යාපනයේ අරියාලේ චෙම්මනි සිත්තුපාත්තු සමූහ මිනීවළේ කැණීම් කටයුතු වලින් ඊයේ (26) දා මිනිස් අස්ථි කොටස් 11ක් හමු වීමත් සමගම එම සමුහ මිනී වළෙන් හමු වූ මිනිස් ඇටසැකිළි සංඛ්යාව 101 ක් දක්වා ඉහළ ගොස් තිබෙනවා.Sri Lanka Latest News
පෙබරවාරි 20 වනදා සුසාන භූමිය සංවර්ධනය කිරීමේදී මෙම අස්ථි කොටස් පළමු වරට හමුවූ අතර, එය දුටු පිරිස පොලිසිය දැනුවත් කර තිබුණා.
පසුව, මහෙස්ත්රාත් අධිකරණයෙන් ලබාගත් නියෝග මත විශේෂඥයන්ගේ අධීක්ෂණය යටතේ කැනීම් ආරම්භ කර තිබෙනවා.
කැනීම්වලදී හමුවූ භාණ්ඩ අතර රබර් බෝනික්කෙකු, සපත්තු යුගලක්, කුඩා දරුවන් සඳහා වූ වළලු යුවලක්, කිරි බෝතලයක්, පාසල් බෑගයක් සහ මිනිස් ඇඳුම් කොටස් ඇතුළු ද්රව්ය 46ක් තිබී ඇති බවට තොරතුරු වාර්තා වී තිබෙනවා.
මෙම කැණීම්වලින් හමූ කුඩා දරුවන්ට අයත් ද්රව්යවලින්, කුඩා දරුවන්ද මෙම සමූහ මිනීවළ තුළ මිහිදන් කර ඇති බවට ද සැකයක් හටගෙන තිබෙනවා.
මෙම කැණීම් අතරතුර ඊයේ (26) මිනී පෙට්ටියක්ද එම සමූහ මිනී වලෙන් හමු වී ඇති බවට වාර්තා වෙනවා.
කැණීම් කරන ස්ථානය සුසාන භූමියකට අයත් භූමියක් නිසා, එම සුසාන භූමි සීමාවෙන් ඔබ්බෙහි වළ දමන ලද මෘත දේහයක මිනී පෙට්ටියක් විය හැකි බවට කැණීම් නිලධාරීන් විශ්වාස කරන්නේ.
කැණීම් කටයුතු පහසු වීම පිණිස මේ වන විට චෙම්මනි සමූහ මිනීවළ අංක 1 හා 2 වශයෙන් කොටස් දෙකකට බෙදා තිබෙනවා.
චෙම්මනි මිනීවළ, උතුරු පළාතේ හමුවූ දෙවැනි විශාලතම සමූහ මිනීවළ බවට මේ වනවිට පත්ව තිබෙනවා.
