මාස දෙකකට ආසන්න කාලයක් තිස්සේ වනජීවී පශු වෛද්යවරුන්ගේ ප්රතිකාර ලබමින් සිටි යාල ජාතික වනෝද්යානයේ සිටි විශාලතම දළ ඇතා වන ‘දළ කොටා’ පසුගියදා (21) ලුණුගම්වෙහෙර ජලාශයේ වැටී මියගොස් සිටියදී වනජීවී නිලධාරීන් විසින් සොයාගෙන තිබේ.
මිය යන විට වයස අවුරුදු 40ක් පමණ වූ මෙම දළ ඇතා යාල ජාතික වනෝද්යානයේ කලාප අංක 06හි වැඩි වශයෙන් ජීවත්ව සිට තිබේ. මියගිය මෙම දළ ඇතා යාල ජාතික වනෝද්යානයේ සිටි විශාලතම දළ ඇතා වන අතර වනෝද්යානය නැරඹීමට පැමිණෙන සංචාරකයන්ගේ මහත් ආකර්ෂණයට ලක්ව තිබූ සත්ත්වයකු ලෙසද ඉතා ප්රකටය. දැනට මාස දෙකකට ආසන්න කාලයක් තිස්සේ මෙම දළ ඇතා අසනීපව සිට ඇති අතර වනජීවී පශු වෛද්ය ආනන්ද ධර්මකීර්ති මහතා ඇතුළු වනජීවී නිලධාරීන් එක්ව මෙම සත්ත්වයා බේරා ගැනීමට අවශ්ය ප්රතිකාර සිදු කර ඇතත් මෙම සත්ත්වයා බේරා ගැනීමට නොහැකිව තිබේ.
පසුගිය 21 වැනිදා දළ ඇතා ලුණුගම්වෙහෙර ජලාශයේ වැටී සිටියදී සොයාගෙන තිබූ අතර එදිනම ඒ සම්බන්ධයෙන් වනජීවි නිලධාරීන් විසින් තිස්සමහාරාම මහේස්ත්රාත් අධිකරණයට කරුණු වාර්තා කර තිබේ. ඒ අනුව තිස්සමහාරාම මහේස්ත්රාත් අධිකරණයේ වැඩ ලබන මහේස්ත්රාත් රංජිත් ආන්නද මහතා සිරුර පිළිබඳ පශ්චාත් මරණ පරීක්ෂණයක් සිදු කිරීමට නියෝග කර තිබේ. ඒ අනුව යාල ජාතික වනෝද්යානයේ වනජීවී නිලධාරීන්ගේ සහාය ඇතිව පශු වෛද්ය ආනන්ද ධර්මකීර්ති මහතා විසින් පශ්චාත් මරණ පරීක්ෂණය පෙරේදා (22) සිදු කරන ලදි. ඌව පළාත් සහකාර වනජීවී අධ්යක්ෂ උපුල් ඉන්ද්රජිත්, ජාතික උද්යාන භාරකරු ඩබ්ලිව්.ජේ.කේ. හේරත් යන මහත්වරුන්ගේ උපදෙස් පරිදි යාල ජාතික වනෝද්යානයේ වනජීවී නිලධාරීහු වැඩිදුර විමර්ශන පවත්වති.
