ හැමෝමත් එක්ක විවාහය සමරන්න තිබුණා නම් මීට වඩා සතුටක් දැනෙයි.
අපි ඔබගේ ස්වාමියා ගැනත් විස්තර කියමු?
එයාගේ නම අශේන් සේනාධීර. ඔහු නාවික හමුදාවේ කමාන්ඩර්වරයෙක්.
අශේන්ට කැමැති වෙන්න ඔහුගේ රැකියාවත් බලපෑවද?
එහෙම එකක් නැහැ. මම පොඩි කාලේ ඉඳන්ම ආරක්ෂක අංශයට ආසයි. ඒත් අශේන්ට කැමැති වෙන්න ඒක බලපෑවේ නැහැ. එයාගේ රැකියාවට වඩා එයාගේ ගතිගුණවලට තමයි මම වැඩිපුර කැමැති වුණේ.
දුලානිගේ කලා කටයුතු ගැන ඇහුවේ නැත්නම් ඒක අඩුවක් වෙනවා. ඒ හින්දා අපි ඒ ගැනත් විස්තර කියමු?
මම කොහොමත් චිත්රපට සඳහානේ වැඩිපුර සම්බන්ධ වෙන්නේ. කොරෝනා පළමු රැල්ල ආව දවස්වලම අපි කරගෙන ආව නිර්මාණ හැම එකකම වගේ වැඩ කටයුතු නවත්වන්න සිද්ධ වුණා. ඒ එකක්වත් තාම පටන් ගත්තේ නැහැ. දැන් සිනමා ශාලාත් වහලා තියෙන හින්දා ඒවා කවදා පටන් ගනියිද කියලා කියන්න බැහැ.
මේ වෙද්දී වැඩ කටයුතු සම්පූර්ණයෙන්ම ඉවර වුණු චිත්රපට එකක්වත් ඒ අතර නැද්ද?
වැඩ ඉවර වුණු චිත්රපටත් කිහිපයක්ම තියෙනවා. ඒත් මේ යන විදියට ඒවා කවදා තිරගත වේවිද කියන්න දන්නේ නැහැනේ.
චන්දන පොන්නම්පෙරුම
