තඹුත්තේගම පොලිස් වසමේ, ගල්විහාරය ගම්මානයේ, ගැමුණුපුර ප්රදේශයේ රජයේ රක්ෂිතයක් තුළ මියගොස් සිටි වන අලියකුගේ සිරුරක් අද (30) උදෑසන සොයාගෙන ඇත. (Sri Lanka Latest News)
මෙලෙස මරණයට පත්ව ඇත්තේ, වයස අවුරුදු 30-35 ක් පමණ වන, සද්ධන්ත පිරිමි වන අලියකු බව තඹුත්තේගම වනජීවී කාර්යාල නිළධාරීන් පවසයි.
මෙම වන අලියා ගැමුණුපුර ගම්මානයට යාබදව පිහිටි ගල්විහාර පුදබිමේ රක්ෂිතයේ මායිමට වන්නට ජීවිතක්ෂයට සිටි අතර, අද අලුයම වන අලියා මෙම ස්ථානයේදී ජීවිතක්ෂයට පත්වන්නට ඇතැයි සැක කෙරේ.
ජීවිතක්ෂයට පත් වන අලියාගේ දේහයේ වෙඩි සලකුණක් හෝ විදුලි සැර වැදීමක සලකුණක් දක්නට නොතිබූ අතර, මුඛයෙන් හා ගුද මාර්ගයෙන් ලේ වහනය වීමක් සිදු වන අයුරු නිරීක්ෂණය වන බවත් ඒ අනුව යම්කිසි රෝගයකින් හෝ යම්කිසි විෂ සහිත කෑමක් ආහාරයට ගැනීමෙන් මෙම වන අලියා මිය යන්නට ඇතැයි සැක කරන බවද වන ජීවි නිළධාරීන් පැවසීය.වන අලියා මිය යන්නට නිශ්චිත හේතුව කුමක්ද යන්න සම්බන්ධයෙන් පරික්ෂා කිරිම සඳහා පශ්චාත් මරණ පරීක්ෂණය අද පස්වරුවේ සිදු කිරීමට නියමිතය.
සිද්ධිය සම්බන්ධයෙන් තඹුත්තේගම වන ජීවි කාර්යාල නිළධාරීන් හා තඹුත්තේගම පොලිස් ස්ථාන නිළධාරීන් වැඩිදුර පරීක්ෂණ සිදු කරයි.
මරණයට පත් වන අලියා දැක ගැනීමට බාල-මහලු බොහෝ දෙනෙකු එම ස්ථානයට පැමිණෙන අයුරුද දැක ගත හැකිය .
dinamina
