විමල් වීරවංශ ඇතුළු ස්වාධීන පක්ෂ එක්වී නව සන්ධානයක් පිහිටුවා ගැනීම පසුගිය සති අන්තයක ගාම්භීර ලෙස සිදුවිය. මෙම අවස්ථාවට මෙරට චීන තානාපතිද ප්රධාන ආරාධිතයෙක් ලෙස සහභාගි විය. ඔහු ඇතුළු අමුත්තන් ඉදිරිපිට විමල් කීවේ ගෝඨාභය රාජපක්ෂ ගැන 2019ට කලින් තමන් දරපු මතය ඔහු ජනාධිපති වූ පසු වැරැදි බව ඔහුට තේරුම් ගිය බවය. ගෝඨාභය ජනාධිපති වූ පසු දැඩි ඇමෙරිකානු හිතවාදියකු වූ බවත්, එයට හේතුව ඔහු ජනාධිපති ධුරයෙන් විශ්රාම ගිය විට ඇමෙරිකාවේ පදිංචියට යෑමට සැලසුම් කර සිටි නිසාත්, ඔහුගේ බිරිය සහ පුතා ඇමෙරිකානු පුරවැසියන් වූ නිසා ඔහු ඇමෙරිකාව සමග ගැටුම් ඇතිකර ගැනීමට බිය වූ බවය.
විමල් වෙනත් වචනවලින් කියන්න උත්සාහ ගත්තේ ගෝඨාභය ජනාධිපති වෙන්න කලින් චීන හිතවාදියෙක්ව සිටි බවය. විමල්ගේ කතාව ඇත්තය. 2014 ඉන්දියාව කෝප ගන්වමින් චීනයේ සබ්මැරීනවලට ලංකාවට එන්න අවසර දුන්නේ එවක ආරක්ෂක ලේකම්ව සිටි ගෝඨාභයය. 2014 ඔක්තෝබර් 20 ගෝඨාභය ආරක්ෂක ලේකම් ලෙස දිල්ලියට ගොස් ඉන්දියාවේ ආරක්ෂක උපදේශක අජිත් ඩොවාල් (Ajith Doval) හමුවිය. එහිදී අජිත් ඩොවාල් ගෝඨාභයට කීවේ චීනයේ සබ්මැරීන් කොළඹ වරායට පැමිණීම ඉන්දියාවේ ආරක්ෂාවට තර්ජනයක් බවය. ගෝඨාභය එම සංචාරයට පසු ලංකාවට පැමිණ තවත් චීන සබ්මැරීන් යානයකට ලංකාවට එන්න අවසර දුන්නේ ඉන්දියාව කෝපයට පත්කරමිනි.
ගෝඨාභය මේ සබ්මැරීන් යානයට එන්න අවසර දීමෙන් පසු 2015 ජනාධිපතිවරණය පැවැත්වීය. ජනාධිපතිවරණයෙන් මහින්ද පරාජය විය. ගෝඨාභයට ආරක්ෂක ලේකම් ධුරය අහිමි විය.
ගෝඨාභයට ආරක්ෂක ලේකම් ධුරය අහිමි වීමෙන් පසු විදේශ පුවත්පත් කලාවේදීන්ගේ සංගමය හමුවූ විටදී 2017 මාර්තු 27 ඉන්දියාව කලඹන ප්රකාශයක් කළේය. ඔහු කීවේ ඉන්දියාව ආණ්ඩු පෙරළිය පසුපස සිටියා යැයි කියාය. ඔහු එම ප්රකාශය කොට දින කිහිපයකින් චීනයේ ආරක්ෂක සමුළුවකට චීනය බලා පිටත්ව ගියේය. එම සමුළුවට ආරාධනා කරන්නේ ලොව ආණ්ඩුවල ආරක්ෂක ප්රධානීන්ට වුවද විපක්ෂයේ සිටි ගෝඨාභයට චීනය විශේෂ ආරාධනයක් කර තිබිණි. ඉන් ටික කලකට පසු ගෝඨාභය ඔහුට එරෙහිව උසාවියේ ඇති නඩුවලින් බේරෙන්න මාසයක පමණ කාලයක් චීනයේ අධ්යාපන චරිකාවක නිරත විය. එම ශිෂ්යත්වය ඔහුට ලබාදී තිබුණේද චීනයය.
ගෝඨාගේ මේ චීන හාදකම වර්ධනය වෙද්දී ඉන්දීය අගමැති මෝදි ලංකාවට ආවේය. ගෝඨාව ඉන්දීය අගමැති මෝදිට මුණගස්වන්න රාජපක්ෂ පවුලට ඕනෑ විය. ගෝඨාගේ ඉන්දීය විරෝධය නිසා තමන්ගේ ඉන්දීය සබඳතාවලට හානි වේ යැයි මහින්ද රාජපක්ෂ සහ බැසිල් සිතූහ. මෝදි, මහින්ද හමුවීමට වේලාවක් දුන් අතර මහින්ද එම හමුවට ගෝඨාවද සම්බන්ධ කරගැනීමට ඉන්දියාව එකඟ කරගත්තේය. මහින්ද, ජී.එල්., ගෝඨාභය, මෝදි හමුවුවත්, මෝදි, ගෝඨාභය සමග වචනයක්වත් කතා කළේ නැත. මේ වෙනකොටත් ගෝඨාභය 2019 ජනාධිපතිවරණයට තරග කිරීමට සූදානමින් සිටි අතර ඔහු මෝදි හමුවීමෙන් පසු ඉන්දියාව සමග සබඳතා හදාගන්න උත්සාහ කළේය.
2019 ගෝඨාභය ජනාධිපති වූ විගස චීන විදේශ ඇමැති මාධ්යවලට කීවේ ගෝඨාභය තමන්ගේ පරණ මිතුරකු බවය. ඒත් ගෝඨාභය ජනාධිපති වූ විගස ගියේ ඉන්දියාවටය. ඉන්දියාවට කොළඹ වරායේ නැගෙනහිර පර්යන්තය (East Terminal) දිය යුතු බව ප්රසිද්ධියේ කීවේය. මේ වන විට චීනය ගෝඨාභයට චීනයට එන්න ආරාධනා කර තිබිණි. ආරාධනාව කළේ චීන ජනාධිපතිය. ඒත් කොවිඩ් 19 පිට දමා ගෝඨාභය චීනයට ගියේ නැත. චීනය මවිතයට පත්විය. ගෝඨාභය ඉන්දියාවේ ආරක්ෂාවට තර්ජනයක් යැයි කියා යාපනයේ දූපත්වල පටන් ගන්න ගිය චීන විදුලිබල ව්යාපෘති නතර කරන්න කියා චීනයට කීවේය. චීනය එම ව්යාපෘති ඉවත් කරගත්තේ ඉන්දියාවට චෝදනා කරමින්ය. ඒ සමගම ගෝඨාභයගේ ආණ්ඩුව චීනයෙන් ආ පොහොර නැව ලංකාවේ භාවිතයට නුසුදුසු යැයි කියා නැව ලංකාවට භාර ගැනීම ප්රතික්ෂේප කළේය. චීනය එය සැලකුවේ තමන්ට කළ අපහාසයක් ලෙසය. ආර්ථික අර්බුදය පටන් ගත්තේ ඉන් පසුවය. බැසිල් රාජපක්ෂ මුදල් ඇමැති ලෙස චීනයෙන් ණය ආධාර ඉල්ලුවත් චීනය එයට යහපත් ප්රතිචාරයක් දැක්වූයේ නැත. ඉන්දියාව ලංකාවට ආධාර කිරීමට ඉදිරිපත් වූයේ මේ අතරතුරදීය.
2019ට පෙර ගෝඨාභය චීනය නිර්මාණය කළ නායකයෙකි. චීන හිතවාදී විමල් වීරවංශලා ගෝඨාට සහාය දැක්වූයේ ඒ නිසාය. ඒත් අද විමල් කියන්නේ තමන්ට වැරැදුණු බවය. විමල්ට පමණක් නොව චීනයටත් වැරැදුණු බව ඔහු කියන්නේ නැත. නමුත් ඇත්ත ඒකය. චීනය හදපු ගෝඨාව ඉන්දියාව ඩැහැගත්තේය. චීනය රටවල් ණය උගුල්වල පටලවන්න දක්ෂය. ඒත් දේශපාලන උගුල් ඇටවීමේ ඉන්දියානු විශේෂඥතාව සමග චීනයට හැප්පෙන්නට බැරිය.
උපුල් ජෝෂප් ප්රනාන්දු
