ජනශක්ති සමූහ ව්යාපාරයේ අධ්යක්ෂ දිනේෂ් ෂාෆ්ටර් මහතාගේ මරණයට හේතුවක් මෙතෙක් අනාවරණය නොවූයෙන් මරණකරු භාවිත කළ දුරකථන අංකය එලෙස පවත්වාගෙන යාමට ඔහුගේ බිරිය විසින් කරන ලද ඉල්ලීමට අපරාධ පරීක්ෂණ දෙපාර්තමේන්තුව කොළඹ අතිරේක මහේස්ත්රාත් රජින්ද්රා ජයසූරිය මහත්මිය හමුවේ ඊයේ (12) සිය විරුද්ධත්වය ප්රකාශ කළේය.
මරණයට අදාළ සමාජ මාධ්ය දත්ත වාර්තා හා දුරකථන වාර්තා මෙම දුරකතනයේ සටහන් වී ඇති බවත් දුරකථනය දැනට විශ්ලේෂණ වාර්තා සඳහා රස පරීක්ෂකවරයා වෙත ලබාදී ඇති බව සඳහන් කළ අපරාධ පරීක්ෂණ දෙපාර්තමේන්තුව එහි දත්ත විනාශ වී යා හැකි දැයි යන්න පිළිබඳ තවදුරටත් විමර්ශනය කර ඉදිරියේදී අධිකරණයට වාර්තාවක් ගොනු කරන බව පැවසීය.
මරණකරුගේ බිරියට එකී දුරකථන අංකය භාවිත කිරීමට දීමෙන් සිද්ධියට අදාළ සාක්ෂි විනාශ විය හැකි ද යන්න සම්බන්ධයෙන් අපරාධ පරීක්ෂණ දෙපාර්තමේන්තුවේ පරිගණක අංශය හරහා වාර්තාවක් කැඳවීමට මහේස්ත්රාත්වරිය මෙහිදී නියෝග කළාය .
තවද දුරකතනයේ ගබඩා වී ඇති දත්ත සංරක්ෂණය කර තබා ගැනීමේ ක්රමවේදයක් අදාළ දුරකථන සමාගමේ ඇද්දැයි යන්න සම්බන්ධයෙන් වාර්තාවක් කැඳවීමට අධිකරණය මෙහිදී නියෝග කළේය.
සිද්ධියට අදාළව ජනාධිපති නීතිඥ අනුජ ප්රේමරත්න මහතා ඉකුත් හයවැනි දින මරණකරුගේ දුරකථන අංකය එලෙසම පවත්වාගෙන යාමට බිරියට අවසර ලබාදෙන ලෙසට අධිකරණයෙන් ඉල්ලීම සිදු කර තිබිණ.
මරණකරුගේ දෙවැනි පශ්චාත් මරණ පරීක්ෂණය ගාල්ල කරාපිටිය රෝහලේදී සිදු වන අතර එහි අධ්යයන කටයුතු සඳහා අපරාධ පරීක්ෂණ දෙපාර්තමේන්තුව මෙතෙක් පැවැත්වූ විමර්ශනවලට අදාළ සියලු ලේඛන පංච පුද්ගල වෛද්ය මණ්ඩලය වෙත යොමු කරන ලෙසට අධිකරණය නියෝග කළේය.
Dinesh Shafter
