ලංකාවේ සමුපකාර ග්රාමීය බැංකුවලින් ලබාගන්නා ණය ප්රමාණය 2022ට සාපේක්ෂව සලකා බලන විට 2023 වසරේ දෙගුණයකින් පමණ ඉහළ ගොස් ඇති බව ජන හා සංඛ්යාලේඛන දෙපාර්තමේන්තුව මගින් ඉදිරිපත් කරන ලද වාර්තාවලින් හෙළිවන බව පේරාදෙණිය විශ්වවිද්යාලයේ මානව ශාස්ත්ර සහ සංඛ්යාන අංශයේ අධ්යක්ෂ, මහාචාර්ය වසන්ත අතුකෝරල මහතා ‘මව්රට’ට පැවැසීය. Sri Lanka Latest News
2022 වසරේ ග්රාමීය සමුපකාර බැංකුවලින් ලබාගෙන ඇති ණය ප්රමාණය රුපියල් බිලියන 41.67ක් වන අතර, 2023 වසරේදී ලබාගෙන ඇති ණය ප්රමාණය රුපියල් බිලියන 81.67ක් දක්වා වර්ධනය වී ඇත.
2023 ණය ලබාගෙන ඇති ආකාරය පිළිබඳ සලකා බලන විට රුපියල් බිලියන 33ක් පමණ ණය ලබාගෙන ඇත්තේ නිවාස සඳහාය.
ස්වයං රැකියා සඳහා ලබාගෙන ඇති ණය ප්රමාණය රුපියල් බිලියන 13ක් වන අතර, නිෂ්පාදන කාර්යයන් සඳහා රුපියල් බිලියන 8කට ආසන්න මුදලක්ද, අනෙකුත් කාර්යයන් සඳහා රුපියල් බිලියන 27කට ආසන්න මුදලක්ද ණය ලෙස ලබාගෙන ඇත.
ලංකාවේ සමුපකාර ග්රාමීය බැංකුවලින් ලබාදී ඇති ණය වසර පහක කාලයක් සලකා බැලීමේදී වැඩිම ණය ප්රමාණයක් වාර්තා වන්නේ 2023 වර්ෂයේදීය. 2019දී ලබාදී ඇති ණය ප්රමාණය රුපියල් බිලියන 64ක් පමණ වූ අතර, 2020දී රුපියල් බිලියන 60ක් ලබාදී තිබේ. 2021දී රුපියල් බිලියන 49ක්ද, 2022දී රුපියල් බිලියන 41ක්ද ණය වශයෙන් ලබාදී තිබේ.
2023 වසර තුළ උකස් සේවාවන් යටතේ ලබාදී ඇති ණය ප්රමාණය රුපියල් බිලියන 22කට අධික වන අතර, එය පෙර වසරට සාපේක්ෂව සසඳා බලන විට 24%ක වැඩිවීමකි.
මෙසේ ණය ගන්නා ප්රමාණය වැඩිවීමට ප්රධාන හේතුව වී ඇත්තේ රටේ පැවැති ආර්ථික අර්බුදය හමුවේ ජනතාවගේ ජීවන වියදම ඉහළ යෑමත්, ජනතාවගේ ආදායම් මාර්ග කඩාවැටීමත් වැනි හේතු නිසා බවයි මහාචාර්යවරයා වැඩිදුරටත් පෙන්වා දෙන්නේ.
ප්රේමලාල් විජේරත්න
