ජාත්යන්තර මූල්ය අරමුදල සමග ආණ්ඩුව එළඹ ඇති ගිවිසුමේ අහිතකර බව ගැන දැනුවත් කිරීමේ විශේෂ මාධ්ය හමුවක් ජන අරගල සන්ධානය විසින් නුගේගොඩ දී කැඳවන ලදී. ජාවාරම්කාර සමාගම් විසින් පැහැරහැර ඇති සුරාබදු සම්බන්ධයෙන් ද මෙහිදී තොරතුරු හෙලිදරව් විය.Sri Lanka Latest News
එහිදී අදහස් දැක්වූ ජන අරගල සන්ධානයේ ජනාධිපති විධායක සභික පෙරටුගාමී සමාජවාදී පක්ෂයේ අධ්යාපන ලේකම් පුබුදු ජයගොඩ
” ජාත්යන්තර මූල්ය අරමුදලේ නියෝජිත පිරිසක් මේ බ්රහස්පතින්දා ලංකාවට ඇවිල්ලා ආණ්ඩුව එක්ක සාකච්ඡා කළා. නමුත් තවම IMF එකත් එක්ක සාකච්ඡා කළ නිශ්චිත එකඟතාවයන් ගැන ආණ්ඩුව ප්රකාශ කරල නෑ. රනිල් වික්රමසිංහ අගෝස්තු මාසෙදි ජාත්යන්තර ස්වෛරීත්ව බැඳුම්කර හිමියන් සමග ඇතිකරගත් ගිවිසුම නැවත ක්රියාත්මක කරන්න තමයි මේ සාකච්ඡාවලදි එකඟ වෙලා තියෙන්නෙ. අපි දන්නවා ලංකාවේ ජනතාවට ඉතාම අවාසි සහගත විදෙස් ධනකුවේර සමාගම් සනසන ගිවිසුමකට තමයි රනිල් වික්රමසිංහ එළඹිල තිබුණෙ.
දැන් ප්රශ්නෙ තියෙන්නෙ ජාතික ජන බලවේගය මැතිවරණ වේදිකාවෙදි කිව්වෙ මේ කතාව නෙමෙයි. ඔවුන් කිව්වේ පූර්ණ ණය විගණනයක් කරනවා කියලා. අවභාවිතා කළ හෝ වංචා සහගත ණය තියනවනං ඒවා නොගෙවා ඉන්න කටයුතු කරන්න සූදානම් කියලා තමයි ඒ වෙලාවෙ කිව්වෙ. දෙවෙනි කාරණය තමයි ඔවුන්ගේ ප්රතිපත්ති ප්රකාශනේම සඳහන් කරල තියනවා විකල්ප DSA එකක් “ණය තිරසරකරණ විශ්ලේෂකයක් ” කරල ඒ ගැන IMF එක එක්ක සාකච්ඡා කරනවා කියලා කිව්වා. ජනාධිපති ආර්ථික උපදේශක විදිහට පත් කරල ඉන්න මහාචාර්ය අනිල් ජයන්ත කිව්ව කතාව තමයි දළ දේශීය නිශ්පාදනයෙන් 95%ක ණයක් තියාගන්න ආව එකඟතාවය වැරදී IMF එකත් එක්ක සාකච්ඡා කරලා ඒ ණය කප්පාදුව වැඩිකරගන්න කටයුතු කරනව කියලා. හැබැයි දැන් ඒ කතා ඔක්කොම පැත්තක තියලා පරණ පාරෙම යන්න තමයි මේ ලෑස්ති වෙන්නෙ.
දැන් රනිල් වික්රමසිංහගේ ප්රතිපත්තියටත් එහාට ගිහිල්ලා ආණ්ඩුව අලුත් බැඳුම්කර නිකුත්තුව සඳහා නම් කරල තියෙන්නෙ ” සිටි බෑන්ක් ” එක. මේ ඇමරිකානු බැංකුව 2008 ලෝක ආර්ථික අර්බුදය වෙලාවේ ඉතාම මෙලේච්ඡ විදිහට ජනතාව සූරාකෑමට ලක් කරපු බැංකුවක්. මේ නරියට කුකුල් කොටුව බාරදුන්නා වගේ වැඩක් තමයි කරල තියෙන්නෙ. ගෝලීය මූල්ය බූවල්ලන් පිනවන එක විතරයි මෙතන වෙන්නෙ. ලංකාවේ ජනතාවට කිසිම සහනයක් ලබාදෙන්න සිටි බෑන්ක් එකවත් IMF එකවත් කටයුතු කරන්නෑ.
අපි ආණ්ඩුවට කියන්නේ ඔබට ජනතාවට ජන වරම දුන්නේ මේ දේවල් කරන්න නෙමෙයි. IMF එකට කඩේ යන නන්දලාල් මහබැංකු අධිපති විදිහට තියාගෙන ජනතාව වෙනුවෙන් පෙනී ඉන්න පුලුවන් කමක් නෑ. ඒක නිසා වහාම නන්දලාල් ගෙදර යවන්න. රනිල් වික්රමසිංහගේ වැඩපිළිවෙළ ක්රියාත්මක කරන්න ඕන නම් ජනතාව අනුරකුමාර ජනාධිපති කරන්න ඕන නෑනෙ. ජනතාවට සහන දෙන්න ඕන නම් මේගොල්ලො රනිල් වික්රමසිංහ සම්මත කරපු ආර්ථික පරිවර්තන පනත අහෝසි කරන්න වෙනවා. මොකද ඒ පනතට අනුව ජනතාවගේ සුබසාධන කටයුතු වලට යොදනවන මුදල් සීමා කරන්න වෙනවා. ඒක නිසා මේ පනත තියාගෙන ජනතාවාදී ආර්ථිකයක් හදන්න පුලුවන් කමක් නෑ.
මේ ආර්ථික අර්බුදයට ඇත්ත උත්තරේ තියෙන්නෙ ධනකුවේර සමාගම් විසින් පැහැර හැරපු බදු අයකරගැනීම ඇතුලේ. ලංකාවේ සුරාබදු පැහැරහැරීම් කෝටි ගාණක් තියනවා. ඇයි ඔවුන්ට විරුද්ධව නීතිය ක්රියාත්මක කරන්න බැරි ?
මෙන්ඩිස් සමාගම රුපියල් බිලියන 1.2ක බදු ප්රමාණයක් 2022 අවුරුද්දේ ගෙවල නෑ. 2023 අවුරුද්ද වෙද්දි මේ ප්රමාණය 3.6ක්. 2024 සැප්තැම්බර් මාසේ වෙද්දි බිලියන 5.2ක සම්පූර්ණ සුරාබදු රජයට ගෙවල නෑ. රුපියල් කෝටි 5200ක් මෙන්ඩිස් සමාගම බදු පොලු තියලා. ඊලඟට ජෝන්ස්ටන්ට අයිති සමාගම් මහාපරිමාණයෙන් සුරාබදු ගෙවල නෑ. මේ වෙද්දි ලංකාවේ සමාගම් නොගෙවා පැහැරහැරපු සමස්ථ සුරාබදු ප්රමාණය රුපියල් කෝටි 6700ක්. මෙතනින් 58%ක් අර්ජුන් ඇලෝසියස්ට අයිති මෙන්ඩිස් කොම්පැනිය නොගෙවපු බදු. 37%ක් ජෝන්ස්ටන්ගෙ කොම්පැනිය තමයි නොගෙවා ඉදල තියෙන්නෙ. එතකොට 95%ක් බදු නොගෙවලා තියෙන්නෙ මේ සමාගම් දෙක. අනිත් සමාගම් 8ම නොගෙවපු බදු ප්රමාණය 5%යි.
රටේ සාමාන්යය ජනතාව ගන්න හාල් ටික පරිප්පු ඇටේ ඉඳලා බදු ගහන ආණ්ඩුවට ඇයි බැරි මේ සමාගම්වලින් මේ බදු අයකරගන්න ? ඒ නිසා අපි ආණ්ඩුවට කියනවා මේ රනිල්ලගෙ රාජපක්ෂලගෙ ඔඩොක්කුවේ හුරකල් වෙච්ච කුක්කෝ හුරතල් කරන්න තවදුරටත් ලෑස්ති වෙන්න එපා. වහාම මේ ජවාරම්කාරයින්ට එරෙහිව නීතිය ක්රියාත්මක කරන්න මැදිහත් වෙන්න. “
