ශ්රී ලංකාවේ ඉන්දීය මහකොමසාරිස්වරයා වශයෙන් කටයුතු කළ තරන්ජින් සිං සන්දු මහතා සිය නිල කාලය නිමා කර ඉන්දියාව බලා පිටත්ව යෑමට කටයුතු කළේ පසුගිය සතියේය. ඒ වෙනුවෙන් කොළඹ පිහිටි ‘ඉන්දියා හවුස්’හිදී මෙරට දේශපාලනඥයන් හා ප්රභූ පුද්ගලයන් වෙනුවෙන් රාත්රි භෝජන සංග්රහයක් පැවැත්වීමට හිටපු මහකොමසාරිස්වරයා කටයුතු කර තිබිණි. එහිදී දැකගන්නට ලැබුණු විශේෂම සිදුවීම වූයේ පක්ෂ – විපක්ෂ භේදයකින් තොරව දේශපාලන ක්ෂේත්රයේ විශාල පිරිසක් ඊට සහභාගි වී සිටීමය. ඒ අතර ජනාධිපති ගෝඨාභය රාජපක්ෂ, අගමැති මහින්ද රාජපක්ෂ, හිටපු ජනාධිපති චන්ද්රිකා කුමාරතුංග, හිටපු අගමැති රනිල් වික්රමසිංහ, විපක්ෂ නායක සජිත් ප්රේමදාස, ශිරන්ති රාජපක්ෂ මහත්මියද සිටියහ. මේ සියලු දෙනා අතර කුමන දේශපාලන මතිමතාන්තර තිබුණද මෙම රාත්රි භෝජන සංග්රහයේදී ඒ සියලු දෙනාම සිනාසෙමින්, එකිනෙකා සමඟ ඉතාම සුහදශීලී ආකාරයට කතාබස් කරමින් සිටිනු දැකගත හැකි විය.
කෙසේ වෙතත් මෙහිදී දැකගන්නට ලැබුණු විශේෂම සිදුවීම වූයේ පැමිණ සිටි සියලු දෙනාම සකස් කර තිබූ ආහාරපානාදිය භුක්ති විඳිද්දී ගෝඨාභය පමණක් වතුර වීදුරුවක් හෝ නොබී සිටීමය. ගෝඨාභය නිර්මාංශ අයකු වීම නිසා නිර්මාංශ ආහාර රැසක්ම භෝජන සංග්රහයට ගෙනැවිත් තිබුණද ගෝඨාභය ඒ පැත්තටවත් නොපැමිණීම කාටත් විශාල ප්රශ්නයක් විය. ඒ අනුව කිහිප දෙනකුම ගෝඨාභයට කෑමට ආරාධනා කළ විට ඒ ආරාධනාව කාරුණිකව ප්රතික්ෂේප කළ ගෝඨාභය ඊට හේතුව පිරිසට පැහැදිලි කිරීමටද කටයුතු කළේය. එහිදී ගෝඨාභය කියා සිටියේ තමන් අද රාත්රියේම වෛද්ය පරීක්ෂණ කිහිපයක් සඳහා සිංගප්පූරුව බලා පිටත්ව යන බවත්, එහිදී සිදුකරන පරීක්ෂණවලට සහාය දැක්වීම සඳහා මෙහි සිටම නිරාහාරව යන බවත්ය. එවිට සිංගප්පූරුවට ගිය සැණින්ම තමන්ට වෛද්ය පරීක්ෂණවලට පෙනී සිට අනෙක් පැත්තට නැවැත ලංකාවට පැමිණිය හැකි බවද ගෝඨා මෙහිදී පිරිසට පැහැදිලි කර සිටියේය.
ඒ අනුව ‘ඉන්දියා හවුස්’හි සිට කෙළින්ම ගෝඨාභය ගියේ කටුනායක ගුවන් තොටුපොළටය. වෙනදා සිටි ජනාධිපතිවරුන් නම් පෞද්ගලික සංචාරයක් සඳහා විදෙස්ගත වීමේදී රොත්ත, බුරුත්ත පිටින් ආණ්ඩුවේ මුදලින් ගියද ගෝඨාභය ඊට හාත්පසින්ම වෙනස්ව කටයුතු කරනු මෙහිදී දැකගත හැකි විය. ඒ අනුව ගෝඨාභය සමඟ සිංගප්පූරු ගමනට එක්ව සිටියේ තව දෙදෙනකු පමණි. ඒ, ජනපති බිරිය වූ අනෝමා රාජපක්ෂත්, තවත් එක් ආරක්ෂක නිලධාරියකුත් පමණක්ය. අනෙක් අතට මෙම ගමනට යන සම්පූර්ණ වියදම ගෝඨාභය සිය පෞද්ගලික මුදලින්ම පියවනු ලැබිණි.
ඒ අනුව කටුනායකට ගිය ගෝඨාභය ගොඩ වූයේ සිංගප්පූරුව බලා යන එම රටට අයත් ගුවන් යානයකටය. එහිදී මේ තිදෙනාටම වෙන් කරගෙන තිබුණේ සාමාන්ය පන්තියේ ප්රවේශපත්රය. නැතහොත් ‘ඉකොනොමි ක්ලාස්’ ප්රවේශ පත්රය. කෙසේ වෙතත් සිංගප්පූරු ගුවන් සේවයේ නිලධාරීන් මෙහිදී ඊට එකඟතාව පළ නොකිරීම විශේෂ සිදුවීමක් විය. ඔවුන් ගෝඨාභයට පෙන්වා දුන්නේ තම ගුවන් සේවයට අයත් යානාවක රටක ජනාධිපතිවරයකු ගමන් කරනවා නම් ඔහුට හෝ ඇයට ව්යාපාරික පන්තියේ ආසන ලබා දියයුතු බවට නීතියක් තම ගුවන් සේවය තුළ පවතිනවා යැයි කියාය. ඒ වන විටත් යානයේ ව්යාපාරික පන්තියේ ආසන කිහිපයක්ම හිස්ව තිබූ බැවින් ගුවන් සේවා බලධාරීන් කළේ වහාම ජනාධිපතිවරයාවත්, බිරියවත් ව්යාපාරික පන්තිය වෙත රැගෙන යෑමට කටයුතු කිරීමය.
කෙසේ වෙතත් සිංගප්පූරුවට ගොඩබට වහා ජනාධිපතිවරයාව පිළිගැනීමට පැමිණ තිබුණේ ජනාධිපතිවරයාගේ එක් සහෝදරියකගේ දරුවන් දෙදෙනාය. ඒ අනුව ජනාධිපතිවරයා සිය වෛද්ය පරීක්ෂණ සඳහා රෝහල බලා පිටත්ව ගියේත් සිය සහෝදරියන්ගේ දරුවන් දෙදෙනා සමඟය.
කපිල පුංචිමාන්නගේ
