පසුගියදා පාර්ලිමේන්තුවේදී අමාත්ය බිමල් රත්නායක මහතා, සමගි ජන බලවේගයේ පාර්ලිමේන්තු මන්ත්රී රෝහිණී කවිරත්න මහත්මියට එල්ල කළ චෝදනාවලට කවිරත්න මහත්මිය ප්රතිචාර දැක්වූයේ මෙලෙසයි. Sri Lanka Latest News
මූලාසනයේ ගරු මන්ත්රීතුමනි. වරප්රසාද ප්රශ්නය නැගීමට ප්රථමයෙන් මේ වෙලාවේ මම අවස්ථාවක් කරගන්නවා විනාඩියක කාලයක්. විශේෂයෙන්ම ඊයේ මගේ ප්රකාශය තුළදී ‘ඔබතුමා කට වහගන්න’ යනුවෙන් කරන ලද ප්රකාශය තුළ කතානායක ධුරයට සහ එම භූමිකාවට යම්කිසි අපහාසයක් සිද්ධ වුණා නම් මම ඒක ඉවත් කරගන්නවා කියන එක මේ වෙලාවේ ප්රකාශ කරනවා. අන්න ඒක තමයි එතුමා මගේ හැදියාව කොහෙද කියලා අහපු එකට උත්තරේ.
ඒ ප්රශ්නය ඒ විදිහට මගේ කටින් එළියට යන්න හේතු වුණේ මධ්යස්ථව සිටිය යුතු භූමිකාවක් අන්තවාදීව කටයුතු කරනකොට එවැනි ප්රකාශයක් මතුවීම මම හිතන්නේ ඒක නිතැතින්ම සිද්ධ වෙනවා. ඒ කෙසේ වෙතත් එය මම මේ වෙලාවේ ඉවත් කරගන්නවා.
ගරු කතානායකතුමනි, මේ ලිපිය ආමන්ත්රණය වෙන්නේ එහෙම. මූලාසනයේ ගරු මන්ත්රීතුමනි, පාර්ලිමේන්තු බලතල හා වරප්රසාද පනතේ උපලේඛන ‘ආ’ කොටසේ හතර වගන්තිය යටතේ වරප්රසාද කඩවීම සම්බන්ධවයි.
ශ්රී දළදා මාලිගාවට එල්ල වූ ත්රස්ත ප්රහාරය පිළිබඳ 2025 හතයි 23 දින මා විසින් යොමුකළ ප්රශ්නයට අදාළව, අතුරු ප්රශ්නයක් ලෙස ශ්රී ලංකා ශ්රී දළදා මාලිගාව ඉදිරියෙන් වසා ඇති මාර්ගය විවෘත කිරීමට ඇති හැකියාව පිළිබඳ විමසා සිටි අවස්ථාවේදී, එයට බාධා කරමින් ගරු සභානායකතුමා සිදුකළ ප්රකාශය තුළ මා වෙත ආරෝපිත චෝදනාවක් එල්ල වී ඇත.
මම මේ ප්රකාශය අද කරනු ලබන්නේ මේ පාර්ලිමේන්තුව නියෝජනය කරන සියලු දූලා වෙනුවෙන්, ඒ වගේම 22ක් වූ මන්ත්රීවරියන් වෙනුවෙන්. එහිදී ගරු සභානායකතුමා ප්රකාශ කළේ, ‘කොමිසමේ අධ්යක්ෂ ජනරාල්තුමාට කිව්වා මාතලේ මිනී වළවල්වල 140 ගානක් මිනී ඇටසැකිලි හම්බවෙලා තියෙනවා. ඒ මිනීමරුවන්ගේ දූලා තමයි මෙතැන ඉන්නේ. ඒ නිසා අපි ඒ පිළිබඳ පරීක්ෂණ කරනවා. අද මෙතැන ඉන්නේ පෞද්ගලික වධකාගාර හිමියෝ සමහරු.’
ගරු කතානායකතුමනි, ‘87, 88, 89 එක්සත් ජාතික පක්ෂයේ හිටපු මන්ත්රීලා, ඇමැතිලා පෞද්ගලික වධකාගාර තියන් හිටියා කියන එක අමුතු දෙයක්ද’ ලෙසයි.
මේ ප්රකාශය තුළ සඳහන් මාතලේ දිස්ත්රික්කය නියෝජනය කළ මන්ත්රීවරයෙකුගේ දියණියක ලෙස මේ මොහොතේ මේ සභාව නියෝජනය කරන්නේ මම පමණයි. ඒ වගේම විපක්ෂයේ හිටියේ මමත්, චමින්ද්රානි කිරිඇල්ල මන්ත්රීතුමියත් පමණයි. එබැවින් මෙම ප්රකාශය ඍජුවම මා ඉලක්ක කොට සිදුකළ එකකි. මෙම ප්රකාශය සමාජයේ වෛරී හැඟීමක් මා වෙත එල්ල කිරීමට දරන ලැබූ දේශපාලනික ප්රකාශයක් ලෙස මම මේ වෙලාවේ දකිනවා. ඒ වගේම ඒක හෙළාදකිනවා.
මගේ පියා කිසිම විටක මිනිසුන් ඝාතනය කරපු කෙනෙක් නෙවෙයි. එතුමා මිනිස්සු ජීවත් කරපු අයෙකු ලෙස මුළු මාතලේ දිස්ත්රික්කයම, ඒ වගේම මුළු ලග්ගලම, ඒ වගේම ලංකාවම දන්නවා. ඒ වගේම මගේ උප්පැන්න සහතිකයේ නම තියෙන පියාගේ ජානමයි මගේ ඇඟේ දුවන්නේ කියන එක මම මේ වෙලාවේ කියනවා. ඕනෙ නම් ඒ ප්රකාශය කරපු ඔබතුමායි අපි ජාන පරීක්ෂණයක් කරගමු.
මෙවැනි ප්රකාශ මගේ පෞද්ගලික ආරක්ෂාවට දැඩි තර්ජනයක් ඇති විය හැකි අතර, පාර්ලිමේන්තු මන්ත්රීවරියක ලෙස මහජන කටයුතුවලට නිරත වීමද සීමාකෙරෙනු ඇත. එසේම මාගේ ආරක්ෂාව සම්බන්ධයෙන් මම දිගින් දිගටම අදාළ ආයතනවලට දැනුම්දී තිබුණා. උදාහරණයක් කිව්වොත් මම පොලිස්පතිතුමාට දැනුම් දීලා තියෙනවා. ඒ වගේම මාතලේ ජ්යෙෂ්ඨ පොලිස් අධිකාරී කාර්යාලය තුළ මම පැමිණිල්ලක් කරලා තියෙනවා. මේ වෙනතෙක් ඒ සම්බන්ධයෙන් කිසිම ක්රියාමාර්ගයක් නොගෙන ඇති වාතාවරණයක් තුළ, රජයේ වගකිවයුතු නිලයක් දරන්නෙක් සිදුකරන මෙම ප්රකාශය මගේ පෞද්ගලික ආරක්ෂාව තවදුරටත් අනතුරේ හෙළයි.
එමෙන්ම දිගින් දිගටම මේ ගරු සභාව තුළ මා හට මුහුණ දීමට සිදුවන අවාසනාවන්ත සිදුවීම් පිළිබඳ ගරු කතානායකවරයාගේ අවධානය යොමුකරනු ලැබුව ද ඒ සඳහා සාධනීය විසඳුමක් ලබාදීමට පියවර නොගැනීම බරපතළ කනගාටුවට කරුණක්. මේ සභාවේ කාන්තා මන්ත්රීවරියක් පිළිබඳ සිදුකරනු ලබන ප්රකාශ තුළින් සිදුවන ගෞරවයට හානිකර දේ වළක්වා ගැනීමට පියවර ගැනීම ඔබතුමාගේ වගකීම බව මම අවධාරණය කරමි.
එබැවින් 2025.07.23 වැනි දින පාර්ලිමේන්තුවේදී ගරු සභානායකතුමා කළ ප්රකාශය මාගේ වරප්රසාද උල්ලංඝනය කිරීමක් බැවින්, මෙම සිදුවීම පාර්ලිමේන්තුවේ වරප්රසාද කමිටුවට යොමුකරන මෙන් ඉල්ලා සිටිමි. එමෙන්ම එතුමා කළ ප්රකාශය ඉල්ලා අස්කර ගන්නා ලෙසත්, එම ප්රකාශය හැන්සාඩ් වාර්තාවෙන් ඉවත් කිරීමට පියවර ගන්නා ලෙසටත්, අදාළ නියෝගයක් ලබාදෙන ලෙස ඉල්ලා සිටින අතර, එතුමා සඳහන් කරනු ලබන සමූහ මිනීවළවල් පිළිබඳ විධිමත් පරීක්ෂණයක් පවත්වා වගඋත්තරකරුවන් නීතිය හමුවට රැගෙන ඒමට ක්රියා කරන ලෙසත් මම යෝජනා කරමි. එසේ නොකොට මේ සිදුවීම මගේ දේශපාලනය විනාශ කිරීම උදෙසා භාවිත නොකරන ලෙසත් වැඩිදුරටත් සඳහන් කරනු කැමැත්තෙමි. රෝහිණී කුමාරි විජේරත්න, පාර්ලිමේන්තු මන්ත්රී.
ඒ වගේම මූලාසනයේ ගරු මන්ත්රීතුමනි, මම ඉල්ලීමක් කරනවා 91 ‘ඌ’ වගන්තිය යටතේ මේ සිදුවීම සම්බන්ධයෙන් විමර්ශනය කරන්නට විශේෂ කමිටුවක් පත්කර දෙන්න කියලත් මම මේ වෙලාවේ ගරු කතානායකතුමාගෙන් ඉල්ලා සිටිනවා.
විපක්ෂ නායක සජිත් ප්රේමදාස
මම පොඩි වෙලාවක් ගන්නවා මේ කාරණාව ඉදිරිපත් කරන්න. මේ රෝහිණී කුමාරි විජේරත්න මැතිනිය, කෘතහස්ත සමාජ සේවිකාවක්, ඒ වගේම මහජන නියෝජිතවරියක් හැටියට මේ සභාව තුළත්, ඉන් පිටතත් විශාල සේවාවක් ඉෂ්ට කරනවා. ගුරුවරියක් හැටියට අධ්යාපන ක්ෂේත්රය කේන්ද්ර කරගෙන සමස්ත කාන්තාවන්ගේ මානව, දේශපාලනික, සිවිල්, සමාජයීය, ආර්ථික, සංස්කෘතික, ආගමික, මේ සියලු අයිතිවාසිකම් සුරක්ෂා කරන්නට ඉමහත් කාර්යභාරයක් ඉෂ්ට සිද්ධ කරනවා.
අපි දැක්ක දෙයක් තමයි, පුන පුනාම මේ සභාව තුළ එතුමියවම ඉලක්ක කරගෙන, එතුමියගේ චරිතය ඝාතනය කරන්නට, එතුමියට නිර්දය ලෙස විවේචන ඉදිරිපත් කරමින්, එතුමියගේ ඒ ගමන් මාර්ගය අවහිර කරන්නට බොහෝ ක්රියාදාමයන් ඉෂ්ට සිද්ධ වෙනවා. ඉතින් අපි මේ රටේ බහුතරයක් වන කාන්තාවන්ගේ අයිතිවාසිකම් ආරක්ෂා කරනවයි කියලා කියනවා නම්, ඒක වචනයේ පරිසමාප්ත අර්ථයෙන්ම ප්රායෝගිකව ක්රියාත්මක කිරීම අපේ යුතුකමක්. ඒ වගේම විශේෂයෙන්ම එතුමියවම ඉලක්ක කරගෙන, එතුමිය දඩයම් කරන්නට දරන මේ උත්සාහය පිළිබඳ අපි අපේ බලවත් අප්රසාදය පළකරනවා. ඒ වගේම එතුමියගේ ආරක්ෂාව පිළිබඳ, විශේෂයෙන්ම කතානායකතුමා වගකියන්නට ඕනෙ. විශේෂයෙන්ම එතුමියගේ ආරක්ෂාව ශක්තිමත් කරන්නට විශේෂිත වූ වැඩපිළිවෙළක් ක්රියාත්මක කරන්නට ඕනෙ. ඒ වගේම එතුමියගේ දයාබර පියාණන්, මම මතක් කරන්නට කැමැතියි, පෞද්ගලික මන්ත්රී යෝජනාවක් හරහා මේ රටේ ගොවි විශ්රාම වැටුප් ක්රමය ක්රියාත්මක කිරීම සඳහා එයට ශක්තිය ලබා දුන්නු, ඒ වැඩපිළිවෙළේ නිර්මාතෘවරයා. ඒ නිසා මම තරයේ විශ්වාස කරනවා, ඒ දයාබර පියාණන් ඒ ඉෂ්ට සිද්ධ කරපු ඒ දැවැන්ත සේවාව මුළු ලග්ගල පමණක් නෙවෙයි, මාතලේ දිස්ත්රික්කයේ ජනතාවත් හොඳින් දන්නවා. ඒ නිසා විශේෂයෙන්ම තවදුරටත් එතුමියගෙත්, එතුමියගේ දයාබර පියාණන්ගෙත් මේ චරිත ඝාතනය කරන, මේ ඉලක්කගත, ඉතාමත්ම නිර්දය, පහත් ක්රියාවලිය වළක්වන්න කියන එක මම මේ අවස්ථාවේ යෝජනා කරනවා.
Voice Tube
