ඉන්දියාවේ ජාතික ආරක්ෂක උපදේශක පසුගියදා ඉන්දියාවේ අසල්වැසියන්ට හිතන්න ප්රකාශයක් කළේය. එනම්, දුර්වල රාජ්ය පාලනය නිසා ජනතා නැගිටීම් ඇතිවී බංග්ලාදේශයේ, නේපාලයේ සහ ශ්රී ලංකාවේ ආණ්ඩු මාරුවීම් සිදුවූ බවය. ඔහු කී ප්රකාශය ඇත්තය. මේ ජනතා නැගිටීම් ශ්රී ලංකාවේ, බංග්ලාදේශයේ, නේපාලයේ පමණක් නොව පාකිස්තාන අගමැති ඉම්රාන් ඛාන්ට එරෙහිවද ඇතිවිය. ඒ නැගිටීම් සුළඟ ඉන්දියාවට පමණක් හැමුවේ නැත. එයට හේතුව ඉන්දියාවේ ආණ්ඩු පාලනයය. ඒ නැගිටීම් රැල්ල ඉන්දියාවට හැමුවේ නැති වුණත් රැල්ලට බයවූ රාජ්ය නායකයන් ඉන්දියාවෙන් දේශපාලන රැකවරණ ඉල්ලීමෙන් ඉන්දියාවත් අර්බුදයකට ලක්විය. ජනතා නැගිටීම් හමුවේ පළමුව දේශපාලන රැකවරණ ඉල්ලුවේ ශ්රී ලංකාවේ ජනාධිපති ගෝඨාභය රාජපක්ෂය. Sri Lanka Latest News
පසුව ගෝඨාභය මාලදිවයිනට ආරක්ෂාව පතා ගිය විට ඔහු මාලදිවයිනට පැනයෑමේ සැලසුම ක්රියාත්මක කළේ ඉන්දීය මැදිහත්වීමෙන් යැයි විදේශ මාධ්ය වාර්තා කළ විට ලංකාවේ ඉන්දීය මහකොමසාරිස් කාර්යාලය එය ප්රතික්ෂේප කළේය. එහෙත් බංග්ලාදේශයේ හිටපු අගමැතිනි ෂෙයික් හසීනාට එරෙහිව ජනතාව නැගී සිටි විට ඇය ඉන්දියාවේ ආරක්ෂාව පැතුවාය. ඉන්දියාව ඇයට ආරක්ෂාව දුන්නේ ඇය මෝදිගේ සමීප මිතුරියක් වූ නිසාය. ඇයට ආරක්ෂාව දීම නිසා ඉන්දියාව සහ බංග්ලාදේශයේ අන්තර් පාලන ආණ්ඩුව අතර අර්බුද ඇතිවුණත් ඉන්දියාව ඇයට රැකවරණය දුන්නේය. දැන් බංග්ලාදේශ අධිකරණය හිටපු අගමැතිනියට මනුෂ්යත්වයට එරෙහි අපරාධ චෝදනා සඳහා මරණ දඬුවම නියම කර තිබේ. බංග්ලාදේශ ආණ්ඩුව බංග්ලාදේශය සහ ඉන්දියාව අතර අස්සන් කොට ඇති උදර්පන ගිවිසුම අනුව ඇයව බංග්ලාදේශයට භාරදෙන ලෙස ඉල්ලීමක් කර තිබේ. එම ඉල්ලීම නිසා ඉන්දියාව සහ බංග්ලාදේශය අතර සබඳතා අර්බුදයකට ලක්ව තිබේ.
1980 දශකයේ ඉන්දිරා ගාන්ධි ආණ්ඩුවද ප්රභාකරන් ඇතුළු ලංකාවේ දෙමළ සන්නද්ධ කණ්ඩායම්වලට රැකවරණ දීමෙන් ලංකාව සහ ඉන්දියාව අතර සබඳතා පලුදු විය. ඉන්දිරා ගාන්ධි එලෙස රැකවරණ දුන්නේ ලංකාවේ ජේ.ආර්.ගේ ආණ්ඩුවේ ඇමෙරිකානු ගැති විදේශ ප්රතිපත්තියටත් වඩා ලංකාවේ ශ්රීලනිප නායිකා බණ්ඩාරනායක මහත්මිය සහ ඇයත් අතර තිබුණු පෞද්ගලික මිතුරුකම නිසාය. ජේ.ආර්.ගේ ආණ්ඩුව ඇයගේ ප්රජා අයිතිය අහෝසි කරන්න යද්දී ඉන්දිරා ගාන්ධි එසේ නොකරන ලෙස ජේ.ආර්.ගේ ආණ්ඩුවෙන් ඉල්ලීමක් කළාය. ජේ.ආර්. එය නොසලකා හැරීම නිසා ඇයගේ සිත රිදුණි. ඉන් පසු බණ්ඩාරනායක මහත්මිය ජේ.ආර්.ගේ ආණ්ඩුවේ ඇමෙරිකානු ගැති ප්රතිපත්තිය ගැන කේළාම් කියා ඉන්දිරාව ඇවිස්සුවාය.
අසල්වැසි රාජ්ය ප්රතිපත්තිය පසුපසට දමා ඉන්දියාව අවස්ථා දෙකකදී ඉන්දියාවට හිතවත් දකුණු ආසියාවේ කාන්තා අගමැතිවරියන් දෙදෙනෙක් ආරක්ෂා කළේ එලෙසය.
