ගත වූ පැය 24ට මහනුවර දිස්ත්රික්කයේ උඩදුම්බර ප්රදේශයට මි.මී 300කට වඩා වැඩි වර්ෂාපතනයක් ලැබී ඇති බව කාලගුණ විද්යා දෙපාර්තමේන්තුවේ දත්ත උපුටා දක්වමින් ආපදා කළමණාකරණ මධ්යස්ථානය අද පස්වරු 6.00ට නිකුත් කළ නිවේදනයේ දැක්වේ. Sri Lanka Latest News
ඒ අනුව උඩදුම්බර ප්රාදේශීය ලේකම් කොට්ඨාශයේ උඩදුම්බර ප්රදේශයට මි.මී 308ක වර්ෂාපතනයක් ලැබී ඇති බව වාර්තා වේ.
එමෙන්ම උඩදුම්බර ප්රාදේශීය ලේකම් කොට්ඨාශයේ පොප්පිටිය ප්රදේශයට මි.මී 234ක වර්ෂාපතනයක් ද, නුගතැන්න ප්රදේශයට මි.මී 221ක වර්ෂාපතනයක් ද, කයිකාවල ප්රදේශයට මි.මී 218ක වර්ෂාපතනයක් ද ලැබී ඇති බව සඳහන් වේ.
උඩදුම්බර නායයෑමේ මුලික ලක්ෂණ තිබෙන ස්ථාන නායයෑමේ අවදානමක් පවතින බවත්, එම ප්රදේශයේ ජීවත්වන ජනතාව අනවශ්ය ගමන් බිමන්වලින් වැළකී තමන්ගේ ජීවිත ආරක්ෂා කරගන්නා ලෙසට ද ජාතික ගොඩනැඟිලි පර්යේෂණ සංවිධානය ඉල්ලීමක් කරයි.
එහි භූ විද්යාඥ, වසන්ත සේනාධීර මහතා පවසා සිටියේ, මෙම වැසි සහිත තත්ත්වය හේතුවෙන් මේ වනවිට මහනුවර සහ නුවරඑළිය යන දිස්ත්රික්කවල ප්රාදේශීය ලේකම් කොට්ඨාස 8කට ඉවත්වීමේ නායයෑම් රතු නිවේදන නිකුත් කළ බවය.
ඒ අනුව මහනුවර දිස්ත්රික්කයේ දොළුව, උඩදුම්බර, මැදදුම්බර හා මිනිපේ සහ නුවරඑළිය දිස්ත්රික්කයේ වලපනේ, හඟුරන්කෙත, නිල්දණ්ඩාහින්න සහ මතුරට යන ප්රාදේශීය ලේකම් කොට්ඨාසවලට මෙම රතු නිවේදනය අදාළ වේ.
පසුගිය දිනවල ලැබුණු අධික වර්ෂාව සමඟ නායයෑමේ පූර්ව ලක්ෂණ බොහෝමයක් ප්රදේශවල දක්නට ලැබෙන බැවින් නිවාස සහ ගොඩනැඟිලිවල ඉරිතැලීම් ඇත්තම් එම ස්ථානවලට නොයන ලෙස ද වසන්ත සේනාධීර මහතා ජනතාවගෙන් ඉල්ලා සිටී.
එම ස්ථාන නැවත නායයෑමක් හෝ කණ්ඩි කඩා වැටීමකට ලක්විය හැකි බැවින් එම ස්ථානයන් මඟහැර තමන්ගේ ආරක්ෂාව සලසා ගෙන ජීවිත රැකගන්නා ලෙස ද ජාතික ගොඩනැඟිලි පර්යේෂණ සංවිධානය ජනතාවට දැනුම් දෙයි.
