සිය සැමියාගේ මෘත දේහය නිවසේ තිබියදීම බිරිය සිය දරුවන්ට වස පෙවූ පුවතක් පසුගියදා අසන්නට ලැබුණා. මේ සිදුවීම වාර්තා වුණේ උඩුදුම්බර දඹගහපිටිය ප්රදේශයෙන්. දරුවන්ව මෙලොවට බිහිකළ අත්දෙකෙන්ම තම දරුවන්ට වස දෙන්න අම්මෙකුට පුළුවන්ද? ඇයි අම්මා කෙනෙක් තමන්ගේ දරුවන්ට එහෙම අපරාධයක් කළේ? මොකද්ද හේතුව…?Sri Lanka Latest News
එම කාන්තාව කිරිවලට වස විස මිශ්ර කරලා දරුවන්ට බොන්න දී තිබුණා. වෙනදා අම්මා දෙන කිරිවලට වැඩිය මේ කිරිවල තිත්ත රසක් දරුවන්ට දැනුණා. ඒ නිසා කිරි පානය කිරීම ප්රතික්ෂේප කරන්නට දරුවන් කටයුතු කර තිබුණා. දරුවන් කිරි බීම ප්රතික්ෂේප කළත් ඒ ඉතිරි කිරි සියල්ලම මේ මව විසින් පානය කර තිබුණා. පසුව මෙම විනාශය දැනගත් අසල්වැසියන් දරුවන් තිදෙනා සහ මව උඩුදුම්බර ප්රාදේශීය රෝහලට කඩිනමින් ඇතුළත් කරන්නට වුණා. දරුවන් පවසන්නේ තමන්ගේ අම්මා කිරිවලට තිත්ත රස දෙයක් මිශ්ර කර දී ඇති බවයි. රෝහලට රැගෙන යන විටත් මේ මව මෙලොව හැරගොස් තිබුණා.
‘මල්ලිලා හිටියේ ඇඳේ නිදාගෙන. මමත් හිටියේ ඇඳේ නිදාගෙනයි. මං නිදාගෙන ඉද්දි අම්මා ඇවිල්ලා ඇහැරෙව්වා. කෝප්පෙක තිබ්බ කිරි අම්මා හැන්දකින් මට පෙව්වා. මම ඒවා කටෙන් එළියට දැම්මා පිටි නෙවෙයි කියලා. ඊට පස්සේ අම්මා ඔක්කොම ටික බීලා ඇඳට වැටුණා…’
උඩුදුම්බර හදිසි මරණ පරීක්ෂක ගාමිණී බස්නායක මහතා පැවැත්වූ මරණ පරීක්ෂණයේදී සාක්ෂි ලබාදෙමින් මියගිය කාන්තාවගේ වැඩිමහල් දරුවා වන 12 හැවිරිදි ලක්ෂිත බස්නායක එසේ පවසා තිබුණා. ‘තාත්තා මැරුණු නිසා පුතාලාව හදාගන්න බැහැ’ යනුවෙන් මව පැවැසූ බවද එහිදී එම දරුවා පවසා තිබුණා.
මේ දරුවන් තිදෙනාම තැලසීමියා රෝගයෙන් පෙළෙන බවයි වෛද්යවරුන් පවසන්නේ. දරුවන්ගේ පියා ඊට දින දෙකකට පෙර මියගියේද තැලසීමියා රෝගී තත්ත්වය උත්සන්න වීමෙනි. සිය සැමියාගේ මෘත දේහය නිවසේ තිබියදීම මෙම 34 හැවිරිදි කාන්තාව දරුවන්ටද වස පොවා තමන්ද වස පානය කර තිබුණා. ඒ තම රෝගී දරුවන් ජීවත් කරවන්නට තමාට අපහසු බව පවසමිනි.
දරුවන් තිදෙනා අවුරුදු 5, 9 සහ 12 යන වයස්වල පසුවනවා. මියගිය කාන්තාවගේ සහෝදරිය පවසා සිටියේ ‘අපේ නංගිට මානසික රෝගයක් තිබුණා…’ යනුවෙනි.
මේ දරුවන්ගේ පියාගේ අවසන් කටයුතු නියමිත දිනට පසු දින සිදුකිරීමට යොදාගත්තේද මෙම මවගේ අවසන් කටයුතු සමග සිදුකිරීමටයි. පසුගිය 20 වැනිදා මොවුන් දෙදෙනාගේ අවසන් කටයුතු එකම ස්ථානයක සිදුකෙරුණා.
මිනිස්සුන්ට ප්රශ්න තියෙනවා. ඒත් ඒවා සාධාරණීකරණය කරන්නට අපට බැහැ. නමුත් මේ ප්රශ්නවලට පිළිතුර ජීවිතයෙන් පලායාම නම් නෙවෙයි. තවත් කෙනකුගේ ජීවිතයක් පැහැර ගන්නට කාටවත් අයිතියක් නැහැ. අම්මා කෙනෙක් දරුවෙක් මේ ලෝකෙට බිහිකරන්නේ දහසක් දුක් කම්කටොලු විඳලා බව ඇත්ත. එහෙමයි කියලා තමන්ගේ දරුවාගේ ජීවිතය පැහැර ගන්න කාටවත් අයිතියක් නැහැ. දරුවන් බලාපොරොත්තු වන ආදරය සෙනෙහස මවුපියන්ගෙන් නොලැබෙන විට දරුවන් මානසිකව බිඳවැටීම වැළැක්විය නොහැකිය. මේ නිසා දරුවන් ගැටලු ගණනාවකට අනාගතයේ දී මුහුණ දෙනු ලබයි.
මනෝ වෛද්ය වින්ද්යා විජයබණ්ඩාර මහත්මිය මේ සිදුවීම පිළිබඳ අදහස් දක්වමින් පවසා සිටියේ මෙවැන්නකි.
‘අපි කාටත් ජීවිතයේ ප්රශ්න ගොඩකට මුහුණ දෙන්න වෙනවා. අපිට ජීවත් වුණා ඇති, මැරුණා නම් හොඳයි වගේ සිතුවිලි එන්න පුළුවන්. එහෙම සිතුවිලි නැවත නැවත එනවා නම් එයින් ඇඟවෙන්නේ ඔබට උදව් අවශ්ය බවයි. ඔබට කතාකරන්න පුළුවන් 1926 මානසික සෞඛ්ය උපකාරක සේවය පැය 24 පුරාම ක්රියාත්මකයි. ඔබට උදව් ගන්න පුළුවන් තැනක් අපි හොයලා දෙන්නම්…’
මියගිය කාන්තාවගේ ඥාතියෙක් පවසා සිටියේ මෙවැන්නකි.
‘මේ නැතිවෙලා ඉන්නේ අපේ බාප්පාගේ දුව, මේ දරුවන්ටත් අසනීපයක් තිබුණා. පුළුවන් කෙනෙක් ඉන්නවා නම් මේ දරුවන් තිදෙනාට උපකාරයක් කරන්න…’
දරුවන්ගේ සීයා වන හීන් බණ්ඩා මහතා මෙවැනි ඉල්ලීමක් ජනතාවගෙන් සිදුකර සිටියේය.
‘අම්මා තාත්තා නැතිව තනිවුණු මේ පුංචි පැටවුන්ගේ ජීවිත රැකගන්නට අපිට දැඩි වෙහෙසක් දරන්නට සිදුව තිබෙනවා. ඒ නිසා දරුවන් රැකගන්න ප්රතිකාර කරන්න කවුරු හරි උදව් කරනවා නම් ඒක ලොකු පිනක්…’
මේ දරු පවුල වෙනුවෙන් යම් උපකාරයක් කිරීමට ඔබ බලාපොරොත්තු වන්නේ නම් ඔවුන්ව සම්බන්ධ කරගත හැකි දුරකතන අංකයක් මෙලෙස සඳහන් කරමු. උඩුදුම්බර ප්රාදේශීය ප්රවෘත්ති වාර්තාකරුවකු වන හසලක නන්දන මහතාව 0759356506 අංකයෙන් අමතා, මේ දරු පවුල සම්බන්ධ කරගැනීමට ඒ අනුව ඔබට හැකියාව ඇත.
මේ මල් කැකුළුවලට හෙට දකින්නට අත දෙන්නට හැකියාවක් තිබේ නම් ඒක මහඟු පුණ්ය කර්මයක් වෙයි.
තැලසීමියා රෝගී තත්ත්වය ජානමය හේතු මත මතුවන රෝගී තත්ත්වයක් බවයි වෛද්යවරු පවසන්නේ. මෙම රෝගීන්ගේ ශරීරයේ හිමෝග්ලොබින් වැඩිවීමයි සිදුවන්නේ.
මේ අම්මාටත් තිබුණා හිත හදාගෙන තමන්ගේ දරුවන් පුළුවන් විදියට ජීවත් කරවන්න. නමුත් ඇය එහෙම කළේ නැහැ. අපි ජීවිතයේ කුඩා කාලයේ සිටම කඩාවැටීම් විඳ දරාගැනීමට දරුවන්ට ඉගැන්විය යුතුයි. එහෙම නොවුණු තැන මෙවැනි ඛේදනීය තත්ත්වයන්ට මුහුණ දෙන්නට සිදුවෙනවා.
කොයි තරම් ප්රශ්න තිබුණත් අවසානයේදී සිදුවුණේ දරුවන්ට අම්මෙක් නැතිවුණු එක විතරයි. කවුරු හිටියත් අම්මකුගේ ආදරය රැකවරණය දෙන්න ඒ කාටවත් බැහැ. මේ අම්මා නිකමට හරි කල්පනා කළා නම් මම මැරිලා දරුවෝ මේ ලෝකෙට තනිවෙලා දුකට පත්වෙනවා කියලා, ඇය අදටත් මේ දරුවන් වෙනුවෙන් ජීවත් වෙන්නට ඉඩ තිබුණා.
පවුලක් රකින සතරවරම් දෙවියන් වන්නේ ආදරය, කරුණාව, දයාව සහ ඉවසීම කියන කාරණායි. දරුවකුට සෑම විටම හොඳ මිතුරෙක් මිතුරියක් වී දරුවන්ට යහපත් අනාගතයක් උදාකර දීම හැම මවුපියකුගේම වගකීමක් මෙන්ම යුතුකමක් කොට සැලකිය යුතුය.
නිලන්ති රේණුකා
