මෙවර වී වගාවට සහතික මිලක් ලබාදෙන ලෙස ඉල්ලමින් රට පුරා සිටින ගොවි ජනතාව ආණ්ඩුවට දැඩි බලපෑමක් එල්ල කිරීම ආරම්භ කොට තිබේ.
ඒ අනුව ඔවුන් පෙන්වා දෙන්නේ පවතින වියදම්වලට අනුරූපීව සහ ආණ්ඩුව මැතිවරණ සමයේදී ප්රකාශ කළ පරිදි රුපියල් 150ක සහතික මිලක් වී කිලෝවකට ලබාදෙන ලෙසටය.
කෙසේ වෙතත් ආණ්ඩුව මේ වනවිට සහතික වී මිල ලෙස ප්රකාශ කොට ඇත්තේ රුපියල් 120කි. නමුත් ගොවීන් සඳහන් කර සිටින්නේ ආණ්ඩුව එසේ කියා සිටියද වී කිලෝවක මිල රුපියල් 80-90 දක්වා පහත වැටී ඇති බවකි.
මේ නිසා වහාම සාධාරණ මිලකට තමන්ගේ වී ආණ්ඩුව විසින් මිලදී ගතයුතු බවත්, එසේ නොමැති නම් ඊට එරෙහිව දැවැන්ත සටනක් ආරම්භ කිරීමට සූදානම් බවත් ගොවි සංවිධාන නියෝජිතයෝ සඳහන් කර සිටිති.
