සොබාදහම කියන්නේ අපූර්වත්වයට. ඒක අනුල්ලංඝනීයයි. මිනිසා වන අපට කිසිම අයුරකින් පාලනය කළ නොහැකි දෙය සොබාදහමයි. එයත් පාලනය කළ හැකි වුණා නම් සොබාදහමත් මිහිදන් වෙලා හුඟක් කල්. සොබාදහමේ අපූර්වත්වය මොනවට කියාපාන සංසිද්ධියක් පසුගියදා මින්නේරිය ජාතික වනෝද්යානයෙන් වාර්තා වුණා. ඒ, මිනිනේරිය ජාතික වනෝද්යානයේ හැඩකාරයා වුණු ‘සුමේධ’ නැවත වනාන්තරයෙන් මතුවීමේ පුවතයි. පොසොන් පොහෝ දින පරිසරහිතකාමීන්ට අහන්න ලැබුණු හොඳම ප්රවෘත්තිය එයයි. සුමේධ රිය අනතුරකට ලක්වන්නේ පසුගිය මාර්තු 07 වැනිදා මරදන්කඩවල – හබරණ මාර්ගයේ ගලපිටගල ප්රදේශයේදීයි. දරුණු අනතුරකින් පසුව දළයක් බිඳුණු සුමේධ රිටිගල ආශ්රිත ප්රදේශයට ඇතුළු වී සැඟවුණා. වනජීවී සංරක්ෂණ දෙපාර්තමේන්තුවේ නිලධාරීන් විශේෂ කාර්ය බළකාය, ගුවන් හමුදාව හා ඊට උදව් කළ බොහෝ දෙනෙක් සති ගණනක් පුරා සුමේධ සොයා මෙහෙයුම් සිදුකළත් හෝඩුවාවන් පමණක් ඉතිරි කරමින් සුමේධ අතුරුදන් වුණා. Sri Lanka Latest News
අලි ඇතුන් පිළිබඳ ඔවුන්ගේ චර්යා රටාවන් ගමන් බිමන් සිතියම් ගැන නිරන්තර උනන්දුවක් දක්වන චන්දික ලක්මාල්, කුෂාන් සමීර, සමීර වීරතුංග, අසංක නිලඟරත්න යන අයගේ පොදු මතය වූයේ ඉතා දරුණු අලකලංචියක් නොවුණේ නම් සුමේධ විසින්ම ඔහුගේ අනතුරට ස්වභාවික බෙහෙත් සොයාගෙන සුවවී මැයි මස අග හෝ ජුනි මාසය වනවිට හබරණ එකෝ පාර්ක් හරහා මින්නේරියට පැමිණෙන බවයි. ඊට හේතු සාධක ලෙස ඔවුන් පවසා සිටියේ ස්වභාවිකව තෝරාගත් ගස් කොළන් හා බෙහෙත් ගස් අතු ඉති හා පොතු කඩාගෙන ආහාරයට ගැනීම ගැන තොරතුරු වාර්තා වීමයි. මේ එක් නිදසුනක් පමණයි. ඊට එරෙහිවද සමාජ මාධ්ය දොස්තරලා සහ ඔස්තාර්ලා දැඩි විවේචන ඉදිරිපත් කර තිබුණා අපට දැකගත හැකි වුණා.
අලි ඇතුන් යනු ස්වභාව ධර්මයේ අපූරු නිර්මාණයකි. ඔවුනට අතුරුආන්තරාවක් වූ විට බෙහෙත් කරන්නට හෝ ආවතේව කරන්නට වෙදදුරන් කැලේ නෑ. ඒවා ස්වභාවධර්මය විසින්ම උරුම කරලා දීපු දේවල්. අතුරු ආන්තරාවකදී බෙහෙත් හේත් කරගන්න එක ඔවුන්ම සිදුකරගත යුතුයි. ඒක තමයි කැලේ නීතිය. සුමේධටද එම නියමය වෙනස් වූයේ නෑ. මාස තුනකට පසු සුමේධ ඉතා හොඳ ශරීර සෞඛ්යයෙන් යුතුව නැවත පැමිණෙන්නේ ඒ නිසා. ඊට හේතුපාදක වූයේ කුමක්ද?
අලින් හා උන්ගේ වෙදහෙදකම් ගැන දැනුම් තේරුම් ඇති උඩුපිල කුමාරපේලි මහත්මයාගේ අදහස වූයේද සුමේධ වනයෙන් සොයාගත් ස්වභාවික ඖෂධ භාවිත කොට තම තුවාල සුව කරගෙන ඇති බවයි. සුමේධ අනතුරට ලක්වූ දිනයේ හා ආසන්න දිනවල ආහාරයට ගෙන ඇත්තේ එකම වර්ගයක ශාක කොටස් වේ. ඒ බෝල පනා නැමැති ශාකයයි. බෝල පනා රිටිගල ආශ්රිත වනයේ සුලබ ශාකයක්. එයින් ඉතා සැර සුවඳක් විහිදෙන බවත්, ඒ සැර නිසා මැස්සන් හා අනෙකුත් කෘමීන් ඇතාගේ තුවාලයේ වසන්නට නොපැමිණෙන බවත් උඩුපිල මහතාගේ අදහසයි.
මඩද ඉතා හොඳ ඖෂධයක් බවත්, ඉන් තුවාලය වැසූ විට බාහිරින් විසබීජ ඇතුළු නොවන බවත් ඔහු සඳහන් කරනවා. වැව් පිටිවල තෘණ බුදින ඇතුන් විශාල වශයෙන් ආහාරයට ගනු ලබන්නේ පැළෑටි හා තෘණ වර්ගයි. අස්වැන්න, මුස්වැන්න, පොල්පලා, නෙරෙංචි, බැලතණ වැනි දෑද ඒ අතර ප්රමුඛත්වයක් ගන්නවා. මෙයිනුත් බැලතණ ඉතා විශේෂයි. කැඩුම් බිඳුම්වලට යොදාගන්නා දේශීය ඖෂධයක් වන එයින් බොහෝ දුරට කැඩුම් බිඳුම්වලට මේවා ඉවහල් වන බවත්, සුමේධ ඒවා වැඩි වශයෙන් ආහාරයට ගන්නට ඇති බවත් විශ්වාස කළ හැකියි
කෙසේ වෙතත් කාලයට ඉඩදී සුමේධට සිදුවූ දේ දෙස බලා සිටියදී සොබාදහම සක්රීය වූවේ අපි කිසිසේත් නොසිතූ ලෙසයි. අද ඔවුන් කී දේ සත්යයක් වී ඇති සේම මින්නේරියේ හැඩකාරයා වන සුමේධ තනි දළයක් සහිතව යහපත් ශරීර සෞඛ්යයෙන් ඔහුගේ වාර්ෂික මද සමය ගතකිරීමට සහකාරියක් සොයා මින්නේරිය ජාතික වනෝද්යානයට පැමිණ ඇත. එකම සිත් තැවුලකට ඇත්තේ මින්නේරියේ සිටි තනි දළයා වන යුනිකෝන් වෙනුවට දළ දෙකක් තිබූ සුමේධ තනි දළයෙක් වී පැමිණීමත්, යුනිකෝන් සදහටම නොපැමිණීමත්ය.
අපිට සොබාදහමට අභියෝග කළ නොහැක. සොබාදහම අපිට දෙන දේ අපි භාරගත යුතුය. මින්නේරියේ හැඩකාරයා වන සුමේධ දිගු කාලයක් සොබාදහම හැඩ කරත්වා යන්න කැලෑ කොලමේ අපේ ප්රාර්ථනාවයි.
(ඡායාරූප අනුග්රහය : පියුමාල් ප්රදීප් – හබරණ සහ සමන් හල්ලොලුව)
සමන් හල්ලොලුව
