නව ජනාධිපතිවරයා ලෙස අනුර කුමාර දිසානායක මහතා දිවුරුම් දීමත් සමග එතෙක් පැවැති පාර්ලිමේන්තුව විසුරුවා හරිනු ලැබුණා. ඒ අනුව එම පාර්ලිමේන්තුව නියෝජනය කළ මන්ත්රීවරුන් 225 දෙනාට එතෙක් හිමිව තිබූ මන්ත්රී වරප්රසාද රාශියක් අහෝසි වී ගියා. එලෙස අහිමි වූ වරප්රසාද මොනවාද යන්න සම්බන්ධයෙන් පැහැදිලි කිරීමට පාර්ලිමේන්තු මහලේකම් කුෂානි රෝහණධීර මහත්මිය පසුගියදා මාධ්ය හමුවක් පැවැත්වූ අතර, එහිදී මාධ්යවේදීන් ඇගෙන් විමසූ ප්රශ්න සහ ඒවාට ඇය ලබාදුන් පිළිතුරු පහත පළකරමු.
පාර්ලිමේන්තුව විසුරුවා හැරීමෙන් පස්සේ මන්ත්රීවරුන්ට අහිමි වන වරප්රසාද මොනවාද කියන එක පැහැදිලි කරන්න පුළුවන්ද?
පාර්ලිමේන්තු මන්ත්රීවරයකුට ලැබෙන්නේ ඔහු කරන්නා වූ සේවය වෙනුවෙන් දීමනාවක්. මේ දීමනාවත් අනෙකුත් පැමිණීමේදී ලැබෙන්නා වූ අනෙකුත් දීමනාත් ඇතුළු සියලු දීමනා මූල්යමය වශයෙන් ලැබුණු දීමනා ඔවුන්ට තවදුරටත් ලබාගන්න හැකියාවක් නෑ. ඒ සියල්ල අහෝසි වෙනවා. ඒ වගේම පාර්ලිමේන්තු කටයුතු අමාත්යාංශය විසින් ක්රියාත්මක කරන්නා වූ ඇතැම් පහසුකම් තිබෙනවා. ඒ අයගේ රක්ෂණ, සෞඛ්ය සම්බන්ධ කාරණා, ඒ වගේම දුරකතන ගාස්තු මේ සියලු පහසුකම් ඔවුන් මන්ත්රී ධුරය දරන දිනය අවසන් වූ වහාම අවසන් වෙනවා. ඒ කියන්නේ පාර්ලිමේන්තුව විසුරුවා හැරිය දිනයේ සිට. මාදිවෙල මන්ත්රීවරුන්ට නිවාස පහසුකම් සපයා දීලා තියෙනවා. මේ නිවාස පහසුකම්, ඒවායේ එළඹ තිබෙන ගිවිසුම් අනුව ඔවුන්ට මැතිවරණය පවත්වන දිනය දක්වා, මැතිවරණ කටයුතු අවසන් වනතෙක් එහි රැඳී සිටින්න පුළුවන්. විශේෂයෙන්ම මහජනතාවට ප්රශ්නයක් නැගෙන්න පුළුවන් එතකොට පාර්ලිමේන්තු මන්ත්රීවරුන්ගේ ධුර කාලය අවසන් වුණාට පස්සේ මේ අයට දීමනාවක් ලැබෙන්නේ නැත්නම් මේ කියන කාලසීමාව ඇතුළත ඒ සඳහා වැයවන්නා වූ මුදල් කොහොමද ලබාගන්නේ කියලා. පාර්ලිමේන්තු මන්ත්රීවරුන්ගේ දීමනාවෙන් මාසික කුලිය ලබාගැනීමට අවශ්ය වන්නා වූ මුදල ඔවුන් මන්ත්රීවරුන් වී මේ නිවාස ලබාගත්ත දිනයේ පටන්ම අපි ඔවුන්ගේ දීමනාවෙන් මාසිකව අඩුකර ගැනීමට කටයුතු යොදා තිබෙනවා. ඔවුන්ගේ මන්ත්රී ධුරය අවසන් වූ දින සිට මහ මැතිවරණය පවත්වන දිනය දක්වා වන කාලසීමාව සඳහා ලබාදිය යුතු නිවාස කුලිය ඒ තැන්පතුවෙන් ලබාගැනීමට අප කටයුතු කරනවා.
මන්ත්රීවරුන්ට රාජ්යතාන්ත්රික ගමන් බලපත්ර හිමිවෙනවා. වාහන, දුරකතන වගේ පහසුකම් රැසකුත් ලැබෙනවා. මේ සියල්ලත් අහිමි වෙනවද?
වාහන සියල්ලම ඔවුන් විසින් ලබාදිය යුතු වෙනවා. මේ සම්බන්ධයෙන් දැනට ඉතා ශක්තිමත් නීතිරීති රාමුවක් ක්රියාත්මක වෙනවා අපේ රටේ. දූෂණ විරෝධී පනත පසුගිය පාර්ලිමේන්තුවෙන් සම්මත කර තිබෙනවා. ඒ අනුව රජයේ විගණන කාර්යාලය අපෙනුත් විමසීමක් කරලා තිබෙනවා පාර්ලිමේන්තුවට අයත් වාහන සියල්ල නැවත භාරදීලා තිබෙනවද කියලා. විශේෂයෙන්ම කතානායකතුමාගේ කාර්යමණ්ඩලයත්, නියෝජ්ය කතානායකතුමා, නියෝජ්ය කාරකසභා සභාපතිතුමා යන අයගේ කාර්යමණ්ඩලවලට ලබාදී තිබූ වාහන සියල්ල අපි මේ වනවිට ඔවුන් විසින් අපට නැවත භාරදීලා තිබෙනවා. ඒ පහසුකම් සියල්ල අවසාන වෙනවා.
ඒ වගේම රාජ්යතාන්ත්රික ගමන් බලපත්රය භාවිත කරන්න පාර්ලිමේන්තු මන්ත්රීවරුන් වශයෙන් සිටි අයට දැන් කිසිම හැකියාවක් නැහැ. ඔවුන්ගේ ධුර දැරීම අවසන් වූ දිනයේ සිටම ඔවුන්ට කිසියම් රටකට යෑමට අවශ්ය නම් සාමාන්ය පුරවැසියන් භාවිත කරන සාමාන්ය ගුවන් ගමන් බලපත්රයක් ලබාගෙන තමයි ඒ කටයුත්ත ඉෂ්ට කරගන්න සිදුවෙන්නේ. යම් හෙයකින් හිටපු මන්ත්රීවරුන් නැවත වතාවක් පාර්ලිමේන්තුවට තේරීපත්වුණොත් සහ අභිනව පාර්ලිමේන්තුවට පත්වන්නා වූ නවක මන්ත්රීවරුන් පාර්ලිමේන්තුවේ කටයුතුවලට සහභාගි වීමට අදාළ ප්රතිඥාව ලබාදුන් දිනයේ සිට ඒ සඳහා අවශ්ය පහසුකම් සලසා දිය හැකියි.
පාර්ලිමේන්තු මන්ත්රීවරුන්ගේ විශ්රාම වැටුප සම්බන්ධයෙන් ගැටලුවක් පවතිනවා නේද? වසර 5ක් කියලා එක තැනක කියැවෙනවා, තවත් තැනක වසර 10ක් කියලා කියැවෙනවා. මෙහි නීත්යනුකූල තත්ත්වය මොකක්ද?
වසර 10ක කතාව ජනතාව කරා ගියේ අපිට පසුගිය පාර්ලිමේන්තුවේදී මුදල් අමාත්යවරයා විසින් ඉදිරිපත් කළ අයවැය කතාවේ යෝජනාවක් වශයෙන් එය ඉදිරිපත් කරලා තිබුණා. විශ්රාම වැටුප ලබාගැනීම සඳහා දැනට පවත්නා වසර 5ක අවම සේවා කාලය වසර 10ක් ලෙසට සංශෝධනය කළ යුතුයි කියලා. නමුත් එය ක්රියාත්මක වුණේ නැහැ ඒ ආකාරයෙන්. ඒ අනුව විශ්රාම වැටුප් පනතේ ප්රතිපාදනවලට අනුව දැනටත් ක්රියාත්මක වෙන්නේ වසර 5ක සේවා කාලය තමයි.
පාර්ලිමේන්තු න්යාය පුස්තකයට ඇතුළත් වෙලා තිබුණු අණ පනත්, නීති රෙගුලාසි සහ යෝජනාවලට මොකද වෙන්නේ?
ඒ සියල්ලම පෙර සඳහන් කරපු ආකාරයට අහෝසි වෙනවා. නව පාර්ලිමේන්තුව හමුවට ඒ සියල්ල රැගෙන ඇවිල්ලා අලුතෙන් ඉදිරිපත් කරලා, කටයුතු කරගෙන යෑමට අවශ්යයි.
