පසුගිය දිනෙක ශ්රී ලංකා ප්රජාතාන්ත්රික සමාජවාදී ජනරජයේ නව අගමැතිතුමන්ගේ පළමු නිල සංචාරය සිදුවිය. ඒ ඉන්දියාවටය. කොහොමත් අපේ රටේ ජනාධිපතිතුමන්ගේ පළමු නිල සංචාරය වුණේත් ඉන්දියාවටය. මෙදා එහෙම ඉන්දියාවට ගිය පිරිස අතරට ගම්පහ දිස්ත්රික් පාර්ලිමේන්තු මන්ත්රි ප්රසන්න රණවීරද ඇතුළුව සිටියේය. ඔහු මේ සංචාරයේදී විවිධ ඡායාරූප පළකරමින් විවිධ කතා සමාජ ජාල ඔස්සේ පළ කළේය. ඒ අතර සමහර ප්රකාශ සමාජ ජාලාවල කතාබහටද ලක්විය. කොහොමත් පුවත් මවන්නෙක් වූ ප්රසන්න රණවීර පසුගිය වතාවක පාර්ලිමේන්තුවේ කතා නායක පුටුවට වතුර දැමීම්, මිරිස් කුඩු ගැසීම් ආදියටද චෝදනාවට ලක්විය. නමුත් ඒ කිසිවක් ඔප්පු වී නැති අතර, ඔහු ගම්පහ දිස්ත්රික්කයේ වැඩි ඡන්ද ප්රමාණයක් සහිත පාර්ලිමේන්තුවට පත්වූ මන්ත්රිවරයෙකි.
අපි මේ ඉන්දීය සංචාරය ගැන ඔහු සමඟ කළ කතාබහකි.
තමන්ගෙ පළමුවැනි නිල සංචාරය විදියට ඉන්දියාවට ගිය අගමැති මහින්ද රාජපක්ෂ මහත්තයා ඔබව එක්ක ගියා නේද? ඒ කොහොමද තෝරා ගත්තේ?
මේ සංචාරය සඳහා එතුමා තෝරාගත්තෙ ඊට අදාළ පිරිස. මේ සංචාරයෙදි සාකච්ඡා වෙච්ච මාතෘකාවලට අදාළ පිරිස තමයි එක්ක ගියේ. ඒ යන අය තෝරගත්තෙ ඒ විදියට.
ඒ පිරිස?
අපි ඒ ගියපු වෙලාවෙ අපි කතා කළා. ධීවර ප්රශ්න සම්බන්ධව. ඒ නිසා ධීවර අමාත්ය ඩග්ලස් දේවානන්ද මහත්තයා, ඒ වගේම නිවාස ප්රශ්න සම්බන්ධව කතා කළා. ඒ සඳහා තොණ්ඩමන් ඇමැතිතුමා. මේ විදියට නිවාස සම්බන්ධ දේවල් කතා කළා. විශේෂයෙන් කැලණි ගඟෙන් එගොඩට වගේම මෙහාටත් නිවාස ව්යාපෘති කීපයක් දෙන බව කීවා. ඒ ගැන සාකච්ඡා කරන්නයි මම සහභාගි වුණේ.
ඉන්දියාවෙදි සාකච්ඡා වුණේ මොනවද?
ඉන්දියාවෙ අගමැතිතුමා එක්ක විවිධ මාතෘකා සාකච්ඡා වුණා. ඒ අතර කියැවුණා කෙලවරපිටිය බලාගාර ව්යාපෘතිය ගැන. ඒ වගේම වරාය නැඟෙනහිර පර්යන්තය ගැන. ඒ අතර නිවාස ව්යාපෘති සහ අපි ඉන්දියාවට ගෙවන්න තියෙන ණය සම්බන්ධව යම් සහන ලබා ගැනීම ගැනත් සාකච්ඡා කළා.
දේශපාලන නායකයන්ගෙන් ඒ පිළිබඳ ලැබුණ ප්රතිචාර කොහොමද?
ප්රතිචාර ඉතාම හොඳයි. අපේ ඉල්ලීම්වලට හොඳ ප්රතිචාර ලැබුණා.
එතකොට ණය වාරික ගෙවීම් සම්බන්ධව?
ඒ සම්බන්ධව නිශ්චිත පිළිතුරක් ලැබුණෙ නෑ. සාකච්ඡා කරලා පිළිතුරක් දෙන්නම් කියලා තමයි කිව්වේ. සුබවාදී මට්ටමකින් ඒ ගැන කතා කෙරුණා.
එතකොට ඉන්දියානු ජනතා ප්රතිචාරය?
ඉතාම හොඳයි. මං හිතන්නෙ ලංකාවට වඩා හොඳයි.
විරෝධතා මොනවත්ම නෑ?
නෑ. කිසිම තැනක නෑ.
දකුණු ඉන්දියාවටත් ගියාද?
තිරුපති ගියා.
ඔබත් සහභාගි වුණාද සාකච්ඡාවලට?
ඔව්. මම හැම සාකච්ඡාවකටම සහභාගි වුණා. අගමැතිතුමා එක්ක. රාහුල් ගාන්ධිත් එක්ක.
යන එන අතරතුරේ මහින්ද මහත්තයා මොනවද කිව්වේ?
එතුමා කිව්වෙ පසුගිය ආණ්ඩුව මේ රට ණය කරපු එක ගැන. අපිට මේ ණය වාරිකය ගෙවීමේ අපහසුව ගැන කතා කළා. මේක ගෙවීමේ කාල පරිච්ඡේදය දික් කරගන්න එක ගැන නිතර කතා කළා.
එතුමා ඇමැතිකමක් නොදුන්නෙ ඇයි කියලා කිව්වෙ නැද්ද?
නෑ. නෑ. ඒක මට ප්රශ්නයක් නෙමේනෙ. මම ඔය කැබිනට් අමාත්යාංශ පහළොවේ කතාව දැනගත්ත ගමන්ම ඩලස් ඇමැතිතුමාටයි, බැසිල් රාජපක්ෂ මහත්තයටයි කතා කරලා කිව්වා මට එපා කියලා.
ඔබට සමාජ ජාලවල හරියට චෝදනා තියෙනවා. පාර්ලිමේන්තුවෙ පරණ කතා, අරවා මේවා ගැන. ඒවා දැක්කද?
ඕවා කවුද ගණන් ගන්නේ. මම සමාජ ජාලාවල චෝදනා ගණන් ගන්නේ නෑ. මං පොඩි තැනකින් ආපු මිනිහෙක්නෙ. මමත් ටයි කෝට් දාලා ලොකුවට හිටියා නම් මටත් හොඳ කියයි. මම පොඩි තැනින් ආපු මිනිහනෙ. ඒ නිසා මට ගහනවා. මම ඕවට සැලෙන්නෙ නෑ.
පුංචි තැනක ඉඳලා ආපු කෙනෙක් අද ඉන්දියාවෙ අගමැති එක්ක ඉන්න එක ආඩම්බරයක් කියලත් සමහරු කියලා තිබුණා?
ඔව්. මම මෝඩි අගමැතිතුමා එක්ක බොහෝ දේ කතා කළා. අපි පුංචි තැනින් ගමේ ඉස්කෝලෙන් පටන් අරගෙන ආපු මිනිස්සු. ප්රාථමික විද්යාලයෙන්, කනිෂ්ඨයෙන්, මහා විද්යාලයෙන්, මධ්යමහා විද්යාලයට ගියපු අය.
මම සජිත් ප්රේමදාස මහත්තයට අභියෝග කළා තමන්ගෙ අධ්යාපන සුසුදුකම් ඔප්පු කරන්න කියලා. අපි ළඟ නිවැරැදි සහතික තියෙනවා.
ඔය උගතුන් පාර්ලිමේන්තු යැවිය යුතුයි කියන එක එක්ක ඔබ එකඟද?
ඇයි දැන් පාර්ලිමේන්තුවෙ උගතුන් නැද්ද? උගත්තු පත් කරලා කරගත්ත හරිය මදිද? උගත්තු නෙමෙයි බුද්ධිමත්තු එවන්න ඕනෙ. මම ගමේ ඉස්කෝලෙන් පටන් අරගෙන උසස් පෙළ වාණිජ අංශයෙන් හදාරපු කෙනෙක්. කැලණිය ප්රාදේශීය සභාවෙ දෙපාරක් උප සභාපති වෙලා සභාපති වෙලයි මෙතැන්ට ආවෙ. මිනිස්සු අපි ගැන දන්නවා.
හැබැයි ගම්පහ මිනිස්සුන්ට චෝදනාවක් තියෙනවා වැරැදි මිනිස්සුත් එවනවා කියලා නිතරම?
මම එහෙම කියන්නෙ නෑ. ගම්පහ මිනිස්සු නිතරම වගේ විශ්වාස කරනවා රන්ජන්ලා වගේ ප්රායෝගික නැති මිනිස්සුන්ගෙ වචනවලට රැවටෙනවා. ඒත් ගම්පහ උපන් මිනිස්සු. අපි ජනතාවගේ දුක කඳුළ අඳුනනවා. ඒ නිසයි ජනතාව අපිව පාර්ලිමේන්තු යවන්නෙ.
අර ගාන්ධිතුමාගෙ මුනුපුරාව පටලගත්ත කතාවක් සමාජ ජාලවල අපි දැක්කා?
ඒක මම දැම්ම එකක් නෙමේ. ඇත්තටම ඒක දානකොටත් මම එහෙ. රාහුල් ගාන්ධි කියන්නෙ ඉන්ධිරා ගාන්ධිගෙ මුනුපුරා. ඒත් එයා මහත්මා ගාන්ධිගෙත් ඥාති වෙනවා. මම හිතන්නෙ මී මුනුපුරෙක්. ඒ නිසා ඒක මුනුපුරෙක් කිව්වට ගැටලුවක් නෑ.
ජීවන පහන් තිලිණ
