මාතර – පිටබැද්දර ප්රදේශයේදී සැකකරුවෙකු සමඟ පොලිස් භාරයට ගත් ඇත්දළ යුගලයට හිමිකම් පෑමට පාර්ලිමේන්තු මන්ත්රී ගාමිණි ලොකුගේ සහ අකුරැස්ස ප්රදේශයේ වලව් පරම්පරාවක පුද්ගලයෙකු ඉදිරිපත්ව තිබෙනවා.
රුපියල් ලක්ෂ 50ක මුදලකට අදාළ ඇත්දළ යුගලය අලෙවි කිරීමට ගිය අවස්ථාවේදියි පසුගිය 12 වැනිදා සැකකරුවෙකු සමඟ එය පොලිස් භාරයට ගනු ලැබුවේ.
පසුව ඒ පිළිබඳ මාධ්ය ඔස්සේ ප්රචාරය වීමත් සමඟ පාර්ලිමේන්තු මන්ත්රී ගාමිණි ලොකුගේ සහ අකුරැස්ස ප්රදේශයේ වලව් පරම්පරාවක පුද්ගලයෙකු පානදුර වලාන දූෂණ මර්දන ඒකකය වෙත පැමිණ එම ඇත්දළ යුගල සඳහා හිමිකම් ප්රකාශ කර තිබෙනවා.
පසුගිය වසරේ මැයි මස 9 වැනිදා රට තුළ ඇති වූ ප්රචණ්ඩ ක්රියා අතරතුර තම නිවසට පහර දී ගිනි තැබූ අවස්ථාවේ අස්ථානගත වූ ඇත්දළ යුගලය මෙය බවට පාර්ලිමේන්තු මන්ත්රී ගාමිණි ලොකුගේ පොලිසියට ප්රකාශ කර තිබුණා.
එම ඇත්දළ යුගලය මීට වසර කිහිපයකට පෙර විදේශගත වූ ඥාතියෙකු තමන් වෙත ලබාදී තිබූ බවටයි ඔහු පොලිසියට සඳහන් කර ඇත්තේ.
කෙසේ වෙතත් අකුරැස්ස -දීගල වලව්වට නෑකම් කිය පුද්ගලයෙකු ද මෙම ඇත්දළ යුගලයට හිමිකම් කීම හේතුවෙන් ඒ සම්බන්ධයෙන් අද මොරවක මහේස්ත්රාත් අධිකරණයට කරුණු වාර්තා කරන බවයි පානදුර – වලාන දූෂණ මර්දන ඒකකය සඳහන් කළේ.
hirunews
