ඔහු නමින් රොෂාන් මහානාම. රොෂාන් මහානාම කිව්වම බොහෝ දෙනෙක් ඔහුව දන්නවා. ඒ, ශ්රී ලංකා ජාතික කණ්ඩායම නියෝජනය කරපු ක්රිකට් ක්රීඩකයෙක් විදියට. ඔහු ටෙස්ට් තරග 52කට ක්රීඩා කරලා තියෙනවා. ලකුණු 2,576ක් අරගෙනත් තියෙනවා. ශතක 04ක් සහ අර්ධ ශතක 11ක් ඔහු රැස් කරගන්න සමත්ව තිබෙනවා. ඔහුගේ වැඩිම ලකුණු සංඛ්යාව වුණු ලකුණු 225ක් ඔහු රැස් කළේ සනත් ජයසූරිය සමග. ඒ ලෝක පූජිත සම්බන්ධතාව අපට අමතක කරන්න බෑ. එක්දින තරග 213කට ඔහු ක්රීඩා කරලා තියෙනවා. ඒ ශ්රී ලංකාිවට ලෝක කුසලානය දිනා දුන් 1996 විල්ස් ලෝක කුසලාන අවසන් මහා තරගයත් සමග. ලකුණු 5,162ක් ඔහු රැස් කරලා තියෙනවා. ශතක 04ක්, අර්ධ ශතක 35ක් මේ ජ්යෙෂ්ඨ ක්රීඩකයා රැස්කරලා තියෙනවා. වැඩිම ලකුණු සංඛ්යාව 119ක්.
ඇයි මේ වෙලාවෙ රොෂාන් මහානාම ගැන කියන්නේ? හේතුවක් තියෙනවා. 1966 මැයි 31 වැනිදා උපන්න මේ ක්රීඩකයා අද වෙනකොට පසුකරන්න සූදානමින් ඉන්නේ තමන්ගේ 56 වැනි උපන් දිනය. ඒ කියන්නේ දැන් රොෂාන් මහානාම වයසයි. ජාතික කණ්ඩායමේ නායකයා වෙයි කියලා හැමෝම මහානාම ගැන බලාපොරොත්තු තියාගෙන හිටියත් මහානාමට ජාතික කණ්ඩායමේ නායකත්වයට එන්න ලැබෙන්නේ නෑ. හැබැයි එහෙමයි කියලා ඔහු නිකන් ඉන්නෙත් නෑ. රොෂාන් මහානාම පහුකාලීන ජාත්යන්තර තරග තීරකයෙක් බවට පත්වෙනවා. ඔහු මුල්ම තරග තීරකත්වය ලබාදෙන්නේ බටහිර ඉන්දීය කොදෙව් සහ බංග්ලාදේශය අතර කිංග්ටන්වලදී 2004 වසරේ පැවැති එක්දින ජාත්යන්තර තරගයට.
මේ සියල්ල අතරතුරේ රොෂාන් මහානාම මේ වතාවෙ වැදගත් වෙන්න හේතුවක් තියෙනවා. ඒ හේතුව තමයි මහානාම මේ වතාවෙ සටන් බිමට පිවිසිය නිසා. ඔහු මේ සටනේ මූලිකත්වය ගත්ත කෙනෙක් නිසා. ඔහු මේ සටනේදී කිසිම හේතුවක් නිසා පසු නොබසින අරගලකරුවෙක් බවට පත්වෙච්ච නිසා. ශ්රී ලංකාවේ දේශපාලන අර්බුදයේදී රොෂාන් මහානාම බය නැතුව කොන්ද කෙළින් තියාගෙන එළියට බැස්සා. මහානාමත් එක්ක මුල් වතාවෙ එළියට බහින්න ලංකාවෙ ජාතික කණ්ඩායමේ ක්රීඩකයො කවුරුවත් ආවෙ නෑ. හැබැයි පස්සේ මහානාමට එකතු වුණා සනත් ජයසූරියත්. හරියට ඉන්දියාවත් එක්ක පැවැත්වුණු ටෙස්ට් තරගයේ ලෝක පූජිත සම්බන්ධතාව වගේ.
මහානාම තමන්ගෙ ෆේස්බුක් ගිණුමේ මෙන්න මෙහෙම සටහනක් තියලා තිබුණා.
‘දැඩිව කලකිරුණු හදින් මේ සටහන තබන්නේ, මගේ රට අදූරදර්ශී පාලකයන් නිසා මේ මොහොතේ පවතින ආර්ථික අවපාත තත්ත්වය දැකීමෙන්. මෙකී පාලකයන්ට වඩා මම මගේ රටට ආදරය කරන සහ දේශප්රේමී මිනිසකු යැයි මා ආඩම්බර වන්නේ අවස්ථාව ලැබී තිබියදීත් මම මෙරටින් පිට නොවී සිටින නිසායි.
මම මේ මොහොතේ ඔබ සැමගෙන් ඉල්ලා සිටින්නේ ජාතිය, ආගම, දේශපාලන පක්ෂය සහ විශ්වාස පසෙකලා එක්ව රටක් ලෙසින් නැගීසිටින ලෙසයි. මේ අප එක්ව එක හඬින් ‘දැන් ඇති’ කියා කිය යුතු මොහොතයි.
මා මෙරටේ මිනිසුන් සමග එක්ව නැගී සිටින අතර, මගේ ලස්සන මවු රට මේ අඳුරින් මුදාගෙන අනාගත පරපුරට සාමකාමී වටපිටාවක් ඇති කිරීමේ පොදු අරමුණින් මේ වෙනුවෙන් වෙහෙසෙමි.’
උපුටාගැනීම අවසානයි.
(රොෂාන් මහානාමගේ ෆේස්බුක් පිටුවෙන්.)
මහානාම ලංකාවෙන් පිටවෙලා නොයා ඉන්නේ ඔහුට යන්න බැරි නිසා නෙවෙයි කියලා අපි හැමෝම දන්නවා. මේ ලෝක පූජිත ක්රිකට් ක්රීඩකයාට ලෝකෙ ඕනෙ තරම් රටවල දොර ඇරෙනවා. ඒ ගැන කිසිම ප්රශ්නයක් නෑ. අපි දන්නවා අපේ රටේ හිටපු බොහෝ ක්රීඩකයන් දැන් ඉන්නේ අපිත් එක්ක නෙවෙයි. ඒගොල්ලො අපේ රට අතහැර දාලා ගිහින් වෙන රටවල ජීවත් වෙනවා. සමහර ක්රීඩකයො දේශපාලනයට, මේ ආණ්ඩුවට රෙදි නැතුව කඩේ ගිය අය. දැන් ඒගොල්ලො කඩේ ගිය ගමන්ම ඔස්ටේ්රලියාව වගේ රටවලට ගිහින් ඒ රටවල ස්ථිර පදිංචිකාරයො බවට පත්වෙමින් ඒ සියල්ල අතහැරල දාලා ඉන්නවා. ඔවුන් විනාශ කරපු රට ආයෙත් හදන්න ඒගොල්ලන්ට වුවමනාවක් නෑ.
රොෂාන්ගෙන් පස්සේ අපි දැක්කා කුමාර සංගක්කාර වගේ ක්රීඩකයො විවිධ සටහන් තියල තියෙනවා. මේ රටේ ක්රිකට් ක්රීඩකයො මේ මොහොතේ දරන ස්ථාවරය මොකක්ද කියලා අපි දන්නෙ නෑ. රටක ජාතික කණ්ඩායම නියෝජනය කරන ක්රීඩකයන්ට, රටක ජාතික අර්බුදයකදී ඒ රටේ රජයට එරෙහිව පාලකයන්ට එරෙහිව සටන් කළ හැකිද කියන එක සම්බන්ධ ප්රශ්නයක් තියෙනවා. මේ විදියටම තමන්ගෙ රටේ තිබුණු පාලකයන්ගෙ අදූරදර්ශීකමට එරෙහිව කැරැලි ගහපු සමහර ක්රීඩකයන්ට තමන්ගෙ රට අතහැර දාලා යන්න පවා සිද්ධ වුණා. ඇන්ඩි ෆ්ලවර්, ග්රාන්ට් ෆ්ලවර් වගේ විශිෂ්ට ක්රීඩකයන් සිම්බාබ්වේවලින් ගියේ ඒ රටේ පැවැති දේශපාලන අර්බුදයට එරෙහිව සටන් කරන්න ගිය නිසා. ඒත් ඔවුන්ගේ ක්රිකට් දිවිය එතැනින් නිමා නොවුණත්, සිම්බාබ්වේ ක්රිකට් වසන්තය එතැනින් නිමා වුණා. සිම්බාබ්වේට ක්රිකට් සුනාමියක් ඇවිල්ලා තරග එකින් එක පරදින්න පටන් අරගෙන ලෝකයේ ප්රධානතම කණ්ඩායම් කිහිපය අතර හිටපු සිම්බාබ්වේ කණ්ඩායම අදත් නැගිටින්න බැරි අගාධයකට ගිහින් තියෙන්නේ මේ ප්රශ්නය නිසාවෙන්. ඒ නිසා දේශපාලන අරගලවලදී පෙනී සිටින ක්රීඩකයන්ට එරෙහිව දේශපාලකයන් අවි ඔසවන්නට ගියොත් විනාශ වෙන්නේ ක්රීඩකයො නෙවෙයි, විනාශ වෙන්නේ ඒ රටේ ක්රීඩාව.
කොහොම නමුත් රොෂාන් මහානාම මේ මොහොතේ විශිෂ්ටයෙක් ලෙස කොන්ද කෙළින් තියාගෙන එළියට බැස්සා. හැමදාම රොෂාන් මහානාමව හඳුන්වන්නේ ක්රිකට් ක්රීඩාවෙ මහත්තයෙක් විදියට. ඒ වගේම රොෂාන් කියලා කියන්නේ අපට හිටපු දක්ෂම ක්රීඩකයෙක්. ඒ විතරක් නෙවෙයි රොෂාන්ගේ උඩපන්දු රැකීම ගැන ආයෙ අහන්න දෙයක් නෑ. රොෂාන් කියන්නේ හැඩකාරයෙක්. ලස්සන කෙනෙක්. කොහොම නමුත් මේ මොහොතෙත් රොෂාන් එල්ල කරන දැවැන්ත හයේ පහරත් අතිවිශිෂ්ටයි. ඒ නිසා අපි රොෂාන්ට ආයෙත් කියනවා ‘හුරේ…’ කියලා.
ජීවන පහන් තිළිණ
