දැනට ශ්රී ලංකාවේ නව COVID – 19 ප්රභේදයක් ව්යාප්තවීමේ අවදානමක් නොමැති බැවින් අනිසි බියක් ඇතිකර ගැනීමට අවශ්ය නොවන බව සෞඛ්ය හා ජනමාධ්ය අමාත්යාංශයේ ලේකම් විශේෂඥ වෛද්ය අනිල් ජාසිංහ සඳහන් කරයි. Sri Lanka Latest News
ඔහු මෙලෙස සඳහන් කරන්නේ වසංගත රෝග විද්යා අංශයේ දත්ත පදනම් කරගනිමින් නිවේදනයක් නිකුත් කරමිනි.
රෝගීන්ගේ වැඩිවීමක් පෙන්නුම් නොකරයි
පසුගිය සති කිහිපයේ දී ආසියානු රටවල් කිහිපයක COVID – 19 ආසාදිතයින් සංඛ්යාවේ ඉහළ යෑමක් පෙන්නුම් කර ඇති බව මාධ්ය වාර්තා කර තිබුණු බවත්, මෙම තත්ත්වය යටතේ ප්රජාව තුළ රෝගයට මුහුණ දීමේ ඇති හැකියාව අඩුවීම ඇතුළු සාධක කිහිපයක් හේතු විය හැකි බවත්, මෙය සැලකිල්ලට ගනිමින් සෞඛ්ය අමාත්යාංශය ජාතික මට්ටමින් සූදානම් වීම සහ මහජන සෞඛ්යය ආරක්ෂා කිරීම සඳහා අවශ්ය පියවර ත්රීව්ර කර ඇති බවත්, අමාත්යංශ ලේකම්වරයා නිකුත් කළ එම නිවේදනයේ සඳහන් වේ.
ලේකම්වරයාගේ නිවේදනයට අනුව COVID – 19 සඳහා සායනික සාම්පල පරීක්ෂා කරනු ලබන ඒකාබද්ධ ශ්වසන ආවේක්ෂණය රට පුරා තෝරාගත් රෝහල්වල අඛණ්ඩ ව සිදුවෙමින් පවතී. එමෙන්ම ආවේක්ෂණයට අනුව දැනට COVID 19 රෝගීන්ගේ වැඩිවීමක් පෙන්නුම් නොකරයි. තව ද ශ්රී ලංකාවේ ඇතිවිය හැකි වසංගත තත්ත්ව කල්තියා හඳුනා ගැනීමට අවශ්ය රසායනාගාර ආවේක්ෂණ පද්ධතිය ද සක්රීයව ක්රියාත්මක වන බව ද නිවේදනයේ දක්වා ඇත.
වැඩි අවදානමට ලක්විය හැකි කණ්ඩායම්
කලින් කලට අනෙකුත් ශ්වසන රෝග (උදා: ඉන්ෆ්ලුවෙන්සා) මෙන්ම, COVID-19 රෝගීන්ගේ වැඩිවීමක් ඇතිවිය හැකි බව ද, දැනට සාමාන්ය ජනතාවට ඇති අවදානම අඩු මට්ටමක පවතින බව ද කෙසේ වෙතත්, වැඩිහිටියන්, ප්රතිශක්තිකරණය අඩු පුද්ගලයින් සහ නිදන්ගත රෝග ඇති පුද්ගලයින් යනාදි වැඩි අවදානමට ලක්විය හැකි කණ්ඩායම් කෙරෙහි විශේෂ අවධානයකින් සිටීම වැදගත් බව ද එම නිවේදනයේ සඳහන් කර ඇත.
නිතර අත් සේදීම, කැස්ස සහ කිවිසුම් යන විට නාසය සහ මුඛ ආවරණය කිරීම ඇතුළු මූලික සනීපාරක්ෂක පිළිවෙත් සහ ශ්වසන ආචාර විධි නිරන්තරයෙන් පවත්වා ගත යුතු බව ද සෞඛ්ය හා ජනමාධ්ය අමාත්යාංශයේ වසංගත රෝග විද්යා අංශයේ දත්ත පදනම් කර ගනිමින් විශේෂඥ වෛද්ය අනිල් ජාසිංහ නිකුත් කළ නිවේදනයේ වැඩිදුරටත් සඳහන් වේ.
සෞඛ්ය අමාත්යාංශය විසින් නිවැරදි සහ කාලීන තොරතුරු මහජනතාවට ලබාදීම සඳහා මනා සුදානමකින් පසුවන අතර, ඇති විය හැකි වසංගත තත්ත්වයන්ට මුහුණ දීම සඳහා රෝහල් පද්ධතිය ද සූදානම් කර ඇත.
COVID-19 තත්ත්වයේ කාලයත් සමග සිදුවන වෙනස්කම් පිළීබඳ සෞඛ්ය බලධාරීන් අවධානයෙචන් සිටින අතර, ඔවුන් නිල වශයෙන් ලබාදෙන තොරතුරු කෙරෙහි පමණක් අවධානය යොමු කරන ලෙස ද සෞඛ්ය හා ජනමාධ්ය අමාත්යාංශයේ ලේකම්වරයා ජනතාවගෙන් ඉල්ලා සිටී.
