ඇවිදපු අය ගෙදර ඉඳන් කරන වැඩ

කොවිඞ් 19 වෛරසයේ බලපෑම එන්න එන්නම වැඩි වෙනවා. අපි ගෙදර හිරකාරයෝ බවට පත් වෙලා දැන් සති දෙකකටත් වැඩියි. ආයෙ එළියට බහින්නෙ කවදද කියලා කියන්න තවමත් කාටවත්ම බැහැ. වෙනදට රට වටේ ලෝකෙ වටේ ඇවිද්ද සංචාරකයෝ මේ දවස්වල මොකද කරන්නේ කියලා හොයලා බලන්න අපට හිතුණා. මේ දවස්වල ගෙදර ඉඳගෙන කරන්න පුළුවන් තමන්ට වගේම වෙනත් කෙනකුටත් ප්‍රයෝජනවත් වැඩක් ගැන කරපු වීඩියෝවක් අපිට හම්බ වුණේ ඒ අතරෙදි. Travel With Mind ෆේස් බුක් පිටුවෙන් තමයි මේ වීඩියෝව නිර්මාණය කරලා තිබුණේ.

මේ දවස්වල හැමෝව මුහුණ දෙන්නේ කවදාවත් හිතුවේ නැති දුෂ්කර කාලයකට. එදිනෙදා ජීවිකාව සරි කර ගත්ත මිනිස්සු ගොඩ දෙනෙක් මේ හින්දා ගොඩක් අසරණ වෙලා ඉන්නවා. අන්න ඒ අයට තමන්ට හැකි පමණින් උදව් කරන එක ගැන තමයි ඒ වීඩියෝවෙන් කතා කරන්නේ. මේ වෙලාව හැමෝටම අමාරුයි. බැංකු පොතේ සල්ලි තිබුණත්, ඒවා ගන්න බැංකුවට යන්න විදියක් නැහැ. අතේ සල්ලි තිබුණත් සමහර අයට බඩු ගන්න තැනක් නැහැ. ඒ වගේ ප්‍රශ්න ගොඩක් තියෙනවා. ඒ හින්දා මහා පරිමාණයෙන් නෙවෙයි අපිට පුළුවන් විදියට අසරණ වුණු එක පවුලකට එක වේලක් හරි කන්න උදවු කරමු කියන අදහස තමයි ඒ වීඩියෝවෙන් පෙන්වන්නේ.

ඒ වගේම තවත් වැදගත් දෙයක්. ඒ විදියට කරන උදව්ව ප්‍රදේශයේ ග්‍රාම නිලධාරි මහත්මයා හරහා සිදු කරමු කියන එකත් ඒකෙදි කියනවා. ඒකත් බොහොම වටිනා අදහසක්. මොකද අනෙක් අයට උදවු කරනවා කියලා ඇඳිරි නීති බලපත්‍ර ලබා ගෙන ඒක අවභාවිතා කිරීම සම්බන්ධ සිදුවීම් කිහිපයක්ම පසුගිය දින කිහිපයේදී වාර්තා වෙලා තිබුණා. ඒ හින්දා මෙහෙම වැඩක් කරද්දි ප්‍රදේශයේ ග්‍රාම නිලධාරි මහත්මයා හරහා කරන එක තමයි හොඳ. ඇත්තටම පුංචි පවුලකට එක වේලකට හරි කන්න ආහාර දෙන එක ඒ තරම්ම ලොකු වැඩක් නෙවෙයි. ඒත් ඒකේ වටිනාකම නම් මිල කරන්න බැරි තරම් ඉහළයි.

Travel With Mind කියන්නේ කෙටි කාලයක් ඇතුළත වැඩි දෙනෙක් අතරේ ජනප්‍රිය වුණු සංචාරක කණ්ඩායමක් කිව්වොත් නිවැරැදියි. වැඩි දෙනෙක් නොදන්නා ලංකාවේ සැඟවුණු ඉසව් කිහිපයකම සිදු කළ අපූරු සංචාර රැසක් ඔවුන්ගේ යූටියුබ් චැනලය හරහා නරඹන්න පුළුවන්. ඒ වගේම ගෙදරට වෙලා ඉන්න ගමන් Travel With Mind කරනවා වටිනා වැඩක් කරන්න පුළුවන් නම් ඒකත් හොඳයි. ඒත් කලිනුත් කිව්වා වගේ මේ හැම දෙයක්ම කරන්න ඕනෑ අපි සහ අනෙක් අයත් ආරක්ෂා වෙන විදියට. ඒ බවත් හොඳට මතකයේ තියා ගන්නවා නම් හොඳයි.
චන්දන පොන්නම්පෙරුම