ප්රමිතියෙන් තොර හියුමන් ඉමියුනොග්ලොබියුලින් එන්නත් මාත්රා මිල දී ගැනීමේ සිද්ධියට අදාළ ප්රශ්නගත ඖෂධ මිල දී ගැනීම් සඳහා පත්කළ තාක්ෂණික කමිටුවට සහභාගී වූ වෛද්ය ජයනාත් බුත්පිටිය යන අය විදෙස් ගමන් තහනමක් තිබියදීත් අධිකරණයේ අවසරයකින් තොරව විදෙස් ගතවී ඇති බව නියෝජ්ය සොලිසිටර් ජනරාල් ලක්මිණී ගිරිහාගම මෙනෙවිය මාලිගාකන්ද මහේස්ත්රාත් ලෝචනී අබේවික්රම වීරසිංහ මහත්මිය ඉදිරියේ ඊයේ (15) කරුණු ඉදිරිපත් කළාය.Sri Lanka Latest News
එසේම මෙම තාක්ෂණික ඇගැයීම් කමිටුවට සහභාගී වූ අනෙක් වෛද්යවරයා වන පී. ආර්. සුදර්ශන යන අයද මේ වන විටත් විදෙස් ගතව ඇතැයි නියෝජ්ය සොලිසිටර් ජනරාල්වරිය අධිකරණයට දැනුම් දුන්නාය.
මෙහි පළමු සැකකරු වන බාල ඖෂධ ගෙන්වූ බව කියන අයුසුලේට් බයොටෙක් ෆර්මා සමාගමේ හිමිකරු වූ සුගත් ජානක ප්රනාන්දු යන අයගේ අත්සන් පරීක්ෂා කර බැලීම සඳහා ඔහුගේ අත්අකුරු පරික්ෂාකර බලා අධිකරණයට වාර්තාවක් ඉදිපත් කරන ලෙස මෙහි දී මහේස්ත්රාත්වරිය රජයේ සැක කටයුතු ලේඛන පරීක්ෂකවරයා වෙත නියෝගයක් නිකුත් කළාය.
මෙම ප්රශ්නගත ඖෂධ ප්රමුඛතාව මත ශ්රේණිගත කිරීම තුළ ස්ථාපිත වී තිබුණේ කුමන ආකාරයකටදැයි ශ්රේණිගත විශ්ලේෂණයක් කර අධිකරණයට වාර්තාවක් ලබා දෙන ලෙසට අධිකරණයෙන් කොළඹ විශ්වවිද්යාලයේ පරිගණක පීඨයට සහ ලංකා කායික රෝග විද්යායතනයේ අධ්යක්ෂවරයාට නියෝග නිකුත් කළේය.
මෙම ප්රශ්නගත කැබිනට් පත්රිකාව නිකුත් කිරීමට පෙර සෞඛ්ය අමාත්යාංශය සතුව කෙතරම් ඖෂධ තොග පැවැතියේදැයි යන්න සම්බන්ධයෙන් වාර්තා කැඳවීම සඳහා සෞඛ්ය අමාත්යාංශයේ බෙහෙත් තොග සම්බන්ධයෙන් වාර්තා අඩංගු ‘ෆොන්ටෝ මෘදුකාංගය නිර්මාණය කර ඇති ඊ. ඩබ්ලිව්. ඉන්ෆොමේෂන් සිස්ටම් ආයතනයේ විධායක අධ්යක්ෂවරයාට, ශ්රී ලංකා පරිගණක හදිසි ප්රතිචාර සංසදයට, සැකකටයුතු ලේඛන පරීක්ෂකවරයාට, අපරාධ පරීක්ෂණ දෙපාර්තමේන්තුවේ අධ්යක්ෂවරයාට ද අධිකරණයෙන් නියෝග නිකුත් විණි.
මෙම කැබිනට් පත්රිකාව නිකුත් කිරීමට පෙර හිටපු සෞඛ්ය අමාත්ය කෙහෙළිය රඹුක්වැල්ල මහතා ඇතුළු නිලධාරීන් සහභාගී වූ සියලු රැස්වීම්වලට අදාළ වාර්තා සියල්ල අපරාධ පරික්ෂණ දෙපාර්තමෙන්තුවට ලබා දෙන ලෙසට මහේස්ත්රාත්වරිය සෞඛ්ය ලේකම්වරයාට ද ඊයේ (15) නියෝගයක් නිකුත් කළාය.
මෙම ප්රශ්නගත සිද්ධියට අදාළ මුල්ගොනු සෞඛ්ය අමාත්යාංශයේ අතිරේක ලේකම් සමන් රත්නායක යන අය භාරයේ තිබිය යුතු වුවත්, මේ වන තෙක් ඔහු ඒවා අපරාධ පරීක්ෂණ දොපාර්තමේන්තුවට භාරනොදුන් බවත් ඒවායේ මුල් ගොනු අස්ථානගතවී ඇති බවත් නියෝජ්ය සොලිසිටර් ජනරාල්වරිය අධිකරණයට දැනුම් දුන්නාය.
ප්රමිතියෙන් තොර හියුමන් ඉමියුනෝග්ලෝබියුලින් එන්නත් මාත්රා මිල දී ගැනීමේ සිද්ධිය සම්බන්ධයෙන් වැඩිදුර මහේස්ත්රාත් පරීක්ෂණය ඊයේ (15) අධිකරණය හමුවේ යළි කැඳවූ අවස්ථාවේ දී මෙම කරුණු ඉදිරිපත් විණි.
