පොල් මිල දිනෙන් දින ඉහළ නගිමින් තිබියදී මහනුවර දිස්ත්රික්කය ඇතුළු පළාත් ගණනාවක රිළා උවදුර වසංගතයක් මෙන් පැතිරී යෑමෙන් පොල් ඉඩම්වල ඵලදාව විනාශ වෙමින් තිබෙන බව එම ප්රදේශවල පොල් වගාකරුවන් පවසයි. (Sri Lanka Latest News)
ඒ සම්බන්ධයෙන් මහනුවර දිසා ලේකම් චන්දන තෙන්නකෝන් මහතාගෙන් විමසූ විට ඔහු සඳහන් කළේ මහනුවර දිස්ත්රික්කයේ පොල් වගාව 42%කින් පමණ පහත වැටී ඇති බවයි.
තවත් උසස් නිලධාරියකු පැවැසුවේ තමන්ට අයත්ව පොල් ගස් සියයකින් යුතු ඉඩමේ ඵලදාව රිළවුන් සහ දඬුලේනුන් විසින් විනාශ කිරීම නිසා තමන්ට ඉඩමෙන් ලැබෙන ආදායම මෙන්ම නිවෙසේ පරිභෝජනයද සඳහා අවශ්ය පොල්ද අහිමි වී ඇති බවයි.
ඒ නිසාම පොල් ඉඩම කෙරෙහි ඇති උනන්දුව ඉවත ලා පොල් වැඩි මිලට කඩවලින් මිලදී ගන්නා බවද ඔහු පැවැසීය.
රිළවුන් බෝවීමද වැඩිවීම නිසා හතරලියැද්ද අවට ප්රදේශ ගණනාවකට මෙය තදින් බලපා ඇති බව ප්රදේශවාසීන් විශාල පිරිසක් රජයේ වගකිව යුතු අංශවලට වසර ගණනාවක් තිස්සේ පෙන්වා දී ඇතත් ඊට මෙතෙක් කිසිදු සාධනීය ප්රතිචාරයක් නොලැබී ඇති බවයි ප්රදේශවාසීන් පවසන්නේ.
මේ සම්බන්ධයෙන් වනජීවී දෙපාර්තමේන්තුවේ අධ්යක්ෂ ජනරාල් චන්දන සූරියබණ්ඩාර මහතාගෙන් විමසූ විට ඔහු සඳහන් කළේ මෙම රිළා උවදුර දීර්ඝ කාලයක් තිස්සේ පවතින්නක් බවයි. එයට අදාළව පැමිණිලි ලැබෙන අන්දමට යම් යම් ක්රියාමාර්ග ගත්තද එය සම්පූර්ණයෙන් විසඳීමේ මගක් ගැන පැහැදිලි පිළිතුරක් දීමට නොහැකි බවයි.
ප්රේමලාල් විජේරත්න
