නා ගනීද? හා ගනීද? දුවන්න දෙයිද? දුවන්න වෙයිද?
ආසියානු කුසලානය ඉවර වෙලා ලෝක කුසලානෙට පිටත් වූ ශ්රී ලංකා ජාතික ක්රිකට් කණ්ඩායමට අපි සුබපැතුම් එක් කරනවා. ඔබට පුළුවන් නම් ආයෙත් අපට ලෝක කුසලානයක් ගෙනල්ලා දෙන්න. 1996 ලෝක කුසලානයෙන් පස්සේ 2014 ටී-20 ලෝක කුසලානය මිසක් වෙන සැනසිලි සුසුමක් අපට හෙළන්න ලැබුණේ නෑ. ආසියානු ටී-20 ශූරයන් වෙච්ච අපට ආසියානු ශූරයන් වෙන්න තිබුණු අවස්ථාව නූලෙන් මිස් වුණේ. හැබැයි ඒ නූල හරි මහතයි. ඒ නූල ලැජ්ජාසහගතයි. අවසානයේ අනුශූරයන් විදියට මේ තරගාවලිය අවසන් කරන්න ලැබීම එක විශිෂ්ට ජයග්රහණයක්.(Sri Lanka Latest News)
ඒ ජයග්රහණය කිසිසේත් අපි අවතක්සේරුවට ලක්කරන්නේ නෑ. ඒකට හේතුව තමයි බාබර් අසාම් ඇතුළු අතිශය ප්රබල පාකිස්තානු කණ්ඩායම ඒ තරගාවලියෙන් එළියට විසිවුණා. ඒ වගේම කාලයක් තිස්සේ හොඳට ක්රීඩා කරමින් ඉන්න බංග්ලාදේශ කණ්ඩායම මේ තරගාවලියේදී එළියට වීසි වුණා. මේ මොහොතේ ඉතා පෙරළිකාර ලෙස කටයුතු කරන ආසියානු කුසලාන තරගාවලියේදී පවා පෙරළිකාරයෝ විදියට වැඩ කරපු ඇෆ්ගනිස්තාන ක්රීඩකයෝ මේ තරගාවලියේදී එළියට විසි වුණා. ඔවුන් කොච්චර දක්ෂතා සහිත ක්රීඩකයෝද කියනවා නම් ලෝකයේ වැඩිම ටී-20 තරග ප්රමාණයක් ක්රීඩා කරපු, ලෝකෙ පුරාම ක්රිකට් ගහන ක්රීඩකයෝ ඔවුන් සතුව ඉන්නවා.
ඒ වගේම ලෝකයම දන්න සුපර්ස්ටාර් කෙනෙක් වෙච්ච රෂීඩ් පවා ඔවුන් සතුව ඉන්නවා. මේ ගොල්ලො තරු. හැබැයි එහෙම ඉද්දිත් ශ්රී ලංකාවට පුළුවන් වුණා අවසන් තරගයට එන්න. අවසාන තරගයේදී ලැබුණේ ලැජ්ජාසහගත පරාජයක්. ලකුණු 50යි ගහන්න පුළුවන් වුණේ. ඒක ඇත්ත. නමුත් අප විසින් මේ කාරණයේදී පැහැදිලි කරන දේ තමයි ශ්රී ලංකා කණ්ඩායමට තවමත් බැරි නෑ, පුළුවන්.
ඒත් ලෝකෙ බොහෝ අනාවැකි අතර ශ්රී ලංකාව කියන නම නෑ. ඒ අනාවැකි අතර නම නැතිවෙලා දවස් කිහිපයකින් පස්සේ පුහුණු තරග තිබුණා. ඒ අතරින් පළමු පුහුණු තරගය අපි බංග්ලාදේශය හමුවේ පරාජයට පත්වුණා. බංග්ලාදේශය කියන්නේ මේ වතාවේ ජයග්රාහකයන් වේවි යැයි සිතිය හැකි කණ්ඩායමක් නෙවෙයි. ප්රබල කණ්ඩායමක් නෙවෙයි. එවැනි ප්රබල නොවන කණ්ඩායමක් හමුවේ අපි ප්රථම වතාවට පරාජයට පත්වුණා.
ඊළඟ තරගය ඇෆ්ගනිස්තානය සමග තරගය. මේ තරගය ඔවුන් වේගවත් ඉනිමකින් පස්සේ ගඹා ගිහින් ජයග්රහණය කරපු තරගයක් වුණා. අපේ පන්දු යැවීමත් අතිශය දුර්වල මට්ටමක තිබුණු බවක් අපට පෙනුණා. මේ තරගයේදී එක සාධනීය කාරණයක් වෙන්නේ කුසල් මෙන්ඩිස් ලකුණු අතරට පැමිණීම. ඒක අතිවිශිෂ්ට ඉනිමක්. ඒ ඉනිම හා සමාන ඉනිමක් අපි කාලෙකින් දැකලා නෑ.
ඒ වගේම විශේෂත්වය තමයි ඔහුගේ ඉනිම අත්හිටෙව්වේ නැත්නම් ඇතැම් විට මේ තරගය ලංකා කණ්ඩායම ජයගන්නට පවා තිබුණා. නමුත් ඒකෙ තියෙන ප්රශ්නය කුසල් 200ක් ගහනවද, 250ක් ගහනවද කියන එක නෙවෙයි. කුසල් 250ක් ගහලා, ලංකා කණ්ඩායමේ ඉතිරි ක්රීඩකයෝ ගහන්නේ ලකුණු 60යි නම් ඒ ක්රිකට්වලින් වැඩක් නෑ. කුසල් එක්ක අකුසල් මිශ්ර වෙලා කියන එක තමයි අපට හිතෙන්නේ. මේ තත්ත්වය අපට පේන්නෙත් එහෙම තමයි.
ශ්රී ලංකා ජාතික කණ්ඩායමේ ක්රීඩකයෝ බොහෝ දෙනෙක්ගේ විශ්වසනීයත්වය (කන්ෆිඩන්ට්) කියන එක නැති බව තමයි මේ වෙද්දී පේන්න තියෙන්නේ. විශේෂයෙන්ම ඒ තරගයේදී දසුන් ශානකව එළියෙන් තියලා තමයි තරගයට එන්නේ. එතකොට අපට පේන දෙයක් තමයි අවසාන පන්දු වාර කිහිපයේදී පවර් හිටර් කෙනෙක් ශ්රී ලංකා කණ්ඩායමේ නෑ. දසුන් එළියෙන් තිබ්බට පස්සේ එක්කෝ වෙන පවර් හිටර් කෙනෙක් ඇතුළට ගන්න ඕනේ.
ඇත්තටම ලංකාවට හිටපු හොඳම තුන් ඉරියව් පවර් හිටර් විදියට අපට ආදේශකයක් විදියට පාවිච්චි කරන්න තිබුණේ දසුන් එළියෙන් තිබ්බත් ප්රශ්නයක් නැත්තේ වනිඳු හසරංග කණ්ඩායමේ හිටියා නම්. නමුත් දැන් වනිඳු නෑ. එහෙම නම් දසුන් එළියෙන් තියලා චාමික ඇතුළට එන්න ඕනේ. චාමිකත් නැතුව ඔවුන් දුනිත් වෙල්ලාලගේව විතරක් බලාපොරොත්තුවෙන් තරගයට එනවා. නැත්නම් තුන් ඉරියව් ක්රීඩකයෙක් විදියට ඔවුන් ආදේශ කරගන්නවා ධනංජය සිල්වා.
ධනංජය කියන්නේ තුන් ඉරියව් ක්රීඩකයෙක් විදියට ආදේශකයක් වුණාට ඔහු අවසාන පන්දු දෙක තුනට හහේ ඒවා දෙක තුනක් ගහන්න පුළුවන් ක්රීඩකයෙක් නෙවෙයි. එහෙම ක්රීඩකයෙක්ගේ අවශ්යතාව දැන් ලංකාවට තදින්ම දැනෙනවා. ඒක වෙන විදියකට පැහැදිලි කළොත් තිසර පෙරේරාගේ පන්නයේ ක්රීඩකයෙක් අපට දැන් අවශ්යයි. එහෙම ක්රීඩකයෙක් ශ්රී ලංකා කණ්ඩායමේ නෑ. ශ්රී ලංකා කණ්ඩායමේ එහෙම ක්රීඩකයෙක් හොයාගන්න උත්සාහ කරන බවක්වත් පේන්න නැහැ. මේක ඉතාම නරක සහ භයානක තත්ත්වයක්.
මේ තරගාවලියේදී අපට පේන දෙයක් තමයි ප්රබල කණ්ඩායම්වල ලකුණු තත්ත්වයන්. ඔවුන් සාමාන්යයෙන් ලකුණු 350 සීමාව ඉක්මවා යනවා. 380, 390 වගේ සිමාවේ තමයි ඔවුන් නතර වෙන්නේ. මානසියාදුෂේන් වගේ ටෙස්ට් ක්රීඩකයෝ, ස්මිත් වගේ ටෙස්ට් ක්රීඩකයෝ, පන්දු ස්ට්රයික් රේට් එක ලකුණු 100ට වගේ ලකුණු ගන්නවා අපට පේනවා. ඉන්දියාවේ ඉන්නේ ග්රවුන්ඩ් කන්ඩිෂන් එක හොඳම දන්න ක්රීඩකයෝ. ඒ වගේම පිස්සු හැදිච්ච ප්රේක්ෂකයන් පිරිසක් වටකරගත්ත කණ්ඩායමක් ඉන්දියාව. ඒ වගේම බාබර් අසාම්ලගේ කණ්ඩායම පාකිස්තානය. මේ තරගය ලේසියෙන් අතහරින්නේ නෑ.
ඒ වගේම කාගෙවත් වැඩි ආදරය දිනා නොගත්තත් නවසීලන්තයත් මේ වෙලාවේ ඉන්නේ පුදුමාකාර රිදම් එකක. ඒ නිසා මේක ලේසි වෙන්නෙ නැති බව අපට පැහැදිලියි. ලෝක කුසලානය ලංකාවට දිනන්න පුළුවන් වුණත්, බැරි වුණත් ඒක ලේසි වෙන්නේ නෑ කියන එක නම් අපට 100%ක් විශ්වාසයි. අපි ඔබට කියන්නේ ඔළුව ටිකක් හදාගන්න කියලා. පැරැදුණත් කමක් නෑ කියන තැන. මොකද පැරැදිය හැකි සම්භාවිතාව 100%යි. සම්භාවිතාව ඉතාම අඩුයි ජයග්රහණය කරන්න.
මේ තියෙන තත්ත්වය මත පෙරළියක් කරන්න බැරි නෑ ශ්රී ලංකා කණ්ඩායමට. වඩාත් අවධානය දිනාගත් කණ්ඩායමක් ශ්රී ලංකා කණ්ඩායම. මොකද ශ්රී ලංකාව කියන්නේ කොයි වෙලාවේ මොකක් කරයිද කියලා දන්නේ නැති කණ්ඩායමක් කියලා මුළු ලෝකෙම කියනවා. දසුන්ලා වුණත් අතිශය අසාර්ථකයි ක්රීඩකයෙක් විදියට. අපි දැක්කා දසුන් ඉන්දියාවේදී සාර්ථකයි. ඒ නිසා දසුන් ගැනත් බලාපොරොත්තු අතහරින්න බෑ අපට.
ඒ විදියට ගත්තම අපි ඉන්නෙ අඩුම පීඩනය සහිතව. ඇත්තටම අපි මේ වතාවෙ ඉන්නෙ නෙදර්ලන්තයට විතරක් ඉස්සරහින්. අනාවැකි කිසිවක් අතරෙ අපි නෑ. ශ්රී ලාංකික ක්රීඩකයොවත් අපි ගැන කියන්නෙ නෑ. ඒ වගේම අපි සතුව සුපර්ස්ටාලා නෑ. සීමිත පන්දු වාර කොටසේදී අපේ ක්රීඩකයො ශ්රේණිගතවෙලා ඉන්නෙ මෙහෙම.
• චරිත් අසලංක 25
• පැතුම් නිස්සංක 29
• කුසල් මෙන්ඩිස් 48
• දිමුත් කරුණාරත්න 88
• ධනංජය ද සිල්වා 90
• සධීර සමරවික්රම 94
ඒ අනුව අපේ පිතිකරණ ලැයිස්තුව තියෙන්නෙ ඔය තත්ත්වයේ. ඊළඟට පන්දු යවන්නො. ඒ අයගෙ තත්ත්වය ඊටත් වඩා ශෝචනීයයි.
• මහීෂ් තීක්ෂණ 16
• වනිඳු හසරංග 36
• දුෂ්මන්ත චමීර 74
• කසුන් රාජිත 96
මේ අය අතරින් පළමු තරගයට ක්රීඩා කරන එක සීයට සීයක්ම ස්ථිර ක්රීඩකයෙක්ට ඉන්නෙ කසුන් රාජිත විතරයි. යම් විදියකින් ඒක එහෙම වුණොත් අපි ලෝකයෙ අංක එකේ පිතිකරන ලැයිස්තුවලට මුහුණ දෙන්නෙ ශ්රේණිගත කිරීම්වල අංක 94 ඉන්නෙ ක්රීඩකයෙක් සහ පළමු සියදෙනා අතරවත් නැති පන්දු යවන්නන් එක්ක.
ඒත් අනිත් රටවල් එහෙම නෑ. ඒ අය ඉන්නෙ අංක එකේ පිතිකරුවො, අංක එකේ පන්දු යවන්නො එක්ක.
පාකිස්තානයට ඉන්නවා අංක එකේ පිතිකරුවා බාබර් අසාම් සහ අංක හයට ශ්රේණිගත වුණු ඉමාම් උල් හක්. පන්දු යවන්නන්ගෙන් ඉන්නවා අංක හයට ශ්රේණිගත වුණ සහීන් ශා අෆ්රෙඩි.
ඉන්දියාවට අංක එකේ පන්දු යවන්නා විදියට මොහොමඩ් සිරාජ් ඉන්නවා. පිතිකරු ලැයිස්තුවෙ අංක දෙක ස්ථානය සුබ්රමනියම් ගිල් හිමිකර ගන්න කොට නමය සහ දහය ස්ථානවල ඉන්නෙ පිළිවෙළින් විරාත් කෝලි සහ රෝහිත් ශර්මා. ඒ වගේම හොඳම තුන් ඉරියව් ක්රීඩකයො අතර හත්වෙනි ස්ථානයෙ ඉන්නෙ පාණ්ඩියා.
දකුණු අප්රිකාවෙ රස් වැන් ඩූසෙන් පිතිකරුවන් ශ්රේණිගත කිරීමේ තුන්වැනි ස්ථානය ලබාගෙන තියෙනවා. ඒ වගේම ක්වින්ටන් ඩි කොක් අංක හතත් හෙන්රිච් ක්ලාසෙන් අංක අටත් වෙලා තියෙන බව පේනවා.
නවසීලන්තයෙ ට්රනේට් බෝල්ට් පන්දු යවන්නන්ගෙ ශ්රේණිගත කිරීමේ පස්වැනි ස්ථානය හිමිකරගන්න අතරෙ නමවෙනි ස්ථානයෙ ඉන්නෙ මැට් හෙන්රි.
බංගලිදේශය ශක්තිය වෙන්නෙ තුන් ඉරියව් ක්රීඩකයො. සුපුරුදු විදියටම අංක එකේ තුන් ඉරියව් ක්රීඩකයා ශකීබ් අල් හසන්. අංක අට ඔහුගෙම අඩිපාරෙ යන මෙහෙදි හසන් මිරාජ්.
ඇෆ්ගනිස්ථානය ගැන නම් අහන කොටත් බය හිතෙනවා. මේ වතාවෙ පෙරළියක් කරනවා නම් අනූ හයේ ලංකාව කළා වගේම කරන්න ඇෆ්ගනිස්තානයට පුළුවන්. ශ්රේණිගත කිරීම්වල පළමු දහදෙනා අතරෙ තුන් දෙනෙක්ම ඇෆ්ගන් ක්රීඩකයො. මුජීබ් උර් රහමාන් අංක තුනත් රෂීඩ් ඛාන් අංක හතරත් වෙනකොට අංක දහය වෙලා තියෙන්නෙ මොහොමඩ් නබී. තුන් ඉරියව් ක්රීඩකයො අතරින් නබී දෙවැනි තැනට එනකොට රෂීඩ් එතැනත් ඉන්නෙ අංක හතරෙ.
ඔස්ටේ්රලියාවත් කොහොමත් වගේ ලෝක කුසලානයේ දි භයානක කණ්ඩායමක්. පිතුකරුවන් අතරෙ අංක හතරෙ ඉන්න ඩේවිඩ් වෝනර් ඔවුන්ට ඉන්නවා. පන්දු යවන්නො අතරෙ හේසල් වුඩ් ඉන්නෙ සිරාජ් එක්ක සමාන ලකුණු සහිතව අංක එකේ. ඇඩම් සම්පා අංක හත, මිචෙල් ස්ටාක් අංක අට. ඒ නිසා මේ වතාවෙ ලේසි වෙන්නෙ නෑ.
යම් පසුබෑමක් පේන්නෙ එංගලන්තයෙ විතරයි. ඒ අයගෙ කිසිම ක්රීඩකයෙක් නෑ පළමු අංක දහයෙ ශ්රේණිගත වුණු. ඒත් ක්රිස් වෝල්ස් පන්දු යවන්නො අතර අංක දොළහෙ ඉන්නවා. ඩේවිඩ් මාලන් අංක පහළොවෙත් ජෝස් බට්ලර් අංක දාහතත් ජේසන් රෝයි අංක දහනමයත් ජොනී බැරිස්ටො අංක විසිදෙකෙත් ඉන්නෙ අපිට ඉස්සරහින්.
ක්රිකට් කියන්නෙ ශ්රේණිගත කිරීම නෙමෙයි. නවසීලන්තයෙ රුචින් රවීන්ද්ර එංගලන්තයට දුවන්න ගැහුවෙ පළමු තරගෙන්ම වේගවත් ශතකයක් එක්ක. ඔහු ඒ වෙනකොට ඔය එක ලැයිස්තුවකවත් නෑ. ඒ නිසා අපිට බලාගෙන ඉන්න පුළුවන්. ඒත් ඉතින් අපිට අපේ කොල්ලන්ට කියන්න තියෙන්නෙත් ‘පරිස්සමට, බලාගෙන…’ කියලා තමයි. මොකද දැන් ක්රිකට් වෙනස්. එන හැමෝම එන්නෙ ලකුණු හාරසීයක් හිතේ තියාගෙන.
දෙසිය පනහක්, දෙසිය අසූවක් ගහලා බෑ. ඒ නිසා ගහන්නම වෙනවා.
ජීවන පහන් තිළිණ
