සිය කොට්ඨාසවලින් වැඩිම ප්රතිශතය වාර්තා කළ අපේක්ෂකයන්ට ලයිස්තු මන්ත්රී ධූර ලබා දිය යුතු බවට සමගි ජන බලවේගයේ කෘත්යාධිකාරී මණ්ඩලය පෙරදී ගත් තීන්දුවේ දැඩිව සිටීමට එම පක්ෂය තීන්දු කොට ඇති බව වාර්තා වේ.Sri Lanka Latest News
ඒ අනුව පක්ෂයේ ඇතැම් ආසන සංවිධායකවරුන් කෙතරම් බලපෑම් සහ ඉල්ලීම් කළද ඒ කිසිවකටත් යට නොවී ඒ ඒ කොට්ඨාසවලින් ඉහළම ප්රතිශතය වාර්තා කළ අපේක්ෂකයන්ට හෙට (02) දිනයේ සභාවන්හි මන්ත්රී ධූර ලබා දීමට පක්ෂය පියවර ගෙන ඇත.
පසුගිය සති කිහිපයේ ඇතැම් ආසන සංවිධායකවරුන් සිය ඥාතීන් සහ හිතවතුන් ලයිස්තුවලින් පත් කරන ලෙසට දැඩි බලපෑම් පක්ෂය වෙත එල්ල කර තිබූ අතර ඇතැම් සංවිධායකයන් ඒ සම්බන්ධයෙන් ඇති කරගත් මතභේද හේතුවෙන් ආසන සංවිධායකකම්වලින් ඉල්ලා අස්වීමට පවා පියවර ගෙන තිබිණ.
නමුත් කිහිප දෙනකු හැරුණු විට අනෙකුත් සියලුම ආසන සංවිධායකවරුන් නැවත පක්ෂය සමග සාකච්ඡා කොට සිය ඉල්ලා අස්වීම් ඉවත් කරගැනීමටද කටයුතු කොට තිබිණ.
කෙසේවෙතත් එම සාකච්ඡාවන්හිදී පක්ෂය ඔවුන්ට දැනුම් දී තිබුණේ මැතිවරණයට පෙරම පක්ෂ කෘත්යාධිකාරී මණ්ඩලය එම තීන්දුව ගත් බවත්, එය කිසිසේත්ම වෙනස් කළ නොහැකි බවත්ය.
ඒ අනුව එම සංවිධායකවරුන් පක්ෂ ස්ථාවරය පිළිගෙන යළි ආසන සංවිධායකකම් බාර ගැනීමට කටයුතු කොට තිබිණ.
