ප්රවීණ මාධ්යවේදියකු මෙන්ම සන්ඩේ ලීඩර් කතුවරයාව සිටි ලසන්ත වික්රමතුංග සහ රගර් ක්රීඩක වසීම් තාජුඩීන් ඝාතනය, ප්රගීත් එක්නැලිගොඩ අතුරුදන් කිරීමේ සිද්ධීන් මෙන්ම දේශපාලන බලපෑම් මත වළදමා තිබූ ඝාතන සියල්ල නුදුරේදීම එළියට ගන්නා බව මහජන ආරක්ෂාව පිළිබඳ නියෝජ්ය අමාත්ය නීතිඥ සුනිල් වටගල මහතා ‘මව්රට’ට පැවැසීය. (Sri Lanka Latest News)
කිසිදු දේශපාලන ඇඟිලි ගැසීමකින් තොරව අදාළ පරීක්ෂණ මතුකර ගැනීමට ජනාධිපතිවරයා රහස් පොලිසියට සහ විශේෂ විමර්ශන අංශ වෙත බලය පවරා ඇති බවත්, පරීක්ෂණ එකින් එක එළියට ගැනීමේදී තොරතුරු සැඟවූ තැන් මතුකර ගැනීමට පමාවක් සිදුවුවත් අදාළ සැකකරුවන් නීතිය හමුවට ගෙන එන බවද ඔහු සඳහන් කළේය.
මේ අතර, රහස් පොලිසියේ අධ්යක්ෂ ඉමේෂා මුතුමාල මහත්මියගෙන් ‘මව්රට’ කළ විමසුමකදී ඇය සඳහන් කළේ පසුගිය වසර කිහිපය තුළ සිදුකර ඇතැයි කියන දේශපාලන ඝාතන රහස්වලට අදාළ සියලු පරීක්ෂණ ගොනු මේ වනවිට ඒ සඳහා යොදවා ඇති විශේෂ රහස් පොලිස් කණ්ඩායම් කිහිපයක් මගින් අධීක්ෂණය කරමින් ඉදිරි පියවර සඳහා සූදානම් වන බවයි.
ප්රධාන වශයෙන් ජනතාව අතර ආන්දෝලනයකට තුඩුදී ඇති ඝාතන පිළිබඳ ප්රමුඛත්වය ලබාදෙමින් තොරතුරු පෙළගස්වමින් සිටින බවයි ඇය සඳහන් කළේ.
මේ අතර, තවත් ආරක්ෂක අංශ ප්රධානියකු සඳහන් කළේ මින් පසු මිග් යානා ගනුදෙනුවට අදාළ පරීක්ෂණ එළියට ඒමත් සමග ලසන්ත වික්රමතුංග ඝාතන රහස්ද හෙළිකර ගැනීමට හැකිවෙතැයි විශ්වාස කරන බවයි.
ප්රේමලාල් විජේරත්න
