ලංකාවේ රාජ්ය සේවයේ දැඩි ලෙස පරිහානියට පත්වූ ක්ෂේත්රයක් වන්නේ අධ්යාපනයයි. අධ්යාපන ක්ෂේත්රයේ මූලික ප්රශ්නය අධ්යාපනය හරියට නොදීමයි. පාසල් අධ්යාපනය අන්ත පරිහානියට ලක්වී තිබෙන අතර, මේ වනවිට පාසල යනු ටියුෂන් නම් වලිගය විසින් වනනු ලබන බල්ලෙකි. ඒ අතර, විවිධ මානසික අසහනයන් ඇති පුද්ගලයෝ පවා ගුරුවරුන් ලෙස සමාජයේ රඟපාති. Sri Lanka Latest News
එසේ වීමට ප්රධාන වශයෙන් වගකිව යුතු පාර්ශ්වයන් වන්නේ, ගුරුවරුන් හා විදුහල්පතිවරුන්ය. එසේ වුවද, එය පිළි නොගෙන, දේශපාලකයන්ට සහ නිලධාරීන්ට බණින්නට බොහෝ දෙනෙකු කැමැතිය.
කෙසේ වෙතත්, පන්ති කාමරයේ ඉගැන්වීම හරියට කරන්නට ගුරුවරයාට කිසිදු දේශපාලන හෝ නිලධාරි බලපෑමක් නැත. එහෙම බලපෑමක් ඇතැයි කීම පල් බොරුවකි. මේ වනවිට ගුරු මාරු පවා සිදුවන්නේ ගුරු සංගම්වලට අවශ්ය පරිදිය.
පන්ති කාමරයේ අධ්යාපනයට බාධාකාරී වන ඇතැම් දේ පාසල් තුළ සිදුවේ. ඒවා වනාහි විදුහල්පතිවරුන් කැපීපෙනීම සඳහා කරන සංදර්ශන මිස දේශපාලකයන්ගේ හා නිලධාරීන්ගේ බාධා නොවේ. මේ සියල්ල මැද තම රාජකාරිය හරියට කරන හා අමතරව ද සිසුන් වෙනුවෙන් බොහෝ දේ කරන ගුරුවරු පිරිසක් සිටිති. ඔය වැටුප් ගැන තර්ක කරන විට කියන්නේ ඒ සුළු පිරිස කරන දේය. බහුතරයක් එසේ නැත.
පන්ති කාමර අධ්යාපනයට බාධාකාරී වන තවත් දෙයක් නම් ගුරුවරුන් පාසල් කාලය තුළදීම විභාග උත්තර පත්ර බැලීමට යාමයි. ඒ වෙනුවෙන් ගුරුවරුන්ට වැටුපට අමතරව දීමනා ගෙවනු ලැබේ. ඒ දීමනා ප්රමාණවත් නැතැයි කියන අතර මතක තබාගත යුතු කරුණක් වන්නේ, එම රාජකාරි වෙනුවෙන් වැටුප් සහිත රාජකාරි නිවාඩු ලැබෙන බව සහ උත්තර පත්ර පරීක්ෂක ගුරුවරයකුට ටියුෂන් වෙළෙඳපළේ අලෙවි කළ හැකි සමාජ ප්රාග්ධනයක් ගොඩනැගෙන බවයි.
පාසල් පැවැත්වෙන්නේ අවුරුද්දට දින 200ක පමණ කාලයකි. අවුරුද්දෙන් තුනෙන් එකකට වැඩි කාලයක් පාසල් පැවැත්වෙන්නේ නැත. පැවැත්වෙන කාලසීමාව තුළද ගුරුවරුන්ට වැටුප් සහිත දින නිවාඩු 41ක් සහ පැයේ කෙටි නිවාඩු 100ක් පමණ ලබාගත හැකිය.
ඉගැන්වීම හෙවත් ඉගෙන ගැනීම සඳහා සිසුන්ට පහසුකම් ලබාදීම වෙනුවෙන් ගුරුවරුන්ට වැටුප්, පුහුණුව, ගුරු අත්පොත්, පෙළපොත් ආදිය රජය විසින් සපයනු ලැබේ. එහෙත්, තමන්ගේ දරුවාට පාසලෙන් ලබාදෙන අධ්යාපනය සම්බන්ධයෙන් තෘප්තිමත් මවුපියන් සිටී. ඒ සියලු මවුපියන්ට ළමයින්ගේ අධ්යාපනය ගැන කරන්නට පැමිණිලි බොහෝ ඇත. රජය අධ්යාපනය වෙනුවෙන් දරන වියදමට අමතරව අතිවිශාල වියදමක් ළමයින්ගේ පාසල් අධ්යාපනය වෙනුවෙන් දරන්නට මවුපියන්ට සිදුවේ. එය නිවසේ විදුලි බිල මෙන් කිහිප ගුණයකි. විදුලි බිල වැඩි යැයි හඬක් නැඟුණද ටියුෂන් බිල වැඩි යැයි එහෙම මැසිවිල්ලක් ඇසෙන්නේ නැත.
ගුරුවරුන්ට ද පැමිණිලි ඇත. සාපේක්ෂව ගත් කල ගුරුවරුන්ට මේ වනවිට හොඳ වැටුප් ලැබේ. එහෙත්, තව මදිය. සුබෝධිනී කමිටුව නම් තමන්ට වාසිදායක මොකක්දෝ එකක් විසින් කරන ලද නිර්දේශයක් කර තබාගෙන යන ගුරුවරු ඒ අනුව තව විශාල විෂමතාවක් තිබෙන බව කියති.
ලොකුම විෂමතාව තිබෙන්නේ අධ්යාපනයේය.
අධ්යාපන සමුපකාරයේ වැඩිපුර ඉන්නේ ගුරුවරුය. එහි බලය ජාතික ජන බලවේගයට ලැබී ඇත. ඔවුන් කියන්නේ දැන් දූෂණයෙන් තොර පිරිසක් අතට බලය ලැබී ඇති බවය.
වසර පහකට පෙර කාලය දක්වා මමද අධ්යාපන සමුපකාරයේ සාමාජිකයකු වී සිටියෙමි. එහි වරප්රසාද ලබාගැනීමේදී මට අවසාන කාලයේදී කිසිදු ගැටලුවකට මුහුණ දීමට සිදුවූයේ නැත. ගුරු සේවයෙන් ඉවත් වීමෙන් අනතුරුව මට හිමි වරප්රසාද මම ඉතා කෙටි කාලයකින් ලබා ගත්තෙමි. එහි සේවකයන් හා නිලධාරීන් දූෂිතයන් නොව, විනීත පිරිසක් බව මගේ අත්දැකීමයි. මෑත වකවානුවේදී, ඔය කියන හොරුන්ගේ පාලනය තුළ අධ්යාපන සමුපකාරයේ කාර්යක්ෂමතාව ඉහළ ගියේය.
අධ්යාපන සමුපකාරයේ අතීතයේ යම් යම් දූෂණ වංචා සිදුවූ බව බොරුවක් නොවේ. බලයේ සිටි පක්ෂ අධ්යාපන සමුපකාරයට ද තම බලය ව්යාප්ත කරගත් බව ඇත්තය. දැන් සිදුවන්නේ ද එයයි.
අතීතයේ සිදුවූ බව කියන ඔය මහාපරිමාණ වංචා හා දූෂණ මොනවාද?
අධ්යාපන සමුපකාරයේ සාමාජිකයන් බහුතරය ගුරුවරුන් නිසා, එහි බලය ජාතික ජන බලවේගයට ලැබීම ගැන පුදුම විය යුතු නැත.
අප සිතන අන්දමට නම්, සමුපකාර ව්යාපාරය දේශපාලන ඇඟිලි ගැසීම්වලින් තොර විය යුතුය.
අජිත් පැරකුම් ජයසිංහ
