ඇමෙරිකාව සහ එකල සෝවියට් දේශය අතර සීතල යුද්ධ පැවැති කාලයේ ජේ.ආර්.ගේ ආණ්ඩුව ඉන් උපරිම ප්රයෝජන ගත්තේය. ජේ.ආර්.ගේ ආණ්ඩුව තෝරාගත්තේ ඇමෙරිකාවේ පාර්ශ්වයය. ඉන්දියාව තෝරාගත්තේ සෝවියට් දේශයය. මේ නිසාම ලංකාව සහ ඉන්දියාව අතර සබඳතා පලුදු විය. උතුරේ යුද්ධය එහි ප්රතිඵලයකි. අවසානයේ ජේ.ආර්. ඉන්දීය බලපෑමට යටත්වී ඉන්දු-ලංකා ගිවිසුම අස්සන් කරන්න එකඟ විය.Sri Lanka Latest News
ඊට පෙර ජේ.ආර්. සීතල යුද්ධයේදී තමා තෝරාගත් පාර්ශ්වය වන ඇමෙරිකාවෙන් උදව් ඉල්ලුවේය. ඒ, ඉන්දීය ආක්රමණයකට එරෙහිවය. ඒත් ඉන්දියාවට එරෙහිව ලංකාවට උදව් කරන්න ඇමෙරිකාව එකඟ නොවීය. මේ වනවිට ඉන්දිරා ගාන්ධි ඝාතනයට පසු බලයට පත් රජිව් ගාන්ධි ආණ්ඩුව ඇමෙරිකාව සමග සබඳතා අලුත් කරගන්න උත්සාහ කරමින් සිටියේය. ලංකාව එයට බාධාවක් කරගන්න ඇමෙරිකාව කැමැති නොවීය. ඉන්දු-ලංකා ගිවිසුම අස්සන් කිරීමෙන් පසු ජේ.ආර්.ගේ ආණ්ඩුව ඇමෙරිකාවෙන් හෙලිකොප්ටර් අමතර කොටස් මිලදී ගන්න ඉල්ලුම් කළේය. ලංකාවට හෙලිකොප්ටර් අමතර කොටස් විකුණන්න ඉන්දියාවේ අනුමැතිය අවශ්ය බව ඇමෙරිකාව ජේ.ආර්.ගේ ආණ්ඩුවට දන්වා සිටියේය. ජේ.ආර්. ඇමෙරිකානු ප්රතිචාරයෙන් කලකිරුණි. ඇමෙරිකාවේ මතය වූයේ ජේ.ආර්.ගේ ආණ්ඩුව ඉන්දු-ලංකා ගිවිසුමක් අස්සන් කොට ඇති නිසා ඉන්දියාවේ අනුමැතිය අවශ්ය බවය. ඇමෙරිකාව සහ සෝවියට් දේශය සීතල යුද්ධයෙන් ප්රයෝජන ගන්න ගිය ජේ.ආර්.ට අත්වූයේ එවැනි ඉරණමකි.
2005 බලයට ආ මහින්දත් චීන ව්යාපෘති සඳහා ලංකාවේ දොරවල් විවෘත කොට චීනය සහ ඇමෙරිකාව ප්රමුඛ ඉන්දියාව අතර සීතල යුද්ධයෙන් වාසි ගන්න උත්සාහ කළේය. මහින්දගෙන් පසු බලයට ආ මෛත්රීපාල, ගෝඨාභය සහ රනිල් වගේම වත්මන් ජනාධිපති අනුරද චීනයට එරෙහි ඉන්දීය, ඇමෙරිකා හවුලේ ගැටුම හරහා තම වෙන්දේසි බලය වැඩි කරගන්න උත්සාහ දැරුවේය. මහින්දටත්, මෛත්රීටත්, ගෝඨාභයටත්, අනුරටත් වඩා රනිල් මේ ගැටුම දක්ෂ ලෙස කළමනාකරණය කළේය. ට්රම්ප් ඉන්දියාවට තීරුබදු පැනවීමෙන් පසු ඉන්දියාව සහ චීනය පරණ ගැටුම් අමතක කොට අලුත් සබඳතා ඇතිකරගන්න උත්සාහ කරමින් සිටී. මේ වනවිට චීන විදේශ ඇමැති ඉන්නේ ඉන්දියාවේය. ඉන්දීය අගමැති චීන සංචාරයක් සඳහා පිටත්ව යෑමට නියමිතය. මේ රටවල් දෙක එකතු වීමෙන් ලංකාවේ චීන ව්යාපෘති බාධාවකින් තොරව කරගන්න ලැබෙයි යැයි අනුරගේ ආණ්ඩුවේ හිතවාදීන් සිතයි. හැබැයි මේ රටවල් දෙක එකතු වුණොත් සිදුවන්නේ ලංකාවට තිබූ වෙන්දේසි බලය අහෝසි වීමය. රටවල් දෙක එක්වී දකුණු ආසියාවේ ඉන්දීය ආධිපත්යයට අභියෝග නොකරන බවට චීනය එකඟ වුණොත් ලංකාවට භූ දේශපාලනමය වෙන්දේසි බලය අහිමි වීමට තියෙන ඉඩකඩ වැඩිය.
