සමාජ මාධ්ය හරහා සංසරණය වන ඩබ්ලිව්.එම්. එස්. ෆොන්සේකා හෙවත් වන්නිආරච්චිගේ මාලනී සෙනෙහෙලතා ෆොන්සේකා නමැති ජනාධිපති අරමුදල් අවභාවිත කතාවේ නොකියාම සිටින්නට සිටි දැන් නොකියාම බැරි සත්යය මෙසේ ගොනුකරමි. Sri Lanka Latest News
ලංකාවේදී නොකරන සිංගප්පූරුව හෝ එංගලන්තය වැනි රටක පමණක් කළ හැකි හදවත් සැත්කමක් මාලනී ෆොන්සේකාට කළ යුතු බව අනාවරණ වූයේ 2022 මැද භාගයේදීය.
ඇයගේ හදවත් ආශ්රිත රෝග සඳහා බෙහෙත් කරන වෛද්ය මොහාන් රාජකරුණා මහතාගේ උපකාරයෙන් චෙන්නායි ඇපලෝ රෝහලේ මේ සඳහාම කීර්තිමත් වෛද්ය සායි සතිශ් තෝරා ගැනුණේ අඩුම වියදමක් දරා කරගත හැකි එකම ස්ථානය එය බව සොයාගැනීමෙන් පසුවය.
වෛද්ය මොහාන් රාජකරුණා
වෛද්ය සංජය හෙයියන්තුඩුව
දමයන්ති ෆොන්සේකා
රවීන්ද්ර රන්දෙණිය
ජයන්ත ධර්මදාස
වැනි වෙදදුරු සහ නෑ මිතුරු කණ්ඩායමක් එකතු කරගත් Fonseka TAVi යනුවෙන් නිර්මාණය කරගත් Whatsapp group එකක් මගින් සියලු කාරණා වෛද්ය සායි සතිශ් දැනුවත් කරන්නට යෙදිණි.
මෙම සැත්කමට මාස තුනක් පසුවන තෙක් අඛණ්ඩව මේ හරහා ඇයගේ දුක සැප සොයා බැලුණි. එමෙන්ම මේ සඳහා වැයවන මුදල ලංකා මුදලින් රුපියල් කෝටි එකහමාරකට වඩා වැඩි බවද ඇස්තමේන්තු විය.
විවිධ රෝගාබාධ හේතුවෙන් බොහෝ මුදල් වැයකර තිබූ නිසා ඇයට එම මුදල සොයාගැනීම අපහසු විය. සෑම විටකම ඇයගේ අසනීප අවස්ථාහිදී ළඟ සිටි හිතවත් කිහිප දෙනෙක්ම එවක සිටි ජනාධිපති රනිල් වික්රමසිංහ මහතාට දන්වන ලෙස බලකර සිටියහ.
සිනමාවේ පෙම්වතා මුත් සැබෑ ජීවිතයේ හිතවතා වූ රවීන්ද්ර රන්දෙණිය මහතා මගින් සියලු ලිපි ලේඛන සමග මේ කරුණු ජනාධිපතිතුමන්ට, සමන් ආතාවුදහෙට්ටි මහතා මාර්ගයෙන් යොමුකර හමුවක් ඉල්ලා සිටියෙමු.
අසනීපයෙන් පසුවන නිසා නොඑන ලෙස පවසා රනිල් වික්රමසිංහ ජනාධිපතිතුමා, මාලනි ෆොන්සේකා දුරකතනය හරහා අමතමින් අවශ්ය කාරණය ඉටුකර දෙන බවට පොරොන්දු විය.
රටේ ජනාධිපතිතුමන් වශයෙන් ඔබ කරන ලද උපකාරයටත් උපහාරයටත් දැයේ ප්රණාමය.
මාලනී ෆොන්සේකා ජාතික වස්තුවක් බවට විවාදයක් නොමැත.
අප රටේ සෑම රාජ්ය නායකයෙක්ම එය ඉහළින් පිළිගත්තා පමණක් නොව සම්මානයෙන් පුදකරමින්ම අවශ්ය විටක උපකාර කරන්නටද නොපැකිලව කටයුතු කළ බව මම මෙහිදී සඳහන් කරමි. ශ්රී ලංකා ජනරජයේ හිටපු ජනාධිපතිවරුන් වන චන්ද්රිකා මැතිනිය සහ මහින්ද රාජපක්ෂ මහතාවද ස්තුතිපූර්වකව සිහිපත් කරමි.
රනිල් වික්රමසිංහ ජනාධිපතිතුමන් එම අවස්ථාවේ ලබාදිය හැකි උපරිම මුදල ලෙස රුපියල් ලක්ෂ 50ක මුදලක් ලබාදීමට කටයුතු කළ බව කෘතවේදීව මම සඳහන් කරමි.
මෙය මුදල් වශයෙන් ඇපලෝ රෝහලට ගෙවන ලද්දේ එවක ඉන්දියාවේ ශ්රී ලංකා මහ කොමසාරිස් කාර්යාලයේ නිලධාරීන් විසින් වන අතර, මාලනී ෆොන්සේකාට එය අනුමත කළ ලිපිය ලබාදුණි.
වියදම් අවම කිරීමට ඇය මේ ගමන තනිව ආවාය. එවක ඉන්දියාවේ සංචාරයක සිටි මම ඇය බලාපොරොත්තුව චෙන්නායි මහාබෝධියේ නැවතී සිටියෙමි.
අපේ නිළි රැජිනද මහාබෝධිය නවාතැන කරගත්තේ එහි වැඩවාසය කළ ස්වාමින් වහන්සේගේ ආශීර්වාදය මැදය.
අප පසුදා ඇපලෝ රෝහලට යන විට අප පිළිගත්තේ ගනේෂ් මහතා වන අතර, අප ආපසු එනතෙක්ම ඔහු අපේ භාරකරු විය.
මාලනිය හෙළ සිනමා රැජින බවත් ඇය කලකට පෙර ශිවාජි ගනේෂන් සමග‘පයිලට් ප්රේමනාත්’ චිත්රපටයේ ප්රධාන නිළිය බවත් දැනගත් ඇපලෝ රෝහල විස්මයට පත්විය. ඇත්තෙන්ම ඇපලෝ රෝහල ඇයට ඉහළම ගෞරවය පුදකරන ලදී.
විශේෂිත කණ්ඩායමක් යටතේ ඇයව රෝහල් භාරයට ගෙන ඉතා උසස් වර්ගයේ Tavi එකක් (ටයිටේනියම්වලින් නිමකළ) යොදන්නට තීරණය විය.
ඒ සමගම අප සාකච්ඡා පවත්වන කාලයේදී අයකළ රෝහල් ගාස්තු (අප යන කාලයේ එය වැඩි වී තිබිණි) එලෙසම අයකරන්නත් නව Tavi එක සඳහා වැයවන වැඩි මුදල වෛද්ය සායි සතිශ් අරමුදලෙන් ගෙවන්නටත් තීරණය විය.
මෙය අප යෝජනා කළ Tavi මෙන් දෙගුණයක් මිලෙන් ඉහළ එකක් විය.
මවුබිමෙන් ඈත එක ඉන්දීය නළුවෙක් හා රඟපෑ පමණින් ඇයට මේ තරම් සැලකුවා නම් ඇය ඉන්දියාවේ නිළි රැජින නම්…. මම තනිවම සිතුවෙමි.
දෙසැම්බර් 07 වැනිදා සිට අත්යාවශ්ය සියලු පරීක්ෂණ සිදුකෙරිණි.
දෙසැම්බර් 10 වැනි දින සැත්කම සිදුකෙරිණි. දෙවියෙක් මම මෙලොව දුටුවා නම් ඒ සායි සතිශ් දොස්තර මහතා බව මට හැඟුණේ ශල්යාගාර දොරකඩ ඉතිපිසෝ ගාථාව කියමින් තනිව හඬන මට සැණින් දිවවිත් Everything is ok කියා පැවසූ විටය. මාලනී ෆොන්සේකා පසුවදාම මට කතා කළාය.
දෙසැම්බර් 16 වනවිට ඇය යථා තත්ත්වයට පත්වූවාය.
චෙන්නායිහි ශ්රී ලංකා මහ කොමසාරිස් කාර්යාලයේ නිලධාරීන් පැමිණ පොරොන්දු වූ මුදල් ගෙවන ලදී. ඉතිරිය මාලනී අක්කාත් සතිශ් දොස්තර මහතාගේ පදනමත් දරන ලදී.
දවස් හතක්ම දැඩි සත්කාර ඒකකයේ තබා පැයෙන් පැයට සුවදුක් විමසා රෝහලේ වාහනයෙන් ආරක්ෂකයන් දෙදෙනෙක් සමග ගුවන්ගත වනතුරුම රැකවරණය දී අපේ නිළි රැජින ආපසු මවුබිම බලා ඉන්දියාවේ ඇපලෝ රෝහල පිටත් කළාය.
නැවත මාස තුනකින් පැමිණ සියල්ල පරීක්ෂා කරවා ගන්නා ලෙස දුන් උපදෙස් මත අප දෙදෙනා නැවතත් ඇපලෝ රෝහලට ගියෙමු. එවර සියලු පරීක්ෂණ සහ සේවාවන් නොමිලයේ ලබාදුන් බව මම කෘතවේදීව සිහිපත් කරමි.
මාලනී අක්කාගේ අසනීප අවස්ථාවලදී සිටි මා මෙන්ම ඇයට සෙනෙහසත් ශක්තියත් වූ චන්දිකත්, කියන හැම දේම කර දුන් මංජුවත්, රෝහල් දොරකඩට වී නිබඳ බලා සිටි නිල්හාන්වත් ආදරයෙන් සිහිපත් කරමි.
අපට නැති වුණේ මාලනී ෆොන්සේකා නොව යළි කිසි කලෙකවත් නොලබන රට ජාත්යන්තරව කීර්තිමත් කළ රටේ අගනාම වස්තුවකි. අදටත් එයට මිලක් කිව හැක්කේ කාට කෙසේදැයි නොදනිමි. ඇය සිත් තැවුලෙන් කනගාටුවෙන් සිටියේ වරක් ගෞරවයෙන් ඇය පිළිගත් ස්ථානයකදීම එම ගරුත්වය කෙලෙසීම පිළිබඳවයි.
මෙහි දැක්වෙන ඡායාරූප මේ කතාව තීව්ර කරන අපේක්ෂාවෙන් එක් කළෙමි.
(රේඛා වික්රමසිංහගේ ෆේස්බුක් පිටුවෙනි)
