අගමැතිනි හරිනි අමරසූරිය විසින් සුප්රීම් සැට් චන්ද්රිකාව සම්බන්ධයෙන් පාර්ලිමේන්තුවේදී සිදුකරනු ලැබූ ප්රකාශයේ තිබූ ඇතැම් තොරතුරු අසත්ය බවට අමාත්ය වසන්ත සමරසිංහ මහතා පාර්ලිමේන්තුවේදීම කළ ප්රකාශය හරහා අගමැතිවරියට බරපතළ අපහාසයක් වී ඇති බවට බොහෝ පාර්ශ්ව පෙන්වා දෙති.Sri Lanka Latest News
ඔවුන් පෙන්වා දෙන්නේ පාර්ලිමේන්තු ඉතිහාසයේ කිසිදු අවස්ථාවක ආණ්ඩු පක්ෂයේ ප්රධානියා වශයෙන් පාර්ලිමේන්තුවේ කටයුතු කරන අගමැතිවරයකු කර ඇති ප්රකාශයක් මේ ආකාරයෙන් පැය 24ක් ඉක්ම යෑමට මත්තෙන් ආණ්ඩුව පක්ෂයේම කැබිනට් අමාත්යවරයකු විසින් ප්රතික්ෂේප කිරීමක් සිදුව නොමැති බවකි.
විපක්ෂයේ මන්ත්රී ඩී.වී. චානක මහතා විසින් රෝහිත රාජපක්ෂ මහතා සම්බන්ධ යැයි කියන සුප්රීම් සැට් චන්ද්රිකාව සම්බන්ධයෙන් අගමැතිවරියගෙන් ප්රශ්නයක් විමසා තිබූ අතර, ඊට පිළිතුරු දෙමින් පසුගිය බදාදා දිනයේදී අගමැතිවරිය සඳහන් කොට තිබුණේ අදාළ චන්ද්රිකා ව්යාපෘතිය සඳහා රජයේ මුදල් වියදම් කොට නැති බවත්, එම ව්යාපෘතිය හරහා රජයට ආදායමක් ලැබී ඇති බවත්ය.
ආයෝජන මණ්ඩලය විසින් ලබාදුන් තොරතුරුවලට අනුව තමන් එම පිළිතුර ලබාදෙන බවද අගමැතිවරිය එහිදී සඳහන් කර තිබිණි.
කෙසේ වෙතත් අගමැතිවරිය කළ මෙම ප්රකාශයෙන් අනතුරුව ඊට පසු දින කැබිනට් අමාත්ය වසන්ත සමරසිංහ මහතා පාර්ලිමේන්තුවේදී දැඩි ප්රහාරයක් එල්ල කරමින් කියා සිටියේ අගමැතිවරිය ඉදිරිපත් කළ තොරතුරු නිවැරැදි නොවන බවත්, අදාළ ව්යාපෘතිය හරහා දැවැන්ත මූල්ය වංචාවක් සිදුව ඇති බවත්ය.
මේ සම්බන්ධයෙන් ඉදිරියේදී විමර්ශනයක් ආරම්භ කරන බවද වසන්ත සමරසිංහ මහතා එහිදී සඳහන් කර සිටියේය.
ඒ අනුව බොහෝ දෙනා පෙන්වා දෙන්නේ අමාත්යවරයාගේ මෙම ප්රකාශය හරහා අගමැතිවරියට බරපතළ අපහාසයක් සිදුව ඇති බවත්, අගමැතිවරිය සඳහන් කළ කරුණු වැරැදි නම්, පසුව අගමැතිවරිය විසින්ම එම තොරතුරු නිවැරැදි කොට පාර්ලිමේන්තුවට ඉදිරිපත් කිරීමේ හැකියාවක් තිබූ බවත්ය.
එමෙන්ම අගමැතිවරියට අසත්ය තොරතුරු ලබාදී තිබුණේ නම් එම අසත්ය තොරතුරු ලබාදුන් රාජ්ය නිලධාරීන් කැඳවා ඔවුන්ගෙන් මේ පිළිබඳ නිදහසට කරුණු විමසීමේ හැකියාව තිබූ බවද ඔවුහු පෙන්වා දෙති.
එසේ නොකොට අගමැතිවරිය කළ ප්රකාශය පැය 24ක් යෑමට මත්තෙන් අභියෝගයට ලක්කිරීම හරහා අගමැති තනතුරේ ගෞරවයට බරපතළ හානියක් සිදුකිරීමට ආණ්ඩුවේ ඇමැතිවරුන් කටයුතු කර ඇති බවද ඔවුහු පෙන්වා දෙති.
