බොහෝ කාලයක සිට අපේ රටට තිබුණු ප්රශ්නයකට විසඳුමක් හොයන්න අපි බලාපොරොත්තු තබමින් හිටියේ විදේශිකයන් ශ්රී ලංකාවට පැමිණෙන තුරු. ඔවුන් ශ්රී ලංකාවට පැමිණියාට පස්සේ සංචාරක කර්මාන්තය යළි අළු මතින් නැගිටින බවට අපට බලාපොරොත්තුවක් තිබුණා. මේ බලාපොරොත්තුව සේයා මාත්ර දල්වාලමින් විදේශිකයන් යම් තරමකට ශ්රී ලංකාවට පැමිණෙන්නට පටන් ගත්තා. සංචාරකයන් ශ්රී ලංකාවට පැමිණීමත් එක්ක යම් ආකාරයකින් මේ ආර්ථික ආහේනියෙන් ගොඩ එන්න අපට හැකි යැයි අපි හැමෝ ගාවම ඇත්ත වශයෙන්ම බලාපොරොත්තු තිබුණා. අපි හිතාගෙන හිටියේ ඩොලර් සංචිත අහවර වීමෙන් ඇතිවුණු ප්රශ්නයට විදේශිකයන් ඩොලර් රැගෙන පැමිණියාට පස්සේ උත්තරයක් ලැබේවි කියලා. ඇත්තටම ඔවුන් ශ්රී ලංකාවට පැමිණියේ ඩොලර් රැගෙන. බොහෝ රටවල විදෙස් මුදල් ශ්රී ලංකාවේදී හුවමාරු කරන්න බැරි වීමත් එක්ක අපි හිතාගෙන හිටියා ඔවුන්ගේ ඩොලර්වලින් ගොඩ යන්න පුළුවන් කියලා. මේ කතන්දරය බොරුවක් නෙවෙයි. මේක හිතළුවක් නෙවෙයි. මේ බලාපොරොත්තුව ඇත්තක්. ඇත්තටම අපට ඩොලර්වලින් ගොඩ යන්න පුළුවන්. ඒක තමයි අපට තියෙන බලාපොරොත්තුව.
අපි වගේ පුංචි රටවල් ලෝකෙ බොහෝ විට දියුණු කරගන්නේ සංචාරක කර්මාන්තයේ පිහිටෙන්. නමුත් අද අපට වෙලා තියෙන්නේ මොකක්ද? සංචාරක කර්මාන්තය අපේ රටේ මිනිස්සුන්ගේ ජීවිතවලට අලුත් පණක් ලබාදෙන බව ඇත්ත. සංචාරක කර්මාන්තය වැටිලා තියෙන තැනින් යම් හෙයකින් නැගිටපු බවත් ඇත්ත. අපට සංචාරක කර්මාන්තය ගැන යම් තරමකට බලාපොරොත්තු තියන්න පුළුවන් කියන එකත් ඇත්ත. ඒත් මේ වෙලා තියෙන්නේ ලංකාවට එන සුද්දෝ කවුද කියන එක ගැන දෙපාරක් හිතන්න. ඒකට හේතුව සංචාරකයන් යම් කිසි රටකට ආවට පස්සේ සිද්ධ වෙන ප්රධාන කාරණය තමයි ඔවුන් රැගෙන එන මුදල් ඒ රට තුළ වියදම් කිරීම. එම වියදම් කිරීම හරහා අදාළ රටට ලැබෙන ආදායම තමයි ඒ රටට සිදුවෙන වාසිය විදියට සැලකෙන්නේ. ඒත් දැන් වෙලා තියෙන්නේ ඒකෙ සම්පූර්ණයෙන් වෙන පැත්තකට හැරීමක්. ලංකාවට සුද්දෝ එනවා. ඒක ඇත්ත. ඒත් ඒ එන්නේ මොන වගේ සුද්දොද? මොන වගේ සුද්දොද කියන ප්රශ්නෙ එක එක්කෙනා එක එක උත්තර දෙන නිසා අපට නිවැරැදි නිගමනයකට එන්න බෑ. නමුත් ලංකාවට එන සුද්දෝ බොහෝ දෙනෙක් සුද්දන්නට වඩා වෙන මොක්කුද කියලා හිතෙන තැනට පත්වෙලා තියෙනවා. ඒගොල්ලෝ චූන් පාන් කාලා, රෑට කොහේ හරි පුංචි කඩේකින් කොත්තුවක් කාලා, එළවළු රොටියක්, වඩයක් කාලා ප්ලේන්ටියක් බීලා අපේ රටේ ඩොලර් වියදම් කරනවා වෙනුවට, අපේ රටේ බැංකු කඩලා ආපහු යන තැනට පත්වෙලා නම් දැන් අපට සුද්දො එන එක උත්තරේකට වඩා ප්රශ්නයක් වෙලා කියලයි හිතෙන්නේ. පහුගිය දවස් කිහිපයේම මේ වගේ සිද්ධීන් වාර්තා වුණා. විශ්වාස කරන්න බැරි විදියේ සිද්ධීන්. සමහර සිද්ධි අදහා ගන්නවත් බෑ. ඇත්තටම අපි කියන්නේ එයා සුද්දා වගේ වැඩ කියලා. ඒ කියන්නේ පිරිසිදුවට වැඩ කරන මිනිස්සුන්ට අපි කියන්නේ සුද්දා වගේ වැඩ කියලා. එහෙම නැත්නම් අවංකව වැඩ කරන අයටත් අපි කියන්නේ සුද්දා වගේ වැඩ කියලා. හැබැයි මේ සුද්දා නම් ක්ලීන් එකට නෙවෙයි, පට්ට ගේම් එකකට සූදානම් වෙලා ලංකාවට ආපු එවුන් කියලා දැන් තමයි තේරෙන්නේ.
ඇත්තටම විදේශිකයෝ ලංකාවට ඇවිල්ලා මේ වගේ මුදල් එක්ක සෙල්ලම් දාපු අවස්ථා කිහිපයක් අපට හමුවෙලා තියෙනවා. ඒ තමයි නයිජීරියානු ජාතිකයෝ ලංකාවට ඇවිල්ලා මූල්ය වංචා කරපු අවස්ථා. ඒ වගේම චීන, කොරියන්, අග්නිදිග ආසියාතිකයන් ලංකාවට ඇවිල්ලා මූල්ය වංචා කරපු අවස්ථා කිහිපයකුත් අපට අහන්න ලැබුණා. ඒ වගේම තමයි මුදල් තෑගි දිනූ බව කියලා, ඒ අයට මුදල් ලබාදෙන බව කියලා දාපු සෙල්ලමුත් ලංකාවේ තිබුණා. හැබැයි මේ සෙල්ලම් දෙක තුනම අපේ ආරක්ෂක අංශ විසින් වටලලා අත්අඩංගුවට අරගෙන ඔවුන්ට දඬුවම් කරන්න පුළුවන් වුණා. ඒත් දැන් වෙන්නේ නම් වෙනස්ම වැඩක්. සුද්දෝ ඇවිල්ලා ඒ.ටී.එම්. කඩනවා. ඔවුන් මේ ඒ.ටී.එම්. යන්ත්ර කඩන්නේ උපක්රමශීලීව සහ තාක්ෂණික ක්රමවලින්. ඒ.ටී.එම්. යන්ත්රවල මුදල් තියෙන බව පෙන්වනවා, නමුත් මුදල් අරගෙන. මේ වගේ වංචාවක් මීට කලින් සිද්ධ වුණා. ඒ, ඒ.ටී.එම්. යන්ත්ර කැඩීමක් නෙවෙයි. ඔවුන් කරලා තිබුණේ ඒ.ටී.එම්. කාඩ්වලින් වංචනික ලෙස මුදල් ලබාගැනීමයි. ඒක කළෙත් සුද්දෝ. සුද්දෝ ඒක කරපු නිසා ඒ වැඩේ ටිකක් ජෙනුයින් වැඩක් වගේ දැනුණා. අපි හිතුවා කමක් නෑ, සුද්දොනෙ කරන්නේ කියලා. ඒත් දැන් මේක සම්පූර්ණයෙන්ම අනිත් පැත්තට හැරිලා. වෙන විදියකට කියනවා නම් උඩු යටිකුරු වෙලා.
පසුගිය 30 වැනිදා උදේ හික්කඩුව, ගාල්ල සහ බද්දේගම මහජන බැංකුවල ඒ.ටී.එම්. යන්ත්රවල, පරිගණක පද්ධතිය බිඳලා රුපියල් කෝටි ගණනක් මුදල් කොල්ල කෑ විදේශිකයන් පිරිසක් සම්බන්ධව පොලිසිය විමර්ශන කටයුතු ආරම්භ කළා. මෙම ඒ.ටී.එම්. යන්ත්ර තුනෙන් රුපියල් හතළිස්හය ලක්ෂ අසූදහසක් (46,80,000), රුපියල් දෙලක්ෂ හැත්තෑ පන්දහසක් (2,75,000), සහ රුපියල් පනස්හත් ලක්ෂයක් ( 5700,000) මෙසේ කොල්ල කා තිබුණා. මේ සම්බන්ධව පැමිණිලි පොලිසි වෙත ලැබී තිබුණු අතර ඒ ඔස්සේ විමර්ශනය කරගෙන යන නිලධාරීන්ට මූලිවක පෙනීගොස් තියෙන්නෙ තිස් වනිදා අලුයම් කාලයේ එම ඒ.ටී.එම්. යන්ත්ර පිහිටි ස්ථානවලට ඇතුළු වන විදේශිකයන් කණ්ඩායමක් යන්ත්රයේ ඇති සී.සී.ටී.වී. කැමරාවට ස්ටිකරයක් වැනි යමක් අලවා ආවරණය කර ඒ.ටී.එම්. යන්ත්ර පද්ධතියේ ඇති පරිගණක මෘදුකාංග පද්ධතියට අනවසරයෙන් ඇතුළුවී එහි දත්ත වෙනස් කර මෙම මුදල් සොරාගෙන ඇති බවකි.
විශේෂත්වය වෙන්නෙ මෙම නගර තුනේම ඒ.ටී.එම්. යන්ත්ර කොල්ලකා ඇත්තේ එකම ආකාරයට වීම. මේ විදේශීය කොල්ල කණ්ඩායම එකම පිරිසක් බවට පොලිසිය සැක කරනවා.
මීට දවස් කිහිපයකට පෙර නාරාහේන්පිට රාජ්ය බැංකුවක ඒ.ටී.එම්. යන්ත්රයට හානි සිදුකර මුදල් ලබාගැනීමට උත්සාහ කරන විදේශිකයන් දෙදෙනෙක් ගැනත් හෙළි වුණා. ඔවුන් මේ කොල්ලය සඳහා තාක්ෂණය භාවිත කර ඇති බවත් ඒ.ටී.එම්. යන්ත්ර හා සම්බන්ධ පරිගණක දත්ත පද්ධතියට ඇතුළු වී’මෙම කොල්ලය’ සිදුකර ඇති බවත් දැනගන්න ලැබුණා.
මේ සුද්දො දෙන්නා මුලින් හික්කඩුවෙ බැංකුව කොල්ලකාලා තිබුණේ අලුයම 1.30ට පමණය. එහි තිබූ සී.සී.ටී.වී කැමරාව වසාදමා රුපියල් හතළිස් හයලක්ෂ අසූදහසක මුදලක් පැහැරගෙන, ඉන් පස්සෙ ගාල්ල කරාපිටිය නගරයේ පිහිටි මහජන බැංකු’ඒ.ටී.එම්. යන්ත්රය වෙත එනවා. ඒ, අලුයම 3.22ට. මේ බැංකුවෙන් ඔවුන් රුපියල් දෙලක්ෂ හැත්තෑපන් දාහක මුදලක් ගන්නවා. එහි සිටි ආරක්ෂක නිලධාරියාට මේ සම්බන්ධයෙන් ඇති වූ සැකය මත ඒ.ටී.එම්. කුටිය පරීක්ෂා කර බැලීමේදී’ ආරක්ෂක කුටියේ තිබූ සී.සී.ටී.වී. කැමරා පද්ධතිය කළු පැහැති කවර යොදා ආවරණය කර ඇති බවයි ඔහු දැක ඇත්තේ. කොහොම නමුත් මේ දෙන්නා බද්දේගම නගරයේ පිහිටි රාජ්ය බැංකුවට අයත් ඒ.ටී.එම්. යන්ත්රය ඇති කුටිය වෙත ඇවිල්ලා තියෙන්නෙ අලුයම 4.00ට විතර. එතැනදී රුපියල් ලක්ෂ 57ක මුදලක් ඔවුන් විසින් හොරකම් කරනවා. මේ කිසිම ඒ.ටී.එම්. යන්ත්රයකට විදේශිකයන්ගෙ පැමිණීම සැකකටයුතු නෑ. මොකද මේවා ඔවුන් නිතරම වගේ ගැවසෙන ස්ථාන නිසා. විශේෂයෙන්ම අපි හිතන්නෙ ‘සුද්දොනෙ…’ කියලනෙ. ඒත් දැන් තමයි තේරෙන්නෙ සුද්දො ඔක්කොටම හපන් කියලා.
ජීවන පහන් තිළිණ
