පුංචි තිරයේ දිග හැරෙන විවිධ වූ චරිත ඔස්සේ ප්රේක්ෂක හදවත් ස්පර්ශ කළ ඇය, රංගනය නමැති සිතුවම මත තමන්ටම ආවේණික වර්ණ තැවරූ අපූරු ශිල්පිනියකි. නිසල දෑසක සැඟවුණු ප්රකාශනශීලී බවත්, ඕනෑම චරිතයකට ජීවය දීමේ සහජ හැකියාවත් නිසාම ඇය අද වනවිට කලා ලොවේ ජනප්රිය තරුවකි. ඇය රෙබෙකා දිල්රුක්ෂියි. ඇය අද ‘හාට්’ අපිත් එකතු වෙන්නේ මෙලෙසින්…Sri Lanka Latest News
ඔබ රංගනයෙන් දායක වන අලුත්ම චිත්රපටය ‘ද වයිෆ්’ තිරගතවීම ආරම්භ කළා නේද?
ඔව්, පෙබරවාරි 13 වැනිදා. ශමීර නාඔටුන්න මහත්මයා තමයි අධ්යක්ෂතුමා. මේ අපි එදිනෙදා දකින චරිත, එදිනෙදා දකින ජීවිතවල සිද්ධීන් එකතු කරලා හදපු වැඩක්. දැන් ලාංකීය සමාජය ඇතුළේ ඉන්න අලුත බැඳපු කපල් ගත්තම මේ ප්රශ්න ටික මේ විදිහටම තියෙනවා. මේ ටික පෙර අනුවාදවලින් තියෙන්නත් පුළුවන්.
‘ද වයිෆ්’ චිත්රපටයට සම්බන්ධ වීමට ඔබට අවස්ථාව ලැබුණේ කොහොමද?
‘ද වයිෆ්’ චිත්රපටයට ශමීර නාඔටුන්න මහත්මයා තමයි මට කතා කළේ. මගේ ස්ක්රීන් ටයිම් එක පොඩි වුණාට ඒක මට ආස හිතුණා වැඩ කරන්න.
ඔබේ චරිතය ගැන කතා කළොත්..?
අපි ඒක රහසක් විදියට ප්රේක්ෂකයන්ටම බලන්න ඉඩ දෙමු. කාන්තාවකගේ එක සමාජ පැතිකඩක් නියෝජනය කරන චරිතයක්.
සිනමාවේ මේ නව පිබිදීම ගැන මොකද හිතෙන්නේ?
අපිට සතුටු වෙන්න පුළුවන් කාලයක් ඇවිල්ලා තියෙනවා. පශ්චාත් සමයේ විවිධ ප්රශ්න ටිකක් තිබුණනේ ලංකාව ඇතුළේ. දැන් ඉතින් ඒ ප්රශ්න ටික සමනය වෙලා අලුත් නාට්යකරුවෝ සිනමාකරුවෝ බිහිවෙනවා. ප්රේක්ෂකාගාරයක් හැදිල තියෙනවා. ෆිල්ම් හෝල් තව ප්රතිසංස්කරණය වෙමින් පවතිනවා. අපි හිතුවේ මිනිස්සු ෆිල්ම් හෝල්වලට ආයේ යන්නේ නැතිවෙයි කියලා තාක්ෂණයේ දියුණු වීමත් එක්ක. හැබැයි හොඳ ෆිල්ම් එකක් ආවොත් මිනිස්සු හෝල්වලට යනවා අනිවාර්යයෙන්ම බලන්න. එක රැල්ලක් පටන් ගත්තා ෆිල්ම් තරගයට කරන්න. මාර තරගකාරීත්වයක් තියෙන්නේ. ඉතින් හරිම සතුටුයි අපේ ක්ෂේත්රය දියුණු වෙනවට.
රංගන ශිල්පිනියක් විදිහට වේදිකාවෙන් පෝෂණය විය යුතුද?
වේදිකාවෙන් පෝෂණය වෙන්න ඕනෙ කියලා එකක් නැහැ රංගන ශිල්පියෙක්. කවදාවත් වේදිකාවකට නැගලා නැති ලෝකයේ රඟපාන මිනිස්සු ඉන්නවා. දැන් ජෝ අබේවික්රම මහතා කවදාවත් වේදිකා නාට්යයක් කරලා නෑ. ඒ අදහස ටිකක් වැරදි විදියට ගිහිල්ලා තියෙනවා වේදිකා නාට්ය කරන නළු නිළියෝ තමයි හොඳම කියලා. හැබැයි එක්තරා විදියකට ඒගොල්ලන්ටත් පුහුණුවක් තියෙනවා. මම දන්න තරමින් ඉතාමත් හොඳ රංගන ශිල්පීන් වේදිකාවෙන් ආපු අය කියලා කියන්නත් බෑ. රඟපාන්න බැරි මිනිස්සුත් වේදිකාවෙන් ඇවිල්ලා වැඩේ අනාගෙන යන අවස්ථාත් දැකලා තියෙනවා. නළුවාට තියෙන පුහුණුවීම හැබැයි වේදිකා නාට්යයකරුවා තුළ තියෙනවා.
රඟපාන්න හදාරන්න ඕනෙමද?
මෙය හැදෑරිය යුතුම විෂයක්. අනික් දේවල් වගේ නෙවෙයි මේක තත්පරෙන් තත්පරේ හැමදාම අප්ඩේට් වෙවී යනවා. යම් චරිතයක මනෝභාවයන් එකිනෙකාට වෙනස්. අපි ඒක ගැන අත්දැකීමක් ලබාගන්න ඕනෙ සහ අප්ඩේට් වෙන්න ඕනෙ. ඒ නිසා අපි ඒ ඒ චරිත ගැන අධ්යයනය කළ යුතුයි. ඒ අධ්යයනය ඉතාමත් ගැඹුරු විෂයක්. සමාජ මාධ්ය හරහා ප්රසිද්ධ වෙලා නිළියක්, නළුවෙක් ලෙස වැඩවලට ගන්න අවස්ථා තියෙනවා. ඒ ළමයාට තමන් එහා පැත්තෙන් ඉන්න ආටිස්ට් කෙනෙක් සමග වැඩකරන්න අවබෝධයක් නැහැ. ඊට හේතුව තමයි හැදෑරීමක් නැතිකම. ඉතින් එහෙම උනහම වැඩේ ඇතුළේ අපහසුතාවට පත්වෙනවා.
2026 වසරේ ඔබව දකින්න ලැබෙන සිනමා නිර්මාණ මොනවාද?
වැඩක් කතාකරගෙන යන ගමන්. තාම සාකච්ඡා මට්ටමේ ඉන්නේ. හොඳ සිනමා නිර්මාණයකින් ප්රේක්ෂකයන් අතරට එන්න බලාපොරොත්තු වෙනවා.
මේ දවස්වල ඔබ සම්බන්ධ වෙලා ඉන්න ‘පට්ටි ගෙදර’ ටෙලිනාට්යය ගැන කතා කළොත්?
‘පට්ටි ගෙදර’ නන්දනී චරිතය තමයි මම කරන්නේ. අධ්යක්ෂ මහත්මයා තමයි මේක ලියන්නෙත්. අපි යම් අධ්යයනයක් කරලා තමයි ඒ වැඩේට අත ගැහුවේ. ඒ කියන්නේ අපි දකින චරිතවල මනස කොහොම වෙයිද කියලනේ බලන්නේ. ඒකට මට සම්පූර්ණ සහයෝගය ලැබුණා අනුෂ්ක රසාංජන ද සිල්වාගෙන්. ඒක ටිකක් බැරෑරුම් චරිතයක්. මොකද එක ළඟ චරිත දෙක තුනක් මාරු වෙනවා. ඒක ලොකු අභියෝගයක් වුණා. හොඳ ප්රේක්ෂක ප්රතිචාරත් ලැබෙනවා.
මොන විදියේ ඇගයීම්ද ඔබට ලැබෙන්නේ?
ප්රේක්ෂක ප්රතිචාර හොඳයි. සමාජ මාධ්ය හරහාත් ගොඩක් ප්රතිචාර ලැබෙනවා. සමාජ මාධ්ය හරහා අපිට ලැබෙන ප්රතිචාර අපි දන්නේ නෑනේ කවුද දාන්නේ කියන එක. ඒ තුළින් හොඳක් කියලා තියෙනවා නම් ඉතින් හොඳයිනේ. සජීවීව ලැබෙන ප්රතිචාර ගොඩක් තියෙනවා. හරි සතුටුයි ඉතින් ලයිව් ඇවිල්ලා ඔයා ඒ චරිතය හොඳට කරනවා කියන එක අහගන්න. ඒකම තමයි රංගන ශිල්පයෙක්ගේ ජීවිතේ ගොඩක් වටින්නේ. ඉතාම හොඳ ප්රතිචාර නාට්යයට,චරිතයට ලැබෙනවා.
මේ දක්වා වූ ගමන තුළ සහයෝගය දුන් පිරිසකුත් ඇති ඒ අයවත් මතක් කළොත්?
පවුලේ අය ඒ කියන්නේ අම්මා තාත්තා ඇතුළු යාළුවෝ ඔක්කොම මට ලොකු සහයෝගයක් ලබාදෙනවා. ඒ යාළුවන්ගේ මිත්රත්වය සහෝදරත්වය ගැන අමුතුවෙන් කියන්න ඕනෙ නෑ. ඒ බැඳීම් පවුලේ අයගේ වගේම තවමත් තියෙනවා. හිතේ ඉර්ෂ්යාවක් නැතිව ඒ අගය කිරීම තවමත් තියෙනවා. තමන්ගේ කියන හැඟීමෙන් අපට දක්වන ප්රතිචාර හරිම ලොකුයි. ඒ වගේම අධ්යක්ෂවරු, ඇක්ටර්ස්ලාගෙන් රඟපාද්දී අනිත් පැත්තෙන් ගොඩක් සහයෝගයක් ලැබෙනවා. ඒ සහයෝගය නැත්නම් ඇත්තටම මනුස්සයෙක්ට රඟපාන්න බෑ. ඒ සහයෝගය මට නොමඳව ලැබෙනවා.
ඉදිරි වැඩකටයුතු ගැනත් කතා කරමු?
මේ දිනවල ප්රියන්ත කොළඹගේ මහතාගේ ‘බැද්දේගම’ ටෙලි නාට්යයේ රූපගත කරනවා. ඒ වගේම ප්රියන්ත ෆර්නැන්ඩෝගේ ‘හිත් අතර හිස්තැන්’ කියලා නාට්යයක් රූපගත කිරීම් සිද්ධ වෙනවා. ඒවා ඉදිරියේදී දැක බලාගන්න පුළුවන් වෙයි.
අසිංසලා වීරහිංගේ
