ශ්රී ලංකාවේ ප්රමුඛ පෙළේ විශ්වවිද්යාල, සෞඛ්ය සේවා වෘත්තිකයන්, ප්රතිපත්ති සම්පාදකයන් සහ ගෝලීය සෞඛ්ය සංවිධාන එක්ව ‘ශ්රී ලංකාවේ දුම්කොළ භාවිතය හා දුම්පානය නැවැත්වීම වැඩිදියුණු කිරීමේ උපාය මාර්ග’ පිළිබඳ පවත්වන ලද සාකච්ඡාවක් සහ මාධ්ය හමුවක් සෞඛ්ය නියෝජ්ය අමාත්ය වෛද්ය හංසක විජේමුණි මහතාගේ ප්රධානත්වයෙන් කොළඹ සිනමන් ලේක්සයිඩ් හෝටලයේදී පැවැත්විණි.Sri Lanka Latest News
ආසියානු ජනගහනයේ අවදානම් සහිත කොට්ඨාසයන්හි ශ්වසන රෝග ඇතිවීමේ ප්රවණතාව අඩුකිරීම සහ ඔවුන්ගේ සෞඛ්ය මට්ටම වැඩිදියුණු කිරීම අරමුණු කරගනිමින් ඒ සඳහා ජාත්යන්තර මැදිහත්වීමක් ලෙස ගෝලීය සෞඛ්ය පිළිබඳ ඍැිචසරු ව්යාපෘතිය යටතේ ශ්රී ලංකාවේ නියෝජිත ආයතන වන ශ්රී ජයවර්ධනපුර විශ්වවිද්යාලය, පේරාදෙණිය විශ්වවිද්යාලය, රජරට විශ්වවිද්යාලය, වයඹ විශ්වවිද්යාලය සහ ජෙනරාල් ශ්රීමත් ජෝන් කොතලාවල ආරක්ෂක විශ්වවිද්යාලය විසින් මෙම වැඩසටහන සංවිධාන කර තිබිණි.
මෙමගින් ශ්රී ලංකාවේ දුම්කොළ භාවිතය හා දුම්පානය නැවැත්වීමේ ක්රියාමාර්ග ශක්තිමත් කිරීම අරමුණු කරගෙන ඇති අතර ඒ සදහා අවශ්ය උපාය මාර්ග සහ සහයෝගී ප්රවේශයන්ද මෙහිදී ඉස්මතු කෙරිණි.
කොතලාවල ආරක්ෂක විශ්වවිද්යාලයේ ජ්යෙෂ්ඨ කථිකාචාර්ය ආචාර්ය ප්රසන්න හේරත් මහතා විසින් මෙම වැඩසටහනේ පරීක්ෂණාත්මක සහ තහවුරු කරන ලද ඒකපුද්ගල දුම්පානය නිවාරණය සම්බන්ධ විද්යාත්මක ක්රමවේදය හඳුන්වා දීමද සිදුකරන ලදී. එමෙන්ම ශ්රී ලංකාවේ සෞඛ්යසම්පන්න, දුම්පානයෙන් තොර අනාගතයක් ගොඩනැගීම සඳහා සහයෝගී ක්රියාමාර්ග දිරිමත් කිරීම, මෙන්ම ඒ සඳහා ප්රතිපත්ති සම්පාදකයන්, සෞඛ්ය සේවා වෘත්තිකයන්, පර්යේෂකයන් සහ සිවිල් සමාජ සංවිධාන අතර සංවාදය ශක්තිමත් කිරීමද අරමුණු කරගෙන තිබිණි.
ශ්රී ලංකාවේ දුම්කොළ සහ දුම්පානය, නැවැත්වීමේ ජාතික වැඩසටහනක අවශ්යතාව පිළිබඳ නවසීලන්ත ඕක්ලන්ඩ් විශ්වවිද්යාලයේ ජනගහන සෞඛ්ය පාසලේ මහජන සෞඛ්ය පිළිබඳ මහාචාර්ය ක්රිස් බුලන් මහතා විසින් සූම් තාක්ෂණය ඔස්සේ ප්රධාන දේශනය සිදුකරන ලද අතර, දුම්පානය නැවැත්වීමේ උපායමාර්ග, දුම්පානය සහ ශ්වසන රෝග, දුම්පානය නැවැත්වීමේ මුලපිරීම් සහ ක්රියාකාරී සැලසුම්, දුම්පානය නැවැත්වීම සඳහා සාක්ෂි මත පදනම් වූ විද්යාත්මක ප්රවේශයන් පිළිබඳවද මෙහිදී දේශන පවත්වන ලදී.
දුම්කොළ පරිභෝජනය අඩුකිරීමේදී රජයේ කාර්යභාරය පිළිබඳ මෙහිදී සෞඛ්ය නියෝජ්ය අමාත්ය වෛද්ය හංසක විජේමුණි මහතා දීර්ඝ ලෙස අදහස් දක්වන ලදී. එහිදී ලෝකයේ වළක්වා ගත හැකි මරණවලට ප්රධානතම හේතුවක් ලෙස දුම්කොළ භාවිතය බව පෙන්වා දුන් සෞඛ්ය නියෝජ්ය අමාත්යවරයා, දුම්කොළ ආශ්රිත රෝගී තත්ත්වයන් මෙරට සෞඛ්ය සේවා පද්ධතියට, ආර්ථිකයට සහ පවුල්වලට විශාල බරක් පටවමින් පවතින බවද පැවැසීය. රජයේ ප්රධාන අරමුණ රටේ ජනතාව රෝගවලින් තොරව සතුටින් තැබීම බවත්, රෝගවලට ලක්වීමට ඉඩහැර ප්රතිකාර කිරීම සෞඛ්ය අංශයේ අරමුණ නොවන බවද අමාත්යවරයා මෙහිදී වැඩිදුරටත් පෙන්වා දෙන ලදී.
ශ්රී ලංකා රජය දුම්කොළ පාලනය මහජන සෞඛ්ය ජාතික ප්රමුඛතාවක් ලෙස පිළිගෙන ඇති බවත්, අපගේ වගකීම වන්නේ දුම්කොළ නිසා ඇති වන රෝගවලට ප්රතිකාර කිරීම පමණක් නොව රෝග ඇතිවීමට පෙර ඒවා වැළැක්වීම බවද අමාත්යවරයා අවධාරණය කරන ලදී.
දුම්පානය සියයට සියයක්ම වළක්වාගත හැකි දෙයක් බවත්, ජනතාව ඉබේ හසුවන උගුලක් මෙහි වන බව පෙන්වා දුන් නියෝජ්ය අමාත්යවරයා දුම්පානය මෙරටින් තුරන් කිරීම රජයේ උත්සාහය බවද පැවැසිය. දුම්කොළ පරිභෝජනය අඩුකිරීම සඳහා ශ්රී ලංකාව වසර ගණනාවක් පුරා වැදගත් පියවර රැසක් ගෙන ඇති බවත්, මෙම පියවර ක්රියාත්මක කරන ලද්දේ හුදෙක් රෙගුලාසි ලෙස නොව, ජීවිතාරක්ෂක මැදිහත්වීම් ලෙස බවද අමාත්යවරයා මෙහිදී වැඩිදුරටත් පැවැසීය.
