පළාත් ආණ්ඩුකාරවරුන්ගේ අධීක්ෂණය යටතේ දිස්ත්රික් සම්බන්ධීකරණ කමිටු විසින් අධීක්ෂණය කරන ලද සංවර්ධන ව්යාපෘති ඉදිරියට ගෙනයෑම සම්බන්ධයෙන් මැතිවරණ කොමිසම තහනම් නියෝගයක් නිකුත් කර ඇත.Sri Lanka Latest News
ඒ, ආණ්ඩුකාරවරුන් දේශපාලන පත්වීම් ලැබූවන් බැවින් එවැනි පියවරක් මැතිවරණ නීති උල්ලංඝණය කිරීමක් බව යන පදනම මතයි.
ජනාධිපති ලේකම් එන්.එස්. කුමානායක මීට පෙර රාජ්ය පරිපාලන අමාත්යාංශයේ ලේකම්වරයාට ලිඛිතව දන්වා යවා තිබුණේ, පාර්ලිමේන්තුව විසුරුවා හැරීමත් සමඟ අකර්මන්ය වූ දිස්ත්රික් සම්බන්ධීකරණ කමිටුවල කටයුතු පළාත් ආණ්ඩුකාරවරුන්ගේ සම්බන්ධීකරණය යටතේ කරගෙන යෑමට නිසි යාන්ත්රණයක් සකස් කරන ලෙස දිස්ත්රික් ලේකම්වරුන්ට උපදෙස් දෙන ලෙසයි.
2024 අයවැයට අනුව දිස්ත්රික් මට්ටමින් ක්රියාත්මක වන සංවර්ධන ව්යාපෘති රැසක් මෙහෙයවීම, අධීක්ෂණය සහ සමාලෝචනය කිරීම දිස්ත්රික් සම්බන්ධීකරණ කමිටු වෙත පැවරී ඇති නමුත්, දිස්ත්රික් සම්බන්ධීකරණ කමිටු අක්රිය වීම හේතුවෙන් ඒවා ඇණහිට ඇති බව ජනාධිපති ලේකම්වරයාගේ ලිපියෙන් පෙන්වා දී ඇත.
මේ සම්බන්ධයෙන් විශේෂ අවධානයක් යොමුකරන ලෙස දිස්ත්රික් ලේකම්වරුන්ට උපදෙස් දෙන ලෙස අමාත්යාංශ ලේකම්වරයාට උපදෙස් දුන් ජනාධිපති ලේකම්වරයා, මේ වසරේ ආරම්භ කර ඇති සංවර්ධන ව්යාපෘති අවසන් කර ඒවායේ ප්රතිලාභ ජනතාවට ලැබිය යුතු බව අවධාරණය කර තිබිණි.
මෙම ව්යාපෘති සඳහා අරමුදල් සපයන ලද්දේ මන්ත්රීවරුන් සඳහා වෙන් කරන ලද විමධ්යගත අයවැයෙනි.
ඒ අනුව, 2024 අයවැය යටතේ ආරම්භ කර ඇති දිස්ත්රික් සංවර්ධන ව්යාපෘති මෙම වසර ඇතුළත අවසන් කිරීමට, අදාළ පළාත් ආණ්ඩුකාරවරුන් සමඟ සාකච්ඡා කර නිසි යාන්ත්රණයක් සකස් කරන ලෙස දන්වමින් රාජ්ය පරිපාලන අමාත්යාංශය ජනාධිපති ලේකම්වරයාගේ ලිපියේ පිටපතක් සමඟ දිස්ත්රික් ලේකම්වරුන්ට ලිපි නිකුත් කර තිබේ.
කෙසේවෙතත්, මෙම නියෝගයට අනුව, උතුරු පළාත් දිස්ත්රික්ක පහේ, එනම්, යාපනය, මුලතිව්, මන්නාරම, කිලිනොච්චි සහ වවුනියාව, ලබන සතියේ දිස්ත්රික් සම්බන්ධීකරණ කමිටු රැස්වීමක් පැවැත්වීමට නිලධාරීන් විසින් ගනු ලැබූ ක්රියාමාර්ග මැතිවරණ කොමිසමේ මැදිහත් වීමෙන් පසු අත්හිටුවා ඇත.
වාර්තා සඳහන් කරන ආකාරයට, ජනාධිපති ලේකම්වරයාගේ පියවර සම්බන්ධයෙන් මැතිවරණ කොමිසමේ විරෝධතා දිස්ත්රික් ලේකම්වරුන්ට වාචිකව පමණක් දන්වා ඇත.
පාර්ලිමේන්තු මැතිවරණය අවසන් වූ පසු වැඩසටහන් ඉදිරියට ගෙන යා හැකි බව දිස්ත්රික් ලේකම්වරුන්ට දන්වා ඇත.
මැතිවරණ කොමිසමේ සභාපති ආර්.එම්.ඒ. එල් රත්නායක ජනමාධ්ය වෙත පවසා ඇත්තේ, ලබන බදාදා පැවැත්වීමට නියමිත රැස්වීමකදී මේ පිළිබඳව අවධානය යොමුකරන බවයි.
