ඓතිහාසික දික්වැල්ල වැවුරුකන්නල බුදු රජ මහා විහාරස්ථානයේ විදුලි බිල රුපියල් දසලක්ෂ පනස්හතර දහස් එකසිය දහඅටක් වීම හේතුවෙන් විදුලි බලය විසන්ධි කිරීමට ලංකා විදුලි බල මණ්ඩලය ඊයේ (ජූනි 19) කටයුතු කළේ ය. Sri Lanka Latest News
මෙය පූජා නගරයක් ලෙස 1988 වර්ෂයේ නම් කිරීමත් සමග මෙම විහාරස්ථානය සඳහා විදුලි බිල සහනය ලබා දී ඇති අතර පසුගිය දා විදුලි බිල් වැඩි කිරීමත් සමග විහාරස්ථානයේ මෙලෙස අධික විදුලි බිලක් එකතු විය.
මෙම විහාරස්ථානයට දිවයිනේ නන් දෙසින් දේශීය විදේශීය බැතිමතුන් පැමිණෙන අතර ඓතිහාසික වටිනාකමකින් ද යුතු විහාරස්ථානයකි.
එමෙන් ම, සමාජ මෙහෙවරක් ලෙස මෙම විහාරස්ථානය මගින් පිරිවෙන් දෙකක් පවත්වාගෙන යන අතර විහාරස්ථානය මගින් පාසලක් ද පවත්වාගෙන යයි.
ආගමික, ශාසනික සහ සමාජීය මෙහෙවර රාශියක් සිදු කරන මෙම විහාරස්ථානය ඊයේ (ජූනි 19) දින සිට විදුලි බලය නොමැති වීමෙන් අන්ධකාරයේ පවතී.
විශේෂයෙන් ම මෙම විහාරස්ථානයේ සියක් රියන් උස පිළිම වහන්සේ නමක් වැඩ සිටී.
අපායේ දර්ශන විදහා දැක්වෙන උමං විහාරය ඇතුළු අංග රාශියකින් සමන්විත වැවුරුකන්නල විහාරස්ථානයේ විහාරාධිපති විශ්රාමික පරිවේණාධිපති කරතොට පඤ්ඤාසීල නායක හාමුදුරුවන් වහන්සේ ඉතා සංවේදීව සිටි අතර උන්වහන්සේ අදහස් දක්වමින් පැවසූයේ, 1969 වසරේ මෙම දික්වැල්ල ප්රදේශයට සහ විහාරස්ථානයට විදුලි බලය ලබා දුන් අතර දික්වැල්ලට විදුලි බලය ලබා දීමට පෙර මෙම ඓතිහාසික වැවුරුකන්නල රජ මහා විහාරස්ථානයට විදුලිය ලබා දීමට කටයුතු කළ බව ය.
“ඒ වගේ ම, 2008 වර්ෂයේ අගෝස්තු මස 30 වන දින වර්තමාන අග්රාමාත්ය දිනේෂ් ගුණවර්ධන එවකට පූජාභූමි හා නාගරික සංවර්ධන අමාත්යවරයා ලෙස සිටින කාලයේ මේ ස්ථානය පූජා භූමියක් බවට පත් කරමින් මුල්ගල් තැබුවා. අද වන විට අප විහාරස්ථානය සම්පූර්ණයෙන් ම අන්ධකාරෙන් පවතිනවා. ඒ වගේ ම ගමේ ජනතාව, මේ අවට බොහෝ දෙනෙක් ඉතාමත් දුකින් සිටින්නේ විහාරස්ථානය අද අඳුරෙන් පවතින නිසා.
ඇත්ත වශයෙන්ම මේ කර ගත්තේ මහා අකුසල කර්මයක්, පාප කර්මයක්. මේ තරම් විශාල මුදලක් අපට ගෙවන්න හැකියාවක් නැහැ. ඒ නිසා මම හිතනවා ඓතිහාසික වැවුරුකන්නල රජමහා විහාරය තව බොහෝ දිනක් අඳුරේ තියන්න වේවි කියලා.”
