හෝමාගම, දොළහේන ආරච්චිගොඩ ප්රදේශයේ ඉඩමක් කුලී පදනම මත ලබාගෙන කාලයක සිට මහා පරිමාණයෙන් පවත්වාගෙන ගිය මුදලට කැට සූදුවේ නිරත වූ කෝටිපති ව්යාපාරිකයින් 23 දෙනෙකු රුපියල් ලක්ෂ පහකට ආසන්න මුදලක් සමඟ අත්අඩංගුවට ගැනීමට හෝමාගම කොට්ඨාස අපරාධ විමර්ශන කාර්යාංශය සමත්ව තිබෙනවා.Sri Lanka Latest News
අත්අඩංගුවට පත් වූ සැකකරුවන් හෝමාගම මහේස්ත්රාත් අධිකරණයට ඉදිරිපත් කිරීමෙන් අනතුරුව, ඔවුන්ට දඩ මුදල් නියම කළ මහේස්ත්රාත්වරයා, මෙම සැකකරුවන්ව පැය පනහ බැගින් හෝමාගම නගර මධ්යයේ ප්රසිද්ධියේ ප්රජා සේවයේ යොදවන ලෙසට ද ඊයේ (31) නියෝග කළා.
සූක්ෂම ලෙස සැකසූ සූදු පොළ අලුත් අවුරුද්ද වෙනුවෙන් මහා පරිමාණයෙන් මුදලට කැට සෙල්ලම් කරන සූදු පොළක් පිළිබඳව හෝමාගම කොට්ඨාස භාර ජ්යෙෂ්ඨ පොලිස් අධිකාරී චන්දන ලියනගේට ලැබුණු තොරතුරකට අනුව මෙම වැටලීම සිදුකර තිබෙනවා.
පරීක්ෂණ වලදී අනාවරණය වී ඇත්තේ රුපියල් ලක්ෂයක මාසික කුලියට ඉඩමක් ලබාගෙන, එහි ආරක්ෂිත මඩුවක් තනා ඉතා සූක්ෂම ලෙස මෙම ජාවාරම කරගෙන ගොස් ඇති බවයි.
මොවුන් එම ස්ථානය වැටලීම්වලින් ආරක්ෂා කිරීම සඳහා ප්රවේශ මාර්ගවල ඔත්තුකරුවන් පවා රඳවා සිටි බව පොලිසිය පවසනවා.
මෙසේ අත්අඩංගුවට පත්ව ඇත්තේ හෝමාගම, කැස්බෑව, හෝකන්දර, ගොඩගම, පාදුක්ක, අතුරුගිරිය, කොට්ටාව, කහතුඩුව, මොරගහහේන සහ පිළියන්දල යන ප්රදේශවල පදිංචි වයස අවුරුදු 25ත් 55ත් අතර පසුවන පුද්ගලයින්.
ඔවුන් අතර ගොඩනැගිලි කොන්ත්රාත්කරුවන්, වාහන හා ඉඩම් සේල් හිමියන්, පොලියට මුදල් ලබාදෙන්නන්, බ්රෝකර්වරුන් සහ වාහන හිමිකරුවන් වැනි කෝටිපති ව්යාපාරිකයින් ද සිටින බවයි පොලිසිය සඳහන් කළේ.
වැටලීම සිදුකරන අවස්ථාවේදී සූදු කෙළීම සඳහා යොදාගත් රුපියල් ලක්ෂ පහකට ආසන්න මුදලක්, කැටයක් සහ ලෑල්ලක් පොලිස් භාරයට ගෙන තිබෙනවා.
හෝමාගම කොට්ඨාස භාර ජ්යෙෂ්ඨ පොලිස් අධිකාරී චන්දන ලියනගේ නිලධාරියාගේ සෘජු අධීක්ෂණය යටතේ සහ සහකාර පොලිස් අධිකාරී සමන් ජයලත් ගේ නියෝග මත මෙම වැටලීම සිදු කෙරුණා.
කොට්ඨාස අපරාධ විමර්ශන කාර්යාංශයේ ස්ථානාධිපති පොලිස් පරීක්ෂක අමිල ගෝවින්නගේ මෙහෙයවීමෙන්, උප පොලිස් පරීක්ෂක පසන් දයානන්ද, පොලිස් සැරයන්වරුන් වන විමලවීර (34697), සමීර (10874), පොලිස් කොස්තාපල්වරුන් වන මෛත්රීපාල (28007), මධූෂ (100365), ගම්ලත් (101566), ජනිත් (105209) සහ පොලිස් කොස්තාපල් රියැදුරු සිල්වා (13950) යන නිලධාරීන් මෙම මෙහෙයුම සිදු කළා.
