පසුගිය ආණ්ඩුව සමයේ වසංගතයක් ලෙස පැතිර ගොස් තිබෙන පාතාලය සහ මත්ද්රව්ය උවදුර නැති කිරිමට වහාම පියවර ගන්නා බව ශ්රී ලංකා පොදුජන පෙරමුණේ නායක අග්රාමාත්ය මහින්ද රාජපක්ෂ මහතා පවසයි.
ඒ මහතා මේ බව සඳහන් කළේ ඊයේ (10) පෙරවරුවේ හොරණ නගරයේ පැවති ජන හමුවක් අමතමිනි.
පසුගිය රජය සමයේ ඉතා දරුණු ලෙස පාතාලය සහ මත්ද්රව්ය උවදුර දිවයින පුරා ව්යාප්ත වීම හේතුවෙන් මෙරට තරුණ පරපුර සහ රටේ ජනතාව බරපතල අපහසුතාවයකට ලක් වූ බව අග්රාමාත්ය මහින්ද රාජපක්ෂ මහතා මෙහිදී පෙන්වා දුන්නේය.
එම ව්යාප්ත වීම කොයිතරම් ද යත් මත්ද්රව්ය අත්අඩංගුවට ගැනීම සඳහා යොදවා තිබෙන ආයතනයම මත්ද්රව්ය ජාවාරම්කරුවන්ගෙන් පිරීගොස් ඇති බව දැන් සිදුකෙරෙන පරීක්ෂණ වලින් අනාවරණය වෙමින් පවතින බවද අග්රාමාත්යවරයා මෙහිදී සඳහන් කළේය.
වර්තමානය වන විට බන්ධනාගාර ඇතුළත සිට සමාජය තුළ මත්ද්රව්ය සහ පාතාල ක්රියාකාරකම් මෙහෙයවන දරුණු අවදානම් තත්ත්වයක් බිහි වී ඇති බැවින් එම තත්ත්වය නැති කිරීම සඳහා ජනාධිපතිවරයා පළමු පියවර තබා ඇත.
ජනාධිපතිවරයා ගෙන යන මෙම වැඩ පිළිවෙළ සාර්ථක කර ගැනීම සඳහා ඉදිරි රජයක් පිහිටුවීමෙන් අනතුරුව සම්පූර්ණ සහාය ලබාදෙන බව අවධාරණය කළ අග්රාමාත්යවරයා පාතාල ක්රියාකාරකම් සහ මත්දුව්ය ජාවාරම සම්බන්ධයෙන් පරීක්ෂණ දැඩි කොට ඒ පිළිබඳව සමාජයට අනාවරණය කර වැරදිකරුවන්ට දඬුවම් දීමට තමන් පසුබට නොවන බව සඳහන් කළේය.
අලුත් රටක් ඇති බිහි කිරීම සඳහා ජනාධිපති වරයා ගෙන තිබෙන තීන්දුව අනුව යමින් යහපත් රාජ්යයක් බිහි කිරීම වෙනුවෙන් තම යුතුකම ඉටු කරන්නැයි අග්රාමාත්යවරයා ජනතාවගෙන් ඉල්ලා සිටී.
