පාසලක විෂයන් නවයම එකම ගුරුවරයෙක්ට උගන්වන්න පුළුවන්ද? අද අපි ඔබට කියන මේ කතාව ඇතුළේ තියෙන්නේ එහෙම හපන්කමක් ගැන. ඒ වගේ ගුරුවරුත් අපේ රටට ආඩම්බරයක්. පසුගියදා සාමාන්ය පෙළ ප්රතිඵල නිකුත් වීමත් සමගයි මේ කතාව අපිට අසන්න ලැබුණේ. ඒ, හුන්නස්ගිරිය ගලමුදුන පාසලෙන්. ඒ පාසලේ සාමාන්ය පෙළ විභාගයට මුහුණදුන් සියලු දරුවන් විශිෂ්ට අයුරින් විභාගය සමත් වෙලා තිබුණා. මෙහි විශේෂත්වය වන්නේ ඒ සියලු දරුවන්ට එකම ගුරු පියෙකු විසින් විෂයන් 9ටම අදාළ අධ්යාපනය ලබාදී තිබීමයි. විභාගයට තවත් ඉතිරිව තිබුණේ ඉතා කෙටි කාලයක් වුණත් ඔහු ඒ වගකීම ඉෂ්ට කළා. ගුරුවරයා කියන වෘත්තියට සැබෑම අර්ථයක් එක්කළ මේ ගුරු පියාගේ නම ජනක ධනුද්ධර.
ජනක ධනුද්ධර ගුරුතුමාගේ උපන් ගම වුණේ මිහින්තලය. ඔහුට මධ්යම පළාතේ සිට මාරුවක් අවශ්යවී තිබුණා. ඒ අනුව ඔහු මාරුව ඉල්ලුම් කළ අවස්ථාවේ ඔහුට ලැබී තිබුණේ එකම එක පාසලයි. ඒ, හුන්නස්ගිරිය ගලමුදුන කනිටු විදුහල පමණයි. මීට පෙර මෙවැනි දුෂ්කර පළාතක් මේ ගුරුතුමා දැකලා තිබුණේ නැහැ. අනුරාධපුර මිහින්තලේ දුෂ්කර කිව්වාට එහෙම දුෂ්කරතාවයක් නැති බවයි එතුමා නම් පවසන්නේ. ඒ වුණාට මේ ගලමුදුන පාසලේ දරුවන් විඳින දුක බලන්න බැරිව ගිය නිසාම මෙම පත්වීම ඔහු භාරගෙන තිබුණා.
මේ ගුරුතුමාට ඕනෑම අභියෝගයකට මුහුණ දෙන්න පුළුවන් චිත්ත ධෛර්යක් තිබුණා. පාසලේ දරුවන් වෙනුවෙන් සේවය කරන්න ඔහුට වුවමනාව තිබුණා. ඒ නිසාම මාරුවක් අරගෙන ආවා. මේ ගලමුදුන පාසලේ දුෂ්කරතාව දැක දැකම ගුරු පත්වීම භාරගත්තා. දුක සැප සියලු දේ විඳදරා ගන්නවා කියන අධිෂ්ඨානයෙන් මේ ගුරුවරයා අභියෝගය භාර ගත්තා.
මේ පාසලේ තත්ත්වය පිළිබඳ ජනක ධනුද්ධර ගුරුතුමා පවසා සිටියේ මෙවැන්නක්.
‘මම ජීවිතේට මේ වගේ පාසලක් දැකලා තිබුණේ නැහැ. මීට කලින් මම වැඩ කළේ සෙන්ට්රල් එකක. මට මධ්යම පළාතට එන්න ඕනෙ වෙලා තිබුණා. අවුරුදු 4ක සිට මේ පළාතට ට්රාන්සර දුන්නේ නැහැ. මගේ අවුරුදු හයක සේවා කාලයෙන් පස්සේ මට මෙහාට එන්න ඕනෙ වෙලා තිබුණා. එක ඉස්කෝලයක් තියෙනවා කැමැති නම් යන්න කිව්වා. මට ඕනෙ තැනක් කමක් නැහැ මම යන්නම් කිව්වා. මේ වගේ ඉස්කෝලයක් මම ජීවිතේටවත් දැකලා තිබුණේ නැහැ. අනුරාධපුර මිහින්තලේ කිව්වාම දුෂ්කර තමයි. හැබැයි මේ පාසල වගේ දුෂ්කරතාවක් එහෙ තිබුණේ නැහැ. මම අධ්යාපන අමාත්යාංශයට ගියා, දෙපාර්තමේන්තුවට ගියා, යන්න ඕනේ හැම තැනම ගියා. ගලමුදුන කියලා සමාජ මාධ්යයෙන් දැකලා තිබුණා.’
‘මගේ යාළුවෙක් හිටියා පණ්ඩුල කියලා. එයා නාවලපිටියේ ඉස්කෝලෙක ගුරුවරයෙක්. එයත් එක්ක තමයි මුලින්ම ආවේ. මුල්ම දවසේ මගේ ඇස්වලට කඳුළු ආවා. අපි ඉන්න තැනට දවස් 04කට සැරයක් කෑම බීම අරගෙන යනවා. අපි උයාගෙන කනවා. ඒවා ගෙනියන්නේ කඳු පල්ලම් බැහැලා නැගලා ඒ තරම් කටුකයි. මම මේ ජීවිතේ ගෙවනවා. මට අවශ්ය වුණේ දරුවන්ව සාමාන්ය පෙළ විභාගයෙන් සමත් කරවන්නයි. මම ඒක කළා…’
ගුරුවරු කියන්නේ දේවත්වයෙන් සැලකිය යුතු පිරිසක්. දරුවන්ගේ අනාගතය වෙනුවෙන් තම ජීවිත කැපකළ මේ වගේ මිනිස්සු වර්තමානයේ දකින්න ලැබෙන්නේ හරිම අඩුවෙන්. එහෙත් වචනයේ පරිසමාප්ත අර්ථයෙන්ම ගුරුවරු කියන්නේ තම ජීවිතය පරදුවට තියලා දරුවන්ගේ අධ්යාපනය වෙනුවෙන් කැපවෙන පිරිසකටයි.
මේ වගේ පාසල්වලට දරුවන් එන්නේ දිළිඳුකම ජීවිතයම කරගෙන. සමහර විට එකම සුදු ඇඳුම සෝද සෝදා අඳින දරුවන් මේ පාසල්වල බොහෝ විට ඉන්නේ. ඒ දරුවන්ගේ මවුපියන්ට සිහින තිබුණත් ඒවා තමන්ගේ දරුවන්ට ඉටුකර දෙන්න ශක්තියක් ඔවුන්ට නැහැ. දරුවන්ව සුපිරි පාසල්වලට යවන්න ඔවුන්ට හැකියාවක් ඇත්තේ නැහැ. මේ දුෂ්කර පාසල්වල බොහෝ ගොඩනැගිලි හදලා තියෙන්නේ මැටි ගහලා. වහින වෙලාවට තෙමෙනවා. නිදහස් අධ්යාපනය ලබන්න මේ දුප්පත් දරුවන්ට නිදහසක් නැද්ද කියලා තමයි බලධාරීන්ගෙන් අහන්නට තියෙන්නේ. මොකද, මේත් අපේම රටේ දරුවන්. ඔවුන් දුෂ්කර ප්රදේශයක ඉපදුණා කියලා සෙසු ප්රදේශවල දරුවන්ට වගේම පහසුකම් සහිතව, දුෂ්කරතාවලින් තොරව නිසි අධ්යාපනය ලබන්න මේ දරුවන්ටත් අයිතියක් තියෙනවා.
මේ රටේ විවිධ ක්ෂේත්රවල අයට සම්මාන පිට සම්මාන දෙනවා. ඒත් මෙවැනි රත්තරන් ගුරුවරු වෙනුවෙන් සම්මාන දෙනවා අපි දකින්නේ ඉතාම කලාතුරකින්. මෙවැනි ගුරුවරුන් තව තවත් මේ රටට බිහිවිය යුතුයි. මොවුන් දිරිමත් කරන්න, ඔවුන්ගේ සේවය අගය කරන්න රජය යොමුවිය යුතුයි. හැම ගුරුවරයෙක්ම මේ වගේ දුෂ්කර යැයි සම්මත පාසල්වල දරුන්ට උගන්වන්න කැමැති වෙන්නේ නැහැ. රටක දරුවන්ගේ මුළු අනාගතයම තීරණය වෙන්නේ ගුරුවරු නිසයි. ගුරුවරුන්ට තව රැකියාවක් කරන්න බැහැ. මොකද උදේ 7.30 සිට සවස 1.30 වෙනකල් තමන්ගේ රාජකාරිය ඉටුකළාම සවස් වරුවේ ඊළඟ දවසට ලෑස්ති වෙන්න ඕනේ. ඒ නිසා ඔවුන්ට වෙනත් රැකියාවක් කරන්න කාලයක් නැහැ.
නිදහස් රැකියාවක් කරන්න කැමැති කෙනෙක් මේ වෘත්තිය කවදාවත් තෝරගන්නේ නැහැ. මුදල් හම්බ කිරීමේ පරමාර්ථයෙන් රජයේ පාසලක ගුරු පත්වීමක් ගන්නේ නැහැ. ඒ තරම් දුෂ්කර ජීවිතයක් තමයි රජයේ ගුරුවරු විඳින්නේ. ඔවුන්ටත් සිහින බලාපොරොත්තු ඇති ඕනෑ තරම්. නමුත් දරුවන්ට ඉගැන්වීමෙන් ලැබෙන මානසික තෘප්තිය වෙනත් වෘත්තියකින් ලබාගත හැකියි කියලා මම නම් හිතන්නේ නැහැ. දරුවන් විභාග සමත් වෙනකොට ගෙදර මවුපියන් හැරුණුකොට ඒ සතුට දරාගන්නේ ගුරුවරුයි.
සමහර පාසල් ගුරුවරු තමන්ගේ පාඩම් දරුවන්ට උගන්වන්නේ තමන්ගේ කාලය කැපකරලා. සවස් කාලයෙත් පාසලේ ඉඳලා උගන්වන ගුරුවරු ඕනෑ තරම් ඉන්නවා. තමන්ගේ පවුල් ජීවිතයේ අවශ්යතා දෙවැනි තැනට දාලා ඔවුන් දරුවන්ගේ ජීවිත එළිය කරන්න දවසම කැපකරනවා. මුදල් ඉපැයීම මූලික පරමාර්ථය කරගත්ත ගුරුවරයෙක් නම් බොහෝ විට තෝරාගන්නේ ටියුෂන් පන්තියයි. නමුත් මේ ජනක ධනුද්ධර ගුරුතුමා වැනි ගුරුවරුන් දරුවන් වෙනුවෙන් කරන මහා කැපකිරීමට ඔවුන්ගේ ජීවිතවල සියලු සිහින සඵල වෙන්න ඕනේ කියලා අපි ආශීර්වාද කරන්න ඕනේ. මෙවැනි ගුරුවරුන් රටට සම්පතක්.
මේ තරම් දස්කමක් දක්වමු ගලමුදුන පාසල වෙනුවෙන්, ඒ පාසලේ දරුවන් වෙනුවෙන් ඒ ජනක ධනුද්ධර ගුරුතුමා කළ සේවයට ඔහුට අනේක වාරයක් පින් සිදුවෙන්න ඕනේ. ඔහුව අගය කරන්න, ඔහුට ආශීර්වාද කරන්න, ඔහුව දිරිගන්වන්න කැමැති ඔබ වෙනුවෙන් ඔහුගේ දුරකතන අංකය අපි පහත පළකරනවා. 0715 877 596
නිලන්ති රේණුකා
