ශ්රී ලංකාවට ජාත්යන්තර ආධාර සහ ඖෂධ සැපයුම් අත්යාවශ්ය මොහොතක, තානාපති මහින්ද සමරසිංහ මහතාගේ සහ මෙම දූත මණ්ඩලයේ ඉල්ලීමක් මත, එක්සත් ජනපදයේ සුප්රසිද්ධ රාජ්ය නොවන සංවිධාන තුනක් මගින් ශ්රී ලංකාවේ ජනතාව වෙත නොමසුරුව ආධාර ලබාදී ඇත. නවතම සංඛ්යාලේඛනවලට අනුව 2022 ජූලි මාසයේ සිට මේ දක්වා, මෙම තානාපති කාර්යාලය ශ්රී ලංකාවේ සෞඛ්ය අමාත්යාංශය සමඟ සම්බන්ධීකරණයෙන් දළ වශයෙන් ඇ.ඩො. මිලියන 53.9 ක් වටිනා (ආසන්න වශයෙන් රු.17,067,973,528) ඖෂධ ඇමරිකාවෙන් ශ්රී ලංකාවේ ජනතාවට කිසිදු වියදමකින් තොරව පරිත්යාග කර ඇත. මෙම රාජ්ය නොවන සංවිධාන විසින් පරිත්යාග කරන ලද ඖෂධ සහ වෛද්ය සැපයුම් අතර වේදනා නාශක සහ ප්රතිජීවක, අධි රුධිර පීඩනය සහ අනෙකුත් හෘද රෝග සඳහා ප්රතිකාර කිරීමට අවශ්ය ඖෂධ, විෂාදය වැනි මානසික තත්වයන්ට ප්රතිකාර කිරීම සඳහා වන ඖෂධ, භින්නෝන්මාදය, බයිපෝල අක්රමිකතා යනාදි මානසික තත්වයන්ට අවශ්ය ඖෂධ, ඉන්ද්රිය බද්ධ කිරීම් සඳහා භාවිතා කරන ප්රතිශක්ති නාශක, ඔන්කොලොජි (පිළිකා) ඖෂධ, ඇදුම රෝග ලක්ෂණ සහ හුස්ම ගැනීමේ අපහසුතා සඳහා ප්රතිකාර කිරීමට අවශ්ය ඖෂධ, ප්රසව හා කිරි දීමට වන විටමින්, මන්දපෝෂණයෙන් පෙළෙන මව්වරුන් සඳහා බහු ක්ෂුද්ර පෝෂක අතිරේක (MMS), සහ නිදන්ගත රෝග ඖෂධ, කැතීටර්, සිරින්ජ සහ අත්වැසුම් යනාදිය වේ.Sri Lanka Latest News
ජාත්යන්තර සහයෝගීතාවයේ සහ මානුෂීය ආධාරවල තවත් සන්ධිස්ථානයක් සනිටුහන් කරමින් වොෂින්ටනයේ ශ්රී ලංකා තානාපති කාර්යාලය විසින් පහසුකම් සපයන ලද ඇ.ඩො. 201,208.32 (ආසන්න වශයෙන්. රු. 63,632,131) වටිනා නවතම ඖෂධ තොගයක් Americares විසින් පරිත්යාග කර ඇත. ශ්රී ලංකාවේ අත්යාවශ්ය සෞඛ්ය සේවා සපුරාලීම සඳහා පහත සදහන් පාර්ශවකරුවන් විසින් සපයනු ලබන ආධාර තොග අතර මෙම පරිත්යාගය එම සහයෝගීතාවය වැඩි දියුණු කරමින් 2024 පෙබරවාරි 20 වන දින සෞඛ්ය අමාත්යාංශය විසින් ඉක්මනින් බෙදාහැරීම සඳහා ලබාගෙන ඇත.
Heart to Heart International (HHI) ශ්රී ලංකාවට ඖෂධීය පරිත්යාග ලබාදීමේ ප්රධාන හවුල්කරුවෙකු ලෙස දිගටම කටයුතු කරනු ලබයි. මේ දක්වා, ශ්රී ලංකාවේ රජයට හෝ ජනතාවට කිසිදු වියදමකින් තොරව HHI විසින් දළ වශයෙන් ඇ.ඩො. මිලියන 46.8 වටිනා ජීවිතාරක්ෂක ඖෂධ පරිත්යාග කර ඇත. කන්සාස් ප්රාන්තයේ ලෙනෙක්සා හි මූලස්ථානය පිහිටි HHI ආයතනය, සෞඛ්යය ප්රවේශය වැඩිදියුණු කිරීම කෙරෙහි අවධානය යොමු කළ ගෝලීය මානුෂීය සංවිධානයකි. 1992 ආරම්භයේ සිට, HHI ආයතනය එක්සත් ජනපදය ඇතුළුව රටවල් 130 කට වැඩි ගණනකට ඩොලර් බිලියන 2.6 ක් වටිනා වෛද්ය ආධාර සහ සැපයුම් ලබා දී ඇත.
Americares යනු ශ්රී ලංකාවට ඖෂධීය පරිත්යාග ලබාදෙන තවත් ප්රධාන හවුල්කාර රාජ්ය නොවන සංවිධානයකි. මේ දක්වා Americares විසින් ඇ.ඩො. මිලියන 4.4ක් වටිනා ජීවිතාරක්ෂක ඖෂධ පරිත්යාග කර ඇත. Americares යනු දරිද්රතාවයෙන් හෝ ව්යසනයෙන් පීඩාවට පත් වූ පුද්ගලයින්ගේ ජීවිත ආරක්ෂා කරන සහ සෞඛ්යය වැඩි දියුණු කරන, සෞඛ්ය කේන්ද්ර කරගත් සහන සහ සංවර්ධන සංවිධානයකි. සෑම වසරකම, මෙම සංවිධානය එක්සත් ජනපදය ඇතුළුව සාමාන්යයෙන් රටවල් 85කට පමණ ජීවිතය වෙනස් කරන සෞඛ්ය වැඩසටහන්, ඖෂධ, වෛද්ය සැපයුම් සහ හදිසි ආධාර ලබාදීම සඳහා ඉදිරිපත්වේ. වසර 40කට පෙර එය ආරම්භ කළ දා සිට ඇමරිකා එක්සත් ජනපදය ඇතුළු රටවල් 164කට ඩොලර් බිලියන 20කට වැඩි ආධාර ලබා දී ඇත.
මීට අමතරව, HOPE Worldwide ආයතනය 2022 සැප්තැම්බර් මාසයේදී ඇ.ඩො. මිලියන 2.7ක් වටිනා අත්යාවශ්ය ඖෂධ පරිත්යාග කළේය. ලොව පුරා සිටින දුප්පතුන්, රෝගීන් සහ දුක් විඳින අයට සේවය කිරීමේ අරමුණින්, HOPEww 1991 දී පිහිටුවන ලදී. HOPEww සංවිධානය අවශ්යතා ඇති රටවල් සමඟ එක්ව, එම රටවල ස්වේච්ඡා සේවකයන් සන්නද්ධ කිරීම, ව්යසනයන්ට උදව් කිරීම, සහ ලෝකය තුළ වැඩි බලාපොරොත්තුවක් ඇති කිරීමට ප්රජාවන් ශක්තිමත් කිරීම ආදිය සිදුකරනු ලබයි.
වොෂින්ටන් ඩී.සී. හි ශ්රී ලංකා තානාපති කාර්යාලය ඉහත සඳහන් කළ සියලුම සංවිධාන විසින් අඛණ්ඩව සපයනු ලබන සහාය බෙහෙවින් අගය කරනු ලබයි.
ශ්රී ලංකා තානාපති කාර්යාලය,
වොෂින්ටන්, ඩී.සී.
2024 පෙබරවාරි 21
