‘අපේ ආර්ථිකය ලෝකයේ වඩාත්ම සංවෘත ආර්ථිකයන්ගෙන් එකකි. තිරසාර වර්ධනයක් ලබාගැනීම සඳහා අපි ආනයන ආදේශන ආකෘතියකින් මාරුවිය යුතු අතර, වෙළෙඳ – විරෝධී පක්ෂග්රාහීකම් ඉවත් කළ යුතුය. අප තේරීපත්වූ පසු ජාත්යන්තර මූල්ය අරමුදලේ (IMF) වැඩසටහනෙන් බැහැර නොවී, අවශ්ය වෙනස්කම් කිරීමට අපට නම්යශීලී බවක් ලැබෙනු ඇත. අධික ලෙස මුදල් මුද්රණය කිරීමෙන් වැළකෙමින් සහ පොලී අනුපාත සියල්ලක් යථාර්ථවාදීව තබාගනිමින්, වගකිව යුතු මූල්ය හා මූල්යමය ප්රතිපත්තිවලට අපි කැපවී සිටිමු. අපගේ නායකත්ව කණ්ඩායම දේශීය හා ජාත්යන්තර ආර්ථික ගතිකත්වයන් අවබෝධ කරගෙන සිටින අතර, දිළිඳුකම අවම කිරීමට සහ සියලු ශ්රී ලාංකිකයන් සඳහා ආර්ථික අවස්ථා නිර්මාණය කිරීමට කැපවී සිටිති. ජීවිතය ගැටගසා ගන්නට දඟලන මිනිසුන්ගේ ප්රමාණය අතිවිශාලය. රජය තම පුරවැසියන් ගැන සැලකිලිමත් වීම අත්යාවශ්ය වන්නේ ඒ නිසායි….’ (Sri Lanka Latest News)
යම් දේශයක ආර්ථිකයක් ගැන කියැවෙන මෙම කතාව කුමක්ද? එය වෙනත් කිසියම් දේශයක් නොව අපගේ ශ්රී ලංකාවයි. මෙයට දින කිහිපයකට පෙරදී අසන්නට ලැබුණු කතාව කියා සිටින්නේ මෙරට සිටින ආර්ථික සහ දේශපාලනික විද්වතකු වන ආචාර්ය හර්ෂ ද සිල්වා විසිනි. ඔහු මෙම වතගොත කියා සිටියේ පසුගියදා කොළඹදී පවත්වන ලද විශේෂ සභා වාරයකදීය. දැනට මහත් කතාබහට ලක්වී තිබෙන, තවත් නොබෝ දිනකින් පැවැත්වෙන ශ්රී ලංකාවේ 2024 ජනාධිපතිවරණයට අදාළව සිදුකෙරුණු විශේෂ සංවාදයක් මෙසේ පවත්වනු ලැබීය. Defining the Vision – The Debate යන ඉංග්රීසි භාෂාවෙන් සිදුකෙරුණු මෙම විද්වත් කතිකාව සිංහල බසින් අර්ථවත් කළ හැක්කේ ‘දැක්ම නිර්වචනය කිරීම – විවාදය’ යන මාතෘකාව විලසිනි. මෙම සංවාදය සංවිධාන කර තිබුණේ ලංකා වාණිජ මණ්ඩලය විසින් වන අතර, එය එම ආයතනය එවැනි විෂයක් යටතේ පවත්වන ලද ප්රථම සාකච්ඡාවද විය. මෙම සුවිශේෂ සාකච්ඡාවේ පරමාර්ථය වූයේ 2024 ජනාධිපතිවරණය සඳහා ඉදිරිපත් වන ප්රධානතම අපේක්ෂකයන් හතර දෙනාගේ දේශපාලන සැලසුම් සහ ප්රතිපත්ති පිළිබඳ අධ්යයනයක් සිදුකිරීමය. මෙහිදී අදාළ සාකච්ඡාව සඳහා අපේක්ෂකයන් හතරදෙනා සහභාගි නොවන අතර, ඔවුන්ගේ ප්රධානතම නියෝජිතයන් හතර දෙනකු සහභාගි වෙයි. ඒ අනුව සමගි ජන බලවේගයේ අපේක්ෂක සජිත් ප්රේමදාස නියෝජනය කරමින් ආචාර්ය හර්ෂ ද සිල්වා, ස්වාධීන අපේක්ෂක රනිල් වික්රමසිංහ නියෝජනය කරමින් ෂෙහාන් සේමසිංහ, ජාතික ජන බලවේගයේ අපේක්ෂක අනුර කුමාර දිසානායක නියෝජනය කරමින් ආචාර්ය හර්ෂණ සූරියප්පෙරුම සහ ශ්රී ලංකා පොදුජන පෙරමුණේ අපේක්ෂක නාමල් රාජපක්ෂ නියෝජනය කරමින් මහාචාර්ය රංජිත් බණ්ඩාරද සහභාගි වූහ.
2024 ජනාධිපතිවරණයට පෙර එයට මුහුණ දෙන ප්රධාන අපේක්ෂකයන් හතරදෙනකු නියෝජනය කරන ආර්ථික ප්රතිපත්ති විශේෂඥයෝ මෙලෙස තමන්ගේ තරගකාරී ආර්ථික දැක්ම ඉදිරිපත් කළහ. ලංකා වාණිජ මණ්ඩලය සංවිධාන කළ මෙම විද්වත් කතිකාව මෙහෙයවනු ලැබුවේ ලංකා වාණිජ මණ්ඩලයේ සභාපති දුමින්ද හුලංගමුව සහ එම මණ්ඩලයේ අධ්යක්ෂ මණ්ඩල සභික කස්තුරි චෙල්ලරාජා විසිනි. වට තුනකින් සමන්විත වූ මෙම සංවාදය ඉතා දීර්ඝ එකක් වූ අතර, එහිදී දේශකයන් තමන්ගේ ප්රකාශ ඉදිරිපත් කරන ලදී. ඉන් පසුව ප්රශ්න ඇසීමේ වාරයන්ද පවත්වන ලදී. කෙසේ හෝ මෙම සංවාදය බොහෝ දීර්ඝ එකක් හෙයින් එහි සියලු විස්තර ලියා තබන්නට මෙහි ඉඩකඩ මදිය. එහෙත් එහිදී ප්රකාශිත වූ යම් සුවිශේෂ කරුණු ගැන පමණක් අවධානය යොමුකරමු.
ආචාර්ය හර්ෂ ද සිල්වා විසින් සිදුකරන ලද ප්රධාන ප්රකාශයට අමතරව අනෙකුත් දේශකයන් සිදුකළ ප්රධාන ප්රකාශයන් සොයා බලමු.
★ ෂෙහාන් සේමසිංහ
‘මෑතකාලීන දළ දේශීය නිෂ්පාදිතයේ පහත වැටීමට වන්දි ගෙවීමට සහ රට සම්පූර්ණයෙන්ම ස්ථාවර කිරීමට 7%ක වර්ධන වේගයක් ළඟාකර ගැනීම අපගේ අරමුණයි. මේ සඳහා අපට තවත් මාස 12-15ක පමණ කාලයක් ගතවනු ඇතැයි අප ඇස්තමේන්තු කරමු. ඉන් පසුව අපට ආරක්ෂිත සහ පොරොන්දු වූ ආර්ථික පදනමක් අපේක්ෂා කළ හැකිය. රාජ්ය මූල්ය හා මූල්යමය උත්තේජක කෙරෙහි අඩු අවධානයක් යොමුකිරීමටත්, ඵලදායිතාව ඉහළ නැංවීමට වැඩි අවධානයක් යොමුකිරීමටත් අපි සැලසුම් කරමු. අපි දැනටමත් නව ආර්ථික කලාප හඳුන්වා දී ඇති අතර, නව නිදහස් වෙළෙඳ ගිවිසුම් අනුගමනය කරමින් සිටිමු. තායිලන්තය සමග අවසන් කර ඇති ගිවිසුමක් සහ ඉන්දියාව සමග ආර්ථික හා තාක්ෂණික සහයෝගිතා නව ගිවිසුමක්ද දැනට සාකච්ඡා අවසන් අදියරේ සිදුවෙමින් පවතී. මෙවැනි පියවර තවත් රටවල් රැසක් සමගද ගැනීමට සැලසුම් කර ඇත…’
★ ආචාර්ය හර්ෂණ සූරියප්පෙරුම
‘අපි ජාත්යන්තර මූල්ය අරමුදලේ වැඩසටහනට අනුගතවන අතර, අපි ඔවුන්ට පැහැදිලිවම ප්රකාශ කර තිබෙනවා අපි දැනට පවතින වැඩපිළිවෙළෙන් බැහැර නොවන බවට. ක්ෂේත්රයේ ප්රවීණයන්ගෙන් ලැබෙන අදහස් හා යෝජනා මෙහිදී ඉතා වැදගත් වන බවත් අපි විශ්වාස කරනවා. අපි මෙහිදී අපගේම ප්රශ්න විසඳීමේ ක්රමානුකූල ක්රමවේදයක්ද අනුගමනය කිරීමට බලාපොරොත්තු වෙනවා. එය තාක්ෂණිකව තමන්ගේ සිතීම තුළින් සිදුවන ක්රියාවලියක්. කෙසේ වෙතත් ආදායම් කාන්දුවීම් ආමන්ත්රණය කිරීම සහ වියදම් වඩාත් ඵලදායී ලෙස කළමනාකරණය කිරීම ඇතුළත් විශ්වසනීය සැලැස්මක් මත අපගේ සාකච්ඡා පදනම් කරගැනීමට අපට අවශ්ය වෙනවා. ආදායම් එකතු කිරීමේ අකාර්යක්ෂම සහ ආයතනික දුර්වලතා වැනි ක්ෂේත්ර ඉස්මතු කරමින් මෙම සාකච්ඡා සඳහා පදනම සැකසෙනු ඇත. ජාත්යන්තර මූල්ය අරමුදල පෙන්වා දී ඇත්තේ ඔවුන්ගේ පිළිගැනීම අපගේ යෝජිත වැඩසටහනේ විශ්වසනීයත්වය සහ අපගේ ආදායම් උත්පාදන සැලසුම් මත රඳාපවතින බවයි…’
★ මහාචාර්ය රංජිත් බණ්ඩාර
‘අපගේ ප්රතිපත්ති රාමුව මහින්ද චින්තනය වටා විකාශනය වන අතර, එය 2005-2015 දක්වා ක්රියාශීලී විය. එසේම එය අත්යාවශ්ය යටිතල පහසුකම් සංවර්ධනය සහතික කරයි. නිදහස යන්නෙන් අදහස් කරන්නේ ආර්ථික, දේශපාලනික, සංස්කෘතික සහ ආගමික නිදහසයි. එය හුදෙක් ආර්ථික ප්රතිපත්තියක් පමණක් නොව, සාකල්ය සංවර්ධනය සඳහා මනා වටකුරු ඉදිරි දර්ශනයක් සහතික කිරීමකි. ඉන් අදහස් කරන්නේ අපි අධික රාජ්ය පාලනයකට නැවත පැමිණීමක් ප්රවර්ධනය කරන බව නොවේ. ඒ වෙනුවට අපි වර්ධනය සඳහා ශක්තිමත් සහ කාර්යක්ෂම රාජ්ය යන්ත්රණයක් වෙනුවෙන් පෙනීසිටිමු….’
මෙම විද්වත් සභාව මෙහෙයවනු ලැබූ ලංකා වාණිජ මණ්ඩලයේ සභාපති දුමින්ද හුලංගමුව සහ අධ්යක්ෂ මණ්ඩල සභික කස්තුරි චෙල්ලරාජා විසින් දේශකයන්ගෙන් (නියෝජිතයන්ගෙන්) ප්රශ්න කිරීම්ද සිදුකරන ලදී. එම අවස්ථාවන් කිහිපයක් ගැන කරුණු සොයා බලමු.
★ කස්තුරි චෙල්ලරාජා
‘ඔබේ අපේක්ෂකයා තේරීපත්වුවහොත් IMF සමග නැවත සාකච්ඡා කරන බව සඳහන් කළා. විශේෂයෙන් දළ දේශීය නිෂ්පාදිතයේ අනුපාතයට ආදායම, හරස් මූල්යකරණ ක්රම සහ ප්රාථමික ගිණුමේ අතිරික්තය සාක්ෂාත් කරගැනීම සම්බන්ධයෙන්, ඔබ නැවත සාකච්ඡා කිරීමට අදහස් කරන්නේ කුමන පරාමිතීන්ද යන්න පැහැදිලි කළ හැකිද?’
★ ආචාර්ය හර්ෂ ද සිල්වා
‘අවංකවම කිවහොත් රට බංකොලොත් වීමට පෙර ක්රියාමාර්ග ගන්නා ලෙස ඉල්ලා සිටිමින් 2020 අගෝස්තු මාසයේදී IMF ආධාර ලබාගැනීම සඳහා පෙනීසිටියේ අපියි. මුලදී පැහැදිලිවම හිටපු ජනාධිපතිවරයාගේ ආර්ථික උපදේශකයන් විසින් ගත් තීන්දු තීරණ නිසා මහත් අර්බුදකාරී තත්ත්වයක් හටගත්තා. එතැන සිට අපි මෙම වැරැදිවලින් ඉගෙනගෙන ඇති අතර, අපි IMF වැඩසටහනට සහාය දෙන අතරම, අපගේ පක්ෂය විශ්වාස කරන්නේ යම් යම් ගැළපීම් අවශ්ය බවයි. මා පෙන්වා දුන් ප්රස්ථාරයෙන් අනෙකුත් නැගීඑන වෙළෙඳපළවල් ගෝලීය නිෂ්පාදනයට ඔවුන්ගේ දායකත්වය වැඩිකරගෙන ඇති ආකාරය පෙන්වා දෙන අතර, එහිදී ශ්රී ලංකාවේ දායකත්වය සැලකිය යුතු ලෙස පහත වැටී ඇත…’
★ කස්තුරි චෙල්ලරාජා
‘ඔබ සඳහන් කළා පෞද්ගලික අංශයේ කාර්යසාධනය නොකරන කළමනාකරුවන් ඉවත් විය යුතුයි කියලා. මෙහිදී පෙනෙන්නේ බලය පිළිබඳ පූර්ව පළපුරුද්දක් නොමැතිකම හමුවේ ජාතික ජන බලවේගයට (NPP) ආණ්ඩු කිරීමේ හැකියාව ගැන සැකයක් පවතින බවයි. ඔබට මෙම ගැටලු විසඳිය හැක්කේ කෙසේද?’
★ ආචාර්ය හර්ෂණ සූරියප්පෙරුම
‘එය සාධාරණ ප්රශ්නයක්. එහෙත් දූෂණය, අදක්ෂකම සහ පුරවැසි සුබසාධනය නොසලකා හැර ඇති බලයේ සිටි අයගේ වාර්තාවන් සලකා බලන්න. දූෂණයට අදාළව ජාතික ජන බලවේගයට පිරිසිදු වාර්තාවක් ඇත. රාජ්ය ව්යවසාය ආපසු හැරවිය හැකි බව අපගේ සමහර නියෝජිතයන් දැනටමත් ඔප්පු කර ඇත. අප සතුව දක්ෂ වෘත්තිකයන් විශාල ප්රමාණයක් සිටිනවා. ජනතාව අපේක්ෂා කරන වෙනසක් ඇතිකිරීමට නායකයන් අවංකභාවය සහ දේශපාලන අධිෂ්ඨානය විදහා දැක්විය යුතුයි…’
★ කස්තුරි චෙල්ලරාජා
‘ඔබ පැනයට නිසි පිළිතුරක් දුන්නේ නැහැ. පෙර පළපුරුද්දක් නොමැතිව ඔබ පාලනයේ අභියෝග වෙත ගමන් කරන්නේ කොහොමද?’
★ ආචාර්ය හර්ෂණ සූරියප්පෙරුම
‘අපගේ කණ්ඩායමට විවිධ ක්ෂේත්ර සහ රටවල් හරහා සැලකිය යුතු පළපුරුද්දක් ඇති අතර, එමගින් පාලනය ඵලදායී ලෙස හැසිරවීමට අපව සන්නද්ධ කරනු ඇත. එමෙන්ම සදාචාරාත්මක හා නිපුණ නායකත්වයක් පෙරමුණට ගෙන ඒම මගින් එම කැපවීම ප්රදර්ශනය කිරීමට ජාතික ජන බලවේගය සූදානම්…’
★ දුමින්ද හුලංගමුව
‘ඔබේ අපේක්ෂකයා (සජිත් ප්රේමදාස) ගොවීන්ගේ ණය කපාහරින බවටත්, දිළිඳු පවුල් සඳහා රුපියල් 20,000ක සහනාධාරයක් ලබාදෙන බවටත් පොරොන්දු වෙනවා. ගොවීන්ගේ ණය කපාහැරියහොත් එහි මූල්යමය පාඩුව දරාගන්නේ කවුද? බැංකුවද? රජයද? මෙම පියවර සඳහා ඔබට කුමන ආකාරයේ මූල්ය අවකාශයක් තිබේද?’
★ ආචාර්ය හර්ෂ ද සිල්වා
‘බොහෝ ගොවීන් තමන්ගේ ගේදොර, ට්රැක්ටර් පවා උකස් කරමින් තමයි භෝග චක්රය සිදුකරගෙන යන්නේ. මේක තමයි මේ රටේ යථාර්ථය. සජිත් ප්රේමදාසගේ සෑම යෝජනාවකටම ආදායම් සැලසුම්වල පිටුබලය ලැබී තිබෙනවා. සල්ලි එන්නේ කොහෙන්ද කියලා පෙන්නන්නේ නැතිව එක රුපියලක්වත් වියදම් කරන්නේ නැහැ. අපි විනිවිදභාවය සහතික කරනවා….’
ප්රියන්ත හෙට්ටිගේ
