හතර වැනි තට්ටුවට ගිය විජය

අසූව දශකයේ අගභාගයේ ජේ.ආර්. ජයවර්ධන පාලන සමයේ නැක්සලයිට් කුමන්ත්‍රණ සිද්ධිය සම්බන්ධයෙන් රහස් පොලිසිය විසින් අත්අඩංගුවට ගත් සිනමා නළු විජය කුමාරතුංග මහතා රහස් පොලිසියේ හතරවැනි තට්ටුවට ගෙනගොස් ඔහුගෙන් පැය ගණන් ප්‍රශ්න කළේ එවකට රහස් පොලිසියේ අධ්‍යක්ෂව සිටි ටිරල් ගුණතිලක මහතාය.

මෙම කුමන්ත්‍රණ සිද්ධිය ගැන පරීක්ෂණ පැවැත්වීම සඳහා නැක්සලයිට් නමින්ම වෙනම පරීක්ෂණ අංශයක්ද පිහිටුවා තිබුණ අතර එම අංශයේ ආරක්ෂාවට යොදවා තිබුණේද රහස් පොලිසියයි.

එවකට මා දවස කර්තෘ මණ්ඩලයේ සේවය කරද්දී විජය අත්අඩංගුවට ගෙන ප්‍රශ්න කිරීමේ සිද්ධිය දිනපතා අලුත් පුවත් මවන සිද්ධීන් බවට පත්වී තිබුණු අයුරු තවමත් උණුසුම් මතකයන් සේ සිත තුළ මතුව එයි.

විජය කුමාරතුංග මහතා රහස් පොලිසිය විසින් අත්අඩංගුවට ගෙන රඳවා තබාගෙන ප්‍රශ්න කරද්දී ඔහුට ආහාරපාන රැගෙන ගියේ ඔහුගේ බිරිය වන හිටපු ජනාධිපති චන්ද්‍රිකා බණ්ඩාරනායක කුමාරතුංග මහත්මියයි.

පැය ගණන් රහස් පොලිස් ප්‍රශ්න කිරීම්වලදී විජය කුමාරතුංග මහතා අක්ෂි ආබාධයකට පවා ලක්වීමට ගිය බව එවකට රහස් පොලිසියේ සිටි විශ්‍රාමික පොලිස් නිලධාරියකු සඳහන් කළ බව මට මතකය.

ඔහුගේ අසනීප තත්ත්වය නිසාම ඔහු නිදහස් කර ගැනීමට චන්ද්‍රිකා බණ්ඩාරනායක මහත්මිය හිටපු ජනාධිපති හමුවීමට ගිය බවක්ද මාධ්‍යවල පළවී තිබිණි.
කෙසේ හෝ විජයගේ නරක කාලය ගෙවීයත්ම ඔහු නැක්සලයිට් කුමන්ත්‍රණයෙන් නිදහස් විය. ඔහු රහස් පොලිසියේ අඳුරු තැන්වලින් එළියට ආවේ ඉන් පසුව බව එවකට මාධ්‍ය වාර්තා කර තිබිණි.

ටිරල් ගුණතිලක මහතාගේ ප්‍රශ්න කිරීම් රටාවේ ගැබ්වී තිබුණේ ශාරීරික වධහිංසා නොව මානසිකව බිඳවැටීම් සිදුකොට කෙසේ හෝ ප්‍රශ්නයට උත්තර ලබාගැනීමයි.
ප්‍රේමලාල් විජේරත්න