ශ්රී ලංකාවේ සංචාරක හා දේශීය ගුවන් සේවා කර්මාන්තයට නව ජීවයක් ලබාදෙමින් එහි නවතම මුලපිරීමක් ලෙස ජලයේ ගොඩබස්වන ගුවන් යානා මෙහෙයුම් සඳහා උචිත වන පරිදි කොළඹ බේරේ වැව පරිශ්රය ජලාශ්රිත ගුවන්තොටුපොළක් ලෙස යලි හඳුන්වාදීම හා එහි මෙහෙයුම් ආරම්භ කිරීම පිළිබඳ විශේෂ සාකච්ඡාවක්, ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්රාමික) ගේ ප්රධානත්වයෙන් පසුගිය බ්රහස්පතින්දා (ජූලි 3) දින ආරක්ෂක අමාත්යාංශයේදී පැවැත්විණ.Sri Lanka Latest News
Saffron Aviation (Pvt) Ltd සමාගමට අයත් “Cinnamon Air” අනු සමාගම විසින් කොළඹ නගර මධ්යයේ පිහිටි ඓතිහාසික බේරේ වැව ආශ්රිතව ගුවන් යානා මෙහෙයුම් සිදුකිරීමට බලාපොරොත්තු වන අතර, ඒ සඳහා වන ඉදිරි සැලසුම් සමාලෝචනය කිරීම සඳහා අදාළ ප්රධාන පාර්ශ්වකරුවන් එක්රැස් කිරිම මෙම සාකච්ඡාවේ ප්රධාන අරමුණක්ව තිබිණ.
ශ්රී ලංකාව තුල අභ්යන්තර ගුවන් ගමන් සේවා සපයන ආයතනයක් වන “Cinnamon Air” ආයතනය, ජලයේ පාවෙන ගුවන් යානා මෙන්ම ගොඩබිම හැසිරවිය හැකි ගුවන් යානා සේවා පිළිබඳ විශේෂඥ සමාගමක් වශයෙන් කොළඹ නගරයේ හදවත බඳු බේරේ වැවේ ජලතලය, උඩුගුවන හා ඉන් ඔබ්බට යළි සම්බන්ධ කිරීම සඳහා වැදගත් කාර්යභාරයක් ඉටු කිරීමට නියමිතය.
සාකච්ඡාව ආරම්භයේදී අදහස් දැක්වූ ආරක්ෂක ලේකම්වරයා ශ්රී ලංකාවේ සංචාරක කර්මාන්තය ශක්තිමත් කිරීමේ රජයේ පුළුල් දැක්ම පිලිබඳ කරුණු ඉස්මතු කළේය. දෙස් විදෙස් සංචාරකයින්ට මෙරට සුන්දරත්වය සියැසින් දැක බලාගනිමින් අත් විඳිය හැකි වේගවත් මාධ්යයක් ලෙස දේශීය ගුවන් සේවා කර්මාන්තය මේ අයුරින් සංවර්ධනය කිරීමේ වැදගත්කම ඔහු අවධාරණය කළේය.
බේරේ වැව ආශ්රිතව මිට පෙර සිදුකරනු ලැබූ ජලාශ්රිත ගුවන් යානා මෙහෙයුම්වල ඓතිහාසික පසුබිම, මෙම ගුවන් මෙහෙයුම් වලට අදාළ වන සමස්ත ආරක්ෂාව හා සම්බන්ධ සලකා බැලීම්, ගුවන්යානා ආරක්ෂිතව ගුවන්ගත වීමේ සහ ගොඩබෑමේ ක්රියාවලිය සහ ඇතිවිය හැකි පාරිසරික ගැටළු වගකීමෙන් යුතුව විසඳීමේ අවශ්යතාවය ඇතුළු තීරණාත්මක ක්ෂේත්ර කිහිපයක් පිලිබඳ මෙහිදී සාකච්ඡා කෙරිණි. ශ්රී ලංකා සංචාරක කර්මාන්තයට නව බලාපොරොත්තු එක් කරන මෙම ව්යාපෘතියේ සාර්ථකත්වය සහ තිරසාරභාවය සහතික කිරීම සඳහා සියලුම පාර්ශ්වකරුවන් අතර ඵලදායී සහයෝගීතාවයක් වර්ධනය කිරීම අත්යවශ්ය බව ද එහිදී අවධාරණය කෙරිණ.
සාකච්ඡා අවසානයේ එයාර් වයිස් මාර්ෂල් තුයියකොන්තා (විශ්රාමික) විසින් මේ සඳහා සහභාගී වූ සියලු පාර්ශවකරුවන්ගේ කැපවීම අගය කල අතර, බේරේ වැව පරිශ්රයේ සිට දිවයිනේ අනෙකුත් ගමනාන්ත වෙත ගුවන් ගමන් සේවා නැවත ස්ථාපිත කිරීම කඩිනම් කිරීම සඳහා අවශ්ය අඛණ්ඩ සම්බන්ධීකරණය වෙනුවෙන් දිරිමත් කළේය. ව්යාපෘතිය ක්රියාත්මක කිරීමේදී එහි ප්රගතිය සමාලෝචනය කිරීමට මෙන්ම ඇතිවිය හැකි ඕනෑම අභියෝගයකට මුහුණ දීමට අවශ්ය පිළියම් හඳුනාගැනීමට ඉදිරියේදී යලිත් වරක් රැස්වීමක් පැවැත්විය යුතු බවට ද ඔහු යෝජනා කළේය.
බේරේ වැවේ සිට ක්රියාත්මක කෙරුණු ගුවන් යානා මෙහෙයුම් නැවත හඳුන්වාදීම තුලින් මෙම නව ගුවන් මෙහෙයුම් වලට අදාළ සැලසුම් ඉදිරියට පවත්වාගෙන යාම ඔස්සේ ශ්රී ලංකාවේ සංචාරක භූ දර්ශනය පොහොසත් කරනු ඇත. තවද, එමගින් ශ්රී ලංකාවේ ප්රධාන නගර අතර සම්බන්ධතාවය වැඩි දියුණු කරමින් අප රටේ ඉතිහාසය, ස්වභාව සෞන්දර්ය සහ නවීන යටිතල පහසුකම්වල අද්විතීය සම්මිශ්රණය පිළිබඳව ද සාක්ෂි දරනු ඇත.
මෙම අවස්ථාවට ගුවන් හමුදාව, නාවික හමුදාව, ශ්රී ලංකා පොලිසිය, සිවිල් ගුවන් සේවා අධිකාරිය, නාගරික සංවර්ධන අධිකාරිය, මධ්යම පරිසර අධිකාරිය, ශ්රී ලංකා වරාය අධිකාරිය, ජෝන් කීල්ස් සමූහය සහ Saffron Aviation (Pvt) Ltd යන ආයතන නියෝජනය කරමින් ජ්යෙෂ්ඨ නිලධාරීන් පිරිසක් සහභාගී වූහ.
