එක්සත් ජාතික පක්ෂය සුලු පිරිසක් විසින් අතහැර දමා එළියට යාමත් සමග පක්ෂය සම්පූර්ණයෙන්ම සුද්ද වූ බවත්, දැන් පක්ෂය තුළ ඇත්තේ පරිණත ජයග්රාහී කළ හැකි කණ්ඩායමක් බවත් එජාප හිටපු පාර්ලිමේන්තු මන්ත්රී රවී කරුණානායක මහතා සදහන් කරයි.
මාධ්ය වෙත අදහස් දක්වමින් ඊයේ (25) දින ඒ මහතා මෙම අදහස් පළ කළේය.
වැඩිදුරටත් අදහස් දැක්වූ කරුණානායක මහතා,
රටට ඡන්දයක් අවශ්යයි. එක්සත් ජාතික පක්ෂය කියන්නේ නැහැ ඡන්දයක් තියන්න එපා කියලා. නමුත් මේ අවස්ථාවේ ඊට වඩා අපි ජනතාව ගැන සිතිය යුතුයි. අපි ජනතාව ආරක්ෂා කළ යුතුයි. ඒනිසා කොරෝනා සහමුලින්ම නැති කරලා ඡන්දයක් ගැන හිතුවොත් තමයි වඩාත් යහපත් වන්නේ. සෞඛ්ය අංශ කියන්නෙත් කොරෝනා තර්ජනය අවසන් වීමෙන් පසුව ඡන්දයකට යාම සුදුසුයි කියලයි. අනිත් අය වගේ එක්සත් ජාතික පක්ෂය උසාවි යන්නේ නැහැ ඡන්දයක් එපා කියලා. ඒ වගේම මොන යුද්ධය දිනුවත් ආර්ථික යුද්ධයෙන් පැරදුනොත් රට විනාශ් වෙනවා. ඒ නිසා රට ආරක්ෂා කරගන්න නම් කොරෝනා යුද්ධයෙන් ජය ගන්නවා වගේම ස්ථාවර ජාතික ආර්ථිකයක් ගොඩනැගිය යුතුයි. ඒ සදහා හැකියාව එක්සත් ජාතික පක්ෂයට තියෙනවා. කොනරෝනා අවධානම යටතේ නැවතත් රටවල පුද්ගලයින් අපේ රටට ගෙන්වීම සම්බන්ධයෙන් වැඩි දුරටත් සිතා බැලිය යුතුයි. රට තුළ දින 67 ක් වැනි කාලයක් ඇදිරි නීතිය පනවලා මේ වනවිට සෑහෙන දුරට කොරෝනා පාලනය වෙලා තිනෙනවා. ඒ නිසා අපි නැවනත් රටවල සිට ජනතාව ගෙන්වනවා නම් දැඩි ලෙස විමසිලිමත් වියයුතුයි. විදේශ විනිමය ලැබෙන මාර්ගයක් වුවත් ඒ පිළිබදව අප සැලකිලිමත් වියයුතුමයි.
එක්සත් ජාතික පක්ෂය කියන්නේ අනර්ඝ ඉතිහාසයක් තියෙන පක්ෂයක්. උරුමයක් තියෙන ඒ පක්ෂය ආරක්ෂා කිරිම අපේ යුතුකමක්. පක්ෂ මහ ගෙදරින් එළියට බැහැලා ගිය අය දැන් ඒ ස්ථානවල. වෙනත් න්යායන් යටතේ. එහෙමනම් දැන් ඔවුන් ගැන එක්සත් ජාතික පක්ෂයේ නාමය ගාවලා කතා කරන එක තේරුමක් නැහැ. අද පක්ෂය මුලුමනින්ම සුද්ද වෙලා තිනෙන්නේ. මහ ගෙදර දාලා යන්න තරම් ඔවුන්ට ප්රශ්නයක් ඇතිවුණේ නැහැ. පක්ෂයේ නායකයා ඒකාධිපති පාලකයෙක් වශයෙන් කටයුතු කළා නම් මෙහෙම දෙයක් වෙන එකක් නැහැ. හුරතල් කරන්න ගිහින් තමයි මෙහෙම දෙයක් ඇතිවුණේ. එක්සත් ජාතික පක්ෂය විශිෂ්ට ජයග්රහණයක් ලබාවි. අපේ පක්ෂය තුළ පරිනත පුද්ගලයින් ගණනාවක් සිටිනවා. තරුණයන්ට ඉදිරියට ඒමට අවස්ථාව දීම ඉතාම වැදගත්. එක්සත් ජාතික පක්ෂය කියන්නන් ගලා යන ගගක් වගේ. ඒකෙන් කුඩා ජල පහරක් වෙනත් දිශාවකට ගලා ගියාට ඒ කෙරේ බලපෑමක් නැහැ. මහගෙදර අතහැරලා ගිය පිරිස ගැනත් කියන්න තියෙන්නේ ඒ දෙයම තමයි.
