කොළඹ කොටස් වෙළෙඳපොළෙහි දැවැන්ත කඩා වැටීමක් අද (27) දිනයේ දී වාර්තා විය.
දිනයේ ගනුදෙනු අවසානයේ දී සියලු කොටස් මිල දර්ශක අගය ඒකක 12,885.70 ක් ලෙසින් සටහන් වූ අතර එය පෙර දිනයට සාපේක්ෂව ඒකක 180.05 ක පහළ යාමකි. සියලු කොටස් මිල දර්ශක අගය 2021 ජනවාරි 04 දිනෙන් පසු පළමු වරට ඒකක 13,000 සීමාවෙන් මෙපිටට පැමිණි අවස්ථාව මෙය වේ.
S&P SL20 දර්ශකය ඒකක -78.16කින් පහළ ගොස් ඒකක 4,400.18 ක් ලෙසින් සටහන්ව තිබුණි.
සියලු කොටස් මිල දර්ශකයේ පහළ යාමක් වාර්තා වූ අඛණ්ඩ තුන්වෙනි දිනය අදයි.
අද දිනයේ දී සමස්ත ගනුදෙනු පිරිවැටුම රු. බිලියන 7.59 ක් ලෙසින් දැක්වුණු අතර එක්ස්පෝලංකා හෝල්ඩිංග්ස් (රු. බිලියන 2.01), බ්රවුන්ස් ඉන්වෙස්ට්මන්ට්ස් (රු. මිලියන 736.91), සොෆ්ට්ලොජික් ලයිෆ් (රු. මිලියන 613.43), LOLC හෝල්ඩිංග්ස් (රු. මිලියන 235.25) හා ඩිමෝ (රු. මිලියන 220.69) ඒ සඳහා ඉහළ දායකත්වයක් ලබාදුන් සමාගම් විය.
මේ අතර අද දිනයේ ගනුදෙනු අවසානයේ දී කොළඹ කොටස් වෙළෙඳපොළ, සමස්ත වෙළෙඳපොළ ප්රාග්ධනීකරණ වටිනාකම රු. බිලියන 5,732.93 ක් ලෙසින් සටහන්ව තිබුණි.
මෙම අගය පසුගිය ජනවාරි 24 වනදා වාර්තා වූයේ රු. බිලියන 6,016.46 ක් ලෙසිනි.
මේ අනුව අද දිනය ද ඇතුළුව දින 3ක් තුළ දී රු. බිලියන 283.53 ක වටිනාකමක් කොටස් වෙළෙඳපොළට අහිමි වී තිබේ.
කොටස් වෙළෙඳපොළෙහි ලැයිස්තුගත සමාගම් අතුරින් විශාලතම සමාගම් දෙක වන එක්ස්පෝලංකා හෝල්ඩිංග්ස් සහ LOLC හෝල්ඩිංග්ස් යන සමාගම්වල කොටස් මිල ගණන් විශාල වශයෙන් පහළ යාම මිල දර්ශකවල හැසිරීමට ඉහළ සෘණාත්මක දායකත්වයක් ලබා දෙන ලදී.
පෙර දිනය හා සැසඳීමේ දී එක්ස්පෝලංකා හෝල්ඩිංග්ස් කොටසක මිල 4.77%කින් සහ LOLC හෝල්ඩිංග්ස් කොටසක මිල 5.07% කින් අද දින පහළ ගොස් තිබුණි.
