පසුගිය 2023 ජනවාරි මාසයට සාපේක්ෂව සලකා බලන විට 2024 ජනවාරි මාසය තුළ අපනයන ආදායම ආන්තික ලෙස පහළ යෑමක් පෙන්නුම් කරන බව මහබැංකු වාර්තා පදනම් කරගනිමින් පේරාදෙණිය විශ්වවිද්යාලයේ ආර්ථික විද්යා සහ සංඛ්යාන අංශයේ මහාචාර්ය වසන්ත අතුකෝරල මහතා ‘මව්රට’ට පැවැසීය. (Sri Lanka Latest News)
රට තුළ අපනයන ආදායම ඉහළ නැංවීම සඳහා නිශ්චිත වැඩපිළිවෙළක් නොමැති නිසා ගෙවුම් ශේෂයේ වෙළෙඳ භාණ්ඩ ගිණුම තුළ හිඟය ක්රම ක්රමයෙන් වර්ධනය වීමක් මේ අනුව පෙන්නුම් කරන බවයි ඔහු සඳහන් කළේ.
2022 වසරේදී අපනයන ආදායම ඩොලර් බිලියන 13.11ක් වූ අතර, 2023 වසරේදී එය ඩොලර් බිලියන 1.19කින් පමණ පහළ යෑමක් දැකගත හැකි බවයි සඳහන් වන්නේ.
මෙහිදී කාර්මික අපනයනය 2022දී ඩොලර් බිලියන 10.46ක්ව පැවැති අතර, 2023දී එය ඩොලර් බිලියන 9.27 දක්වා 11%කින් පමණ පහළ යෑමක් පෙන්නුම් කෙරේ.
රෙදිපිළි සහ ඇඟලුම් අපනයන ආදායම 18%කින්ද, ලී සහ කඩදාසි නිෂ්පාදන අපනයන ආදායම 17%කින්ද, සත්ව ආහාර අපනයන ආදායම 15%කින්ද, රබර් නිෂ්පාදන ආදායම 8%කින්ද පහළ යෑමක් 2023 වසරේදී දැකගත හැකිය.
කාර්මික අපනයන වර්ගීකරණය යටතේ ඇති භාණ්ඩ වර්ග 16න් 10ක් පමණ ඍණ වර්ධනයක් පෙන්නුම් කරන බවද සඳහන්ය.
කෘෂිකාර්මික අපනයන ඉපැයුම් ආදායමද 0.01%ක පහළ යෑමක් පෙන්වන අතර, අදාළ කාලපරිච්ඡේදය තුළ ඛනිජ ද්රව්ය අපනයන ආදායම 23%ක කඩාවැටීමක් පෙන්නුම් කරන බවයි මාහාචාර්යවරයා පවසන්නේ.
අපනයන ආදායම තවදුරටත් කඩාවැටීම මඟහරවා ගැනීමට බලධාරීන් ක්ෂණික පියවර ගත යුතුව ඇති බවද හෙතෙම වැඩිදුරටත් සඳහන් කර සිටියේය.
ප්රේමලාල් විජේරත්න
