ග්රාමීය මට්ටමේ විවිධ පාර්ශවයන්හි අදහස් ලබාගනිමින් මෙවර ඉතා හොඳ අයවැයක් ඉදිරිපත් කිරීමට මුදල් අමාත්ය බැසිල් රාජපක්ෂ මහතා කටයුතු කරමින් සිටින බව ග්රාමීය මාර්ග හා අවශේෂ යටිතල පහසුකම් රාජ්ය අමාත්ය නිමල් ලාන්සා මහතා පවසයි.
ආගමික නායකයින්, ගමේ මහජන නියෝජිතයන්, රජයේ නිලධාරීන් සහ ග්රාමීය කමිටුවල ආදී විවිධ පාර්ශවයන්හි යෝජනා එහිදී ලබා ගැනීමට නියමිත බව රාජ්ය අමාත්යවරයා සඳහන් කළේය.
අයවැය සඳහා ග්රාමීය මට්ටමින් යෝජනා ලබා ගැනීමෙන් ගමේ ක්රියාත්මක කළ යුත්තේ ආර්ථික ක්රියාවලියක්ද, ජීවනෝපාය සංවර්ධනයක්ද, සුබසාධන සේවාවක්ද යන්න නිවැරදිව හදුනා ගැනීමට හැකි වන බව ඔහු කියයි.
අයවැයකදී ගම් මට්ටමින් යෝජනා ලබාගැනෙන්නේ ඉතිහාසයේ පළමු වරට බව ද රාජ්ය අමාත්යවරයා පැවසීය.
ශ්රී ලංකා පොදුජන පෙරමුණු රජයේ 2022 අයවැයට අදාල යෝජනා ලබා ගැනීම සදහා මුදල් අමාත්ය බැසිල් රාජපක්ෂ මහතාගේ උපදෙස් පරිදි ක්රියාත්මක වන ආසන මට්ටමේ රැස්වීම් මාලාව යටතේ මීගමුව ආසනයේ රැස්වීම ඊයේ (03) දින මීගමුව නගර සභා ශ්රවණාගාරයේදී පැවැත්විණ.
ඊට අධ්යාපන ප්රතිසංස්කරණ රාජ්ය අමාත්ය සුසිල් ප්රේම්ජයන්ත, කොළඹ දිස්ත්රික් පාර්ලිමේන්තු මන්ත්රී ප්රදීප් උදුගොඩ, මීගමුව නගරාධිපති දයාන් ලාන්සා, හිටපු නගරාධිපති ඇන්ටනී ජයවීර, හර්මන් කුරේරා, හිටපු නියෝජ්ය නගරාධිපති සේපාල මොරවක, මීගමුව නගර සභාවේ නාගරික මන්ත්රීවරුන් ඇතුලු කොට්ඨාශ නායකයින් සහභාගී වී සිටියහ.
