ලංකාවේ අවුරුදු 60ට වැඩි පුද්ගලයන් ලක්ෂ 40කට ආසන්න පිරිසක් සිටින බවත්, ඔවුන්ගෙන් සැලකිය යුතු පිරිසක් ස්ථාවර තැන්පතු මගින් ලැබුණු පොලී ආදායමෙන් ජීවත් වූ නමුත් වෙළෙඳපළ පොලී අනුපාතිකයන් පහළ යෑම නිසා ඔවුන් දැඩි අසීරුතාවකට පත්ව ඇති බව පේරාදෙණිය විශ්වවිද්‍යාලයේ මානව ශාස්ත්‍ර සහ සමාජවිද්‍යා උපාධි අධ්‍යයන අංශයේ අධ්‍යක්ෂ සහ ආර්ථික විද්‍යාව පිළිබඳ මහාචාර්ය වසන්ත අතුකෝරල මහතා පැවැසීය.
සාමාන්‍යයෙන් මෙම වැඩිහිටි පුද්ගලයන් සතු ස්ථාවර තැන්පතු ප්‍රමාණය ලක්ෂ 10-15 අතර පැවැති අතර, මේ වනවිට බැංකු විසින් ස්ථාවර තැන්පතු සඳහා ගෙවන පොලී අනුපාතිකය 8%-9%ක් වැනි පහළ අගයක පැවතීම නිසා ඔවුන්ගේ ආදායම් මට්ටම සැලකිය යුතු ආකාරයට පහළ ගොස් තිබේ.
ජ්‍යෙෂ්ඨ පුරවැසියන් සඳහා ඉහළ පොලී අනුපාතිකයන් ලබාදීම පිළිබඳ රජය විටින් විට සාකච්ඡා පවත්වනු ලැබූවත් එය ප්‍රායෝගිකව ක්‍රියාත්මක කිරීම සඳහා තවමත් අපොහොසත් වී තිබේ.
ඉහළ ගිය උද්ධමනය හමුවේ මුදලේ අගය ශීඝ්‍රයෙන් පහළ යෑම නිසා මොවුන්ට ලැබෙන ආදායමෙන් ඔවුන්ගේ මූලික අවශ්‍යතා පවා සපුරා ගැනීමට නොහැකි තත්ත්වයකට පත්ව ඇති බවයි මහාචාර්ය වසන්ත අතුකෝරල මහතා වැඩිදුරටත් සඳහන් කළේ.
ප්‍රේමලාල් විජේරත්න
