මහනුවර සරත් සමරනායක
-“දේශගුණික විපර්යාස හමුවේ තිරසාරත්වය සඳහා වූ පාරිසරික කළමනාකරණය පිළිබඳ ගවේෂණය“ යන තේමාව යටතේ පාරිසරික තිරසාරත්වය පිළිබඳ ජාත්යන්තර සම්මන්ත්රණයක් අද (25) දින පේරාදෙණිය විශ්වවිද්යාලය පරිශ්රයේදී පැවැත්වීමට සියලු කටයුතු සූදානම් කොට ඇත.Sri Lanka Latest News
පාරිසරික විද්යා ක්ෂේත්රයේ නවතම විද්යාත්මක දැනුම පර්යේෂකයන්, විද්වතුන් සහ ප්රතිපත්ති සම්පාදකයින් අතර බෙදා හැරීමේ අරමුණින් පේරාදෙණිය විශ්වවිද්යාලයේ පාරිසරික තිරසාරත්ව කේන්ද්රය මඟින් ද්වි වාර්ෂිකව දියත් කරනු ලබන ජාත්යන්තර සමුළුව මෙවර, එනම් 2023 වර්ෂයේදී පැවැත්වෙන්නේ තෙවන වරටය.
පේරාදෙණිය විශ්වවිද්යාලීය පාරිසරික තිරසාරත්ව කේන්ද්රය (Center for Environmental Sustainability) පාරිසරික තිරසාරත්වය තහවුරු කිරීමෙහිලා සෑම විටම පෙනී සිටිමින් කැපී පෙනෙන සේවාවක් ඉටු කරන, පේරාදෙණිය විශ්වවිද්යාලයේ වඩාත් ක්රියාකාරීම ආයතනයක් ලෙස හඳුන්වා දිය හැකිය.
ශ්රි ලංකා විශ්වවිද්යාල ප්රතිපාදන කොමිෂන් සභාවේ උප සභාපති ජ්යෙෂ්ඨ මහාචාර්ය චන්දන උඩවත්ත මැතිතුමන් මෙම සමුළුවේ ප්රධාන ආරාධිත අමුත්තා වශයෙන්ද, ජාතික පවිත්රකාරක නිෂ්පාදන මධ්යස්ථානයෙහි (National Cleaner Production Center) ප්රධාන විධායක නිලධාරී, ඉංජිනේරු සමන්ත කුමාරසේන මහතා ප්රධාන කථිකයා වශයෙන්ද මේ සඳහා සම්බන්ධ වේ.
මෙම සමුළුවේ ප්රධාන අරමුණු නම් පර්යේෂණ, නව නිපැයුම්, සංවාද සහ භාවිතය තුළින් පාරිසරික ගැටලු සහ දේශගුණික විපර්යාස පදනම් කරගත් අභියෝග සඳහා විසඳුම් යෝජනා කරමින් පාරිසරික තිරසාරත්වය ළඟා කර ගැනීමට අවශ්ය වේදිකාවක් සැපයීමයි.
ඒ අනුව මෙම සමුළුව සඳහා ශ්රි ලංකාවේ නන් දෙසින් පර්යේෂණ සාරාංශ සියයක් පමණ ඉදිරිපත් වී ඇති අතර, ඒ අතුරින් විශිෂ්ටතම පර්යේෂණ සාරාංශ කිහිපයක් තෝරාපත් කරගැනීමට නියමිතය.
පරිසර විද්යාවේ විවිධ විෂය ක්ෂේත්රවල පර්යේෂකයන්ට සහ විද්වතුන්ට තම පර්යේෂණ සොයාගැනීම් ඉදිරිපත් කිරීමට, විද්වත් කතිකාවන් සඳහා සහභාගී වීමට සහ පාරිසරික තිරසාරත්වය ළඟා කර ගැනීම සඳහා පරිසරය කාර්යක්ෂමව කළමනාකරණය කිරීමට මෙන්ම නව විසඳුම් යෝජනා ඉදිරිපත් කිරීමට මෙම සමුළුව වේදිකාවක් වේ. තව ද විශ්වවිද්යාල, විවිධ පර්යේෂණ ආයතන, රාජ්ය සහ පෞද්ගලික අංශයේ සංවිධාන සහ කර්මාන්ත ඇතුළු පාරිසරික ප්රතිපත්ති සම්පාදකයින් මෙම අවස්ථාවට සම්බන්ධ වීමට නියමිතව ඇත. මෙම සමුළුවේ සමාරම්භක උළෙල හෙවත් ප්රධාන දේශනයක් ද එදින විශ්වවිද්යාල පරිශ්රයේදී පැවැත්වේ.
මානව ක්රියාකාරකම් පදනම් කරගත් දේශගුණික විපර්යාස, ස්වභාවික සම්පත් අධික ලෙස සූරාකෑම, පරිසර දූෂණය, දුර්වල අපද්රව්ය කළමනාකරණය සහ මහජනතාව අතර පාරිසරික දැනුවත්භාවය නොමැතිකම නිසා ලෝකය මුහුණ දෙන ප්රධාන ගැටලු තිරසාර අන්දමින් නිරාකරණය කරමින් මහජනයා අතර පාරිසරික දැනුවත්භාවය වැඩි දියුණු කිරීමට මෙම ජාත්යන්තර සමුළුව බුද්ධිමය පිටුබලයක් වනු ඇති බව මෙහි සංවිධායක මණ්ඩලය පවසයි .
