ආර්ථික නිදහස පිළිබඳ ලෝකයේ රටවල් 184ක් ආශ්රයෙන් හෙරිටේජ් පදනම වාර්ෂිකව ගණනය කරනු ලබන දර්ශකය අනුව ලංකාව තවදුරටත් පහළ තත්ත්වයකට ගෙනැවිත් ඇති බව හෙළිව ඇතැයි පේරාදෙණිය විශ්වවිද්යාලයේ මානව ශාස්ත්ර සහ සමාජ විද්යා පශ්චාත් උපාධි අධ්යයන අංශයේ අධ්යක්ෂ සහ ආර්ථික විද්යාව පිළිබඳ මහාචාර්ය වසන්ත අතුකෝරල මහතා පැවැසීය. (Sri Lanka Latest News)
2016 වනවිට ලෝකයේ අනෙකුත් රටවල් අතර මෙම දර්ශකය අනුව ලංකාව හිමිකරගෙන සිටියේ 95 වැනි ස්ථානයයි.
එහෙත් 2020 වනවිට මෙම දර්ශකය අනුව ලංකාවට හිමිව තිබුණේ 117 වැනි තැන වන අතර, 2023 වනවිට එය 136 දක්වාත්, 2024 වනවිට 149 දක්වාත් ලංකාවේ ශ්රේණිගත කිරීම් පහළ දමා ඇති බව පෙන්නුම් කෙරේ.
ලෝකයේ ආර්ථික නිදහස පිළිබඳ දර්ශකය එක් එක් රටවල නීතියේ ආධිපත්යය, රජයේ ක්රියාකාරීත්වය, නියාමන කාර්යක්ෂමතාව සහ විවෘත වෙළෙඳපළ සහ ප්රධාන සංරක්ෂක යටතේ උප සංරක්ෂකයන් 12ක් යොදාගෙන වාර්ෂිකව ගණනය කරනු ලබයි.
2024 ගණනය කිරීම් අනුව ආසියානු පැසිෆික් කලාපයේ රටවල් 39 අතර ලංකාව සිටින්නේ 34 වැනි ස්ථානයේය.
ඉන්දියාව, නේපාලය, පාකිස්තානය වැනි රටවල ආර්ථික නිදහස ලංකාවට වඩා හොඳ බව මෙම වාර්තාව මගින් පෙන්නුම් කරයි.
එහිදී ලංකාව කිසිදු ආර්ථික නිදහසක් නොමැති, එසේම ආර්ථික නිදහස යටපත් කර ඇති රාජ්යයක් ලෙස හඳුනාගෙන ඇත.
ලංකාවේ ආර්ථිකය දේශීය මෙන්ම විදේශීය ආයෝජන ශක්තිමත් කොට ඉහළට එසවීමට නම් ආර්ථික නිදහස පිළිබඳ දර්ශක තුළින් කලාපීය අනෙකුත් රටවලට සාපේක්ෂව අප ඉදිරියට යායුතු බවයි මහාචාර්යවරයා සඳහන් කළේ.
ප්රේමලාල් විජේරත්න
