සම්මානනීය ජනප්රිය ටෙලි සහ සිනමා නිළි උදාරි වර්ණකුලසූරිය පසුගිය දවස්වල මාධ්ය කතිකාවට ඇවිදින් අසහාය සම්මානනීය නිර්මාණකරු ජැක්සන් ඇන්තනී ගැන මතකය අලුත් කරමින් දැඩි සංවේගයකින් කතා කරලා තිබුණා. (Sri Lanka Latest News)
ජැක්සන් ඇන්තනී ගැන ඒ විදියට ලොකු වේදනාත්මක මතකයක් අවදි කරන්නට උදාරිගේ කතාබහට පාදක වූ කාරණාව වුණේ ලබන අවුරුද්දේ තිරගත වීමට නියමිත ‘එක ගෙයි සොකරි’ චිත්රපටයයි. දැවැන්ත සම්භාවනීය නිර්මාණයක් ‘එක ගෙයි සොකරි’ ජැක්සන් ඇන්තනීගේ පළමු චිත්රපට නිෂ්පාදනයයි.
‘ජැක්සන් ඇන්තනී මහත්තයගෙ අවසාන කාලේ එතුමගේ ළඟින්ම හිටපු අය අතර මමත් එක්කෙනෙක්. සිනමා නිර්මාණකරුවකු විදියට නෙවෙයි. ‘එක ගෙයි සොකරි’ රූගත කරන අවස්ථාවල ඔහු මම ඉතා ළෙන්ගතුව සමීපව හිටියේ තාත්තා කෙනෙක් වගෙයි. ගුරුවරයකු වගෙයි. ඇත්තටම කියනවා නම් ‘වාගේ යැයි’ කියන වචනයත් මෙතැනදී පාවිච්චි කරන්න බැහැ.
සත්තකින්ම මගේ නිළි ජීවිතයේ හැබෑම ගුරුවරයා ගෞරවනීය තාත්තා ඔහුයි. ඔහු සමග ඔහුගේ නිර්මාණවල රූගත කිරීම් කරනකොට පුදුම විදියට ඔහු මාව හැසිරෙව්වා. උපරිමයයි කියලා මම තීරණය කරපු මගේ රංගනයෙහි බොහෝ ඉසව් එතුමා සම්පූර්ණයෙන්ම වෙනස් මගකට අරගෙන ගියා.
‘ඔයා හිතනවද උදාරි මේක ඔයාගේ උපරිමය කියලා? නැහැ. ඒ උපරිමය තියෙන්නේ තව හුඟක් ඈතක. අන්න එතැනට අපි යන්න ඕනේ’ කියලා ජැක්සන් ඇන්තනී මහත්මයා මට ගුරුහරුකම් දුන්න විදිය හරිම ආදරණීයයි…’
උදාරි තමන්ගෙම වචනවලින් ‘එක ගෙයි සොකරි’ සහ එහි අද්විතීය නිර්මාණකරු ජැක්සන් ඇන්තනී ගැන මතකය ඉතා සංවේදීව සිහිකොට තිබුණා. වෘත්තීමය වශයෙන් නිළියක ලෙස තමා කොතැනද ඉන්නේ, ඒ ඉන්න තැනට ලැබෙන ගෞරවයේ කොටස්කරුවකු ලෙස ප්රවීණ සහ සම්මානනීය කලාකරු ජැක්සන් ඇන්තනීව දක්වන්න පුළුවන් කියලා උදාරි කියා තිබුණලු. ‘දේවි සම්බුලා’ චිත්රපටයේ සිංහල සහ ඉංග්රීසි පිටපත් නිර්මාණයේදීද ඔහු දැක්වූ දක්ෂතාව මෙන්ම ඒ වෙනුවෙන් කළ කැපකිරීමද අදහන්න බැරි මට්ටමක තිබුණාය කියලා උදාරි එහිදී පවසා තිබුණා.
‘කොහොමත් ඔහු නැති අඩුව කිසිවකුට පුරවන්න බැහැ. එය ඛේදනීයයි. ඔහු වෙනුවෙන් විකල්පයක් නැහැ….’
උදාරි වර්ණකුලසූරිය හෙළයේ මහා කලාකරු ජැක්සන් ඇන්තනී ගැන සිහි කැඳවීමට තිත තිබ්බේ එහෙමයිලු.
උදාරි කියන්නේ ඇත්තම තමයි. හෙළයේ මහා නිර්මාණකරු වූ ජැක්සන් ඇන්තනීට විකල්ප නැහැ තමයි. වචනයේ පරිසමාප්ත අර්ථයෙන්ම ඔහු අද්විතීයයි. අසාමාන්යයි.
දමයන්ති රේණුකා ප්රනාන්දු
